GALATIA 3

Ka Hukum lane ka Jingngeit

1A ki Galatia ki babieit! hato uei ba la pynthame ïa phi, haba ha pyrshah ki khmat jong phi la pyni shynna ïa U Jisu Khrist ba la sahnarphna ïa u? 2Tang kane keiñ nga kwah ban tip na phi: Phi la pdiang ïa U Mynsiem da ki jingleh ka hukum, ne da ka jingpynsngew ka jingngeit? 3Hato phi long ki babieit katta katta? haba phi la sdang ha U Mynsiem, la pyndep mynta ïa phi ha ka doh? 4Hato phi la shah lehnohei ïa bun kiei kiei ruh katta katta? lada shisha ka long lehnohei. 5Namar kata uta uba ai ha phi ïa U Mynsiem, bad uba leh ki kambah hapdeng jong phi, hato u leh da ki jingleh ka hukum, ne da ka jingpynsngew ka jingngeit?

6 # Jen. 15:6; Rom. 4:3. Kumjuh kumba u Abraham “u la ngeit ïa U Blei, bad la ñiew ïa kata ha u, ka hok,” 7#Rom. 4:16.namar kata, to phin tip ba kita kiba na ka jingngeit, kita keiñ, ki long ki khun u Abraham. 8#Jen. 12:3; 18:18; Ki Kam. 3:25.Bad Ka Jingthoh, haba ka la ïohi lypa ba U Blei un pynksan ïa ki Jentil da ka jingngeit, ka la ïathuhlypa ïa ka gospel ha u Abraham, ka da ong: “Ha me yn kyrkhu ïa ki jaid bynriew baroh.” 9#Rom. 4:16.Kumta te la kyrkhu ïa kita kiba na ka jingngeit lem bad u Abraham uba ngeit.

10 # Deu. 27:26. Namar kat kiba long na ki jingleh ka hukum ki long hapoh ka jingtim keiñ: namar la thoh: “Long ba la tim ïa uwei pa uwei u bymïaineh ha kiei kiei baroh ïa kiba la thoh ha Ka Kitab Ka Hukum, ïa ka ban leh ïa ki.” 11#Hab. 2:4; Rom. 1:17; Heb. 10:38.Te ba yn ym pynksan ïano ïano ruh da ka hukum ha khmat U Blei, ka paw shynna: naba, “U bahok un im da ka jingngeit.” 12#Leb. 18:5; Rom. 10:5.Te kata ka hukum kam long na ka jingngeit; hynrei, “Uta uba leh ïa ki, un im ha ki.” 13#Deu. 21:23.U Khrist u la siewspah ïa ngi na ka jingtim ka hukum, da kaba la pynlong ïa u ka jingtim na ka bynta jong ngi: namar la thoh: “Long ba la tim ïa uwei uwei baroh uba sdien ha u dieng”: 14Khnang ba ka jingkyrkhu ka jong u Abraham ha U Khrist Jisu kan ïoh wan ha ki Jentil; ba ngin ïoh pdiang ïa ka jingkular ïa U Mynsiem da ka jingngeit.

Ka Hukum bad ka Jingkular

15Ko parabangeit, nga kren katba kum ka rukom ki briew. La ka long tang ka jutang u briew ruh, haba la pynskhem ïa ka, ym don uba pyndam noh ïa ka lane uba pynlang ha ka. 16#Jen. 12:7.Te ha u Abraham la kren ïa kita ki jingkular, bad ha u symbai jong u; um ong, “Bad ha ki symbai”, kumba shaphang kiba bun, hynrei, kumba tang shaphang uwei, “Bad ha u symbai jong me”, uba long U Khrist. 17#Eks. 12:40.Te ïa kane nga ong, ba ïa kata ka jutang ba la pynskhem mynshuwa da U Blei, kata ka hukum, kaba la long sawspah laiphew snem hadien, kam pynduh noh, kat ban pynlehnohei ïa kata ka jingkular. 18#Rom. 4:14; 11:6.Namar lada kata ka jingïoh kynti ka long na ka hukum, kam long shuh na ka jingkular; hynrei, U Blei u la ai ei ïa ka ha u Abraham da ka jingkular.

19 # Rom. 5:20. Ïa ka ban lei te la long kata ka hukum? La ai ïa ka hadien namar ki jingpalat, haduh ban da wan uta u symbai ha uba la ai ïa kata ka jingkular; bad la ai ïa ka da ki angel ha ka kti u ksiang. 20Te u ksiang um long ksiang tang ïa uwei: hynrei, U Blei u long uwei.

Ka jingthmu jong ka Hukum

21 # Rom. 8:2-4. Hato kata ka hukum te ka ïapyrshah ïa kita ki jingkular U Blei? Em, ym kumta! namar lada la lah ai ka hukum kaba lah ban pynim, da shisha, ka hok ka da long na ka hukum keiñ. 22#Rom. 3:9-19; 11:32.Hynrei, Ka Jingthoh ka la khang khop ïa kiei kiei baroh hapoh ka pop, ba yn ïoh ai ïa kata ka jingkular kaba na ka jingngeit ha U Jisu Khrist ha kita kiba ngeit.

23Hynrei, ha bym pat wan kata ka jingngeit, la set ïa ngi hapoh ka hukum, ba la khang khop ïa ngi sha kata ka jingngeit ïa ka ban sa pynpaw hadien. 24Kumta, kata ka hukum ka la long ka nonghikai jong ngi ban ïalam ïa ngi sha U Khrist, khnang ba yn pynksan ïa ngi da ka jingngeit. 25Hynrei, mynta, ba la wan kata ka jingngeit, ngim long shuh hapoh ka nonghikai. 26Namar phi baroh phi long ki khun U Blei da ka jingngeit ha U Khrist Jisu. 27Namar kat kiba na phi ïa kiba la pynbaptis ha U Khrist, phi la kup keiñ ïa U Khrist. 28#Rom. 10:12.Ym lah don u Jiw lymne u Grik, ym lah don u mraw lymne uba laitluid, ym lah don shynrang bad kynthei: namar phi baroh phi ïalong uwei ha U Khrist Jisu. 29#Rom. 4:13.Te lada phi long ki jong U Khrist, kumta te, phi long u symbai u Abraham, ki nongïoh pateng keiñ katba kum ka jingkular.

Currently Selected:

GALATIA 3: KHB

Highlight

Copy