EPHESOS 6

Ka kamram ki khun bad ki kmie ki kpa

1 # Kol. 3:20. Phi ki khun, to kohnguh ïa la ki kmie ki kpa ha U Trai: namar kane ka long kaba dei keiñ. 2#Eks. 20:12.“To burom ïa la u kpa bad ïa la ka kmie” (kaba long ka hukum ka banyngkong ba don jingkular), 3#Deu. 5:16.“ba men ïoh man bha, bad ba men ïoh im slem ha ka pyrthei.” 4#Kol. 3:21.Phi ruh ki kpa, to wat pynbitar ïa la ki khun; hynrei, to bsa pjiah ïa ki ha ka jinghikai bad ka jingsneng U Trai.

Ki shakri bad ki kynrad

5 # Kol. 3:22-25. Phi ki shakri, to kohnguh ïa kita kiba long ki kynrad jong phi katba kum ka doh, da ka jingtieng burom bad ka jingkhynñiuh, ha kaba shi syrtap ka dohnud jong phi, kumba ha U Khrist; 6ym da kaba shakri ha khmat, kum ki nongpynsngewbha ïa ki briew; hynrei, kum ki shakri U Khrist, da kaba leh ïa ka mon U Blei naduh ka mynsiem; 7da shakri da ka jingsngewbha, kum ha U Trai, te ym ha ki briew: 8ba phi tip ba ïa kaei kaei ka babha ba uei uei ruh u leh, ïa kata hi keiñ, un ïoh pdiang pat ha lade na uta U Trai, la u long u mraw lane uba laitluid. 9#Kol. 4:1; Deu. 10:17; Kol. 3:25.Phi ki kynrad ruh, to leh kumjuh ha ki, da kaba iehnoh ïa kaba byrngem: ba phi tip ba U Kynrad jong ki bad jong phi ruh u don ha bneng, bad bymdon ka jingñiew shiliang khmat bad u.

Ka jingkieng atiar U Blei baroh

10Ha kaba wai noh, to long kiba khlaiñ ha U Trai, bad ha ka bor ka jingkhlaiñ jong u. 11To kieng noh ïa ka jingkieng atiar ka jong U Blei baroh, ba phi lah ban ïeng pyrshah ïa ki buit thap u Soitan. 12Naba ka jingïaleh jong ngi kam long ïa ka snam bad ka doh, hynrei, ïa ki hima, ïa ki bor, ïa ki nongsynshar pyrthei jong kane ka jingdum, ïa ki jingbymman bakynja mynsiem ha ki jaka bneng. 13Naba kumta, to phin shim ha lade ïa kata ka jingkieng atiar U Blei baroh, ba phi lah ban ïeng ïaleh ha kata ka sngi ka basniew, bad haba la dep ïa kiei kiei baroh ban ïeng skhem. 14#Isa. 11:5; 59:17; 1 Thes. 5:8.To ïeng, phi, namar kata, ba la panpoh ïa la ka syngkai da ka jingshisha, bad ba la kieng ïa ka jingda shadem ka hok; 15#Isa. 52:7.bad ba la phong juti ha la ki kjat da ka jinglakloi ka gospel ka jingsuk; 16nalor baroh putet, phin da shim ïa ka stieh ka jingngeit, da kaba phi lah ban pynlip ïa ki sum ba-meh ding baroh ki jong u bymman. 17#Isa. 59:17.To shim ruh ïa ka jingda khlieh ka jingpynim, bad ka waitlam U Mynsiem, kaba long ka ktien U Blei keiñ: 18da kaba duwai ha la ka sngi da ka jingduwai bad ka jingkyrpad baroh ha U Mynsiem, bad da kaba sumar shaphang kane da ka jingminot bad ka jingkyrpad baroh na ka bynta ki riewkhuid baroh; 19bad na ka bynta jong nga ruh, ba yn ïoh ai ha nga ka ktien haba nga ang la ka shyntur, ïa ka ban pyntip da ka jingshlur ïa ka jingmaïan ka gospel, 20na ka bynta jong ka, ba nga long u nongkit-'tien syiem ha ki kynjri; ba ha kata ngan kren shlur, kumba ka dei ïa nga ban kren.

Ka jingwai noh

21 # Ki Kam. 20:4; Kol. 4:7-8; 2 Tim. 4:12. Hynrei, ba phi ruh phin ïoh tip ïa kiei kiei ruh shaphang jong nga, kumno nga leh, u Tukhikos, u parabangeit ba-ieit bad u nongïalap 'tien blei ïa uba lah ban shaniah ha U Trai, un pyntip ha phi ïa kiei kiei baroh: 22ïa uba nga la phah sha phi khnang ïa kane hi, ba phin ïoh tip ïa ka jinglong jong ngi, bad ba un ïoh pyntngen ïa ki dohnud jong phi.

23Long ka jingsuk ha ki parabangeit, bad ka jingieit lem bad ka jingngeit, na U Blei uba U Kpa bad na U Jisu Khrist uba U Trai. 24Ka jingaiei to kan long lem bad kita baroh kiba ïa-ieit ïa U Jisu Khrist U Trai jong ngi ha ka jingsngur. Amen.

Currently Selected:

EPHESOS 6: KHB

Highlight

Copy