3 ÏOANNIS 1

Ka jingkhublei

1 # Ki Kam. 19:29; Rom. 16:23; 1 Kor. 1:14; 2 Ïoan. 1:1. Uta u tymmen basan, ha u Gaïos uba ieit eh, ïa uba nga ieit ha kaba shisha.

2Ko hep ba-ieit, nga duwai ba ha kiei kiei baroh men roi bad ba men khiah khran, kat kumba ka roi ka mynsiem jong me. 3Namar nga la kmen shibun eh, haba ki parabangeit ki la wan bad ki la ïaphla babha shaphang kata ka jingshisha jong me, kat kumba me ïaid ha ka jingshisha. 4Ngam don ka jingkmen ba kham khraw ïa kane keiñ, ba ngan ïohsngew ba ki khun hep jong nga ki da ïaid ha ka jingshisha.

U Gaïos u ïoh ïaroh

5Ko hep ba-ieit, me leh bangeit ïa kaei kaei ruh ba me leh sha kita ki parabangeit, bad sha kita ki nongwei; 6kiba la phla babha shaphang kata ka jingieit jong me ha khmat ka balang; bad men leh bha haba me leit on lynti ïa ki ha ka rukom kaba dei biang ïa U Blei; 7namar na ka bynta kata ka kyrteng jong u ki la leit mih noh, kim da pdiang ei ei ruh em na ki Jentil. 8Namar kata, ka dei ïa ngi ban pdiang sngewbha ïa kiba kat kita, ba ngin ïoh long kiba ïatrei lem bad kata ka jingshisha.

U Diotrephis bad u Dimetrios

9Nga la thoh sha ka balang; hynrei, uta u Diotrephis, uba ieit leh san halor jong ki, um pdiang sngewbha ïa ngi. 10Namar kane, lada ngan ïoh wan, ngan pynkynmaw biang ïa kita ki jingleh jong u ïa kiba u ïai-leh, ba u da shait kren blab blab pyrshah ïa ngi da ki ktien basniew. Te haba um sngewhun da kine, um pdiang sngewbha hi ïa kita ki parabangeit, bad ïa kita kiba da kwah u adong, bad u shop noh ïa ki pynban na ka balang. 11Ko hep ba-ieit, to me wat pyrthuh bud ïa kata ka basniew, hynrei, ïa kata ka babha. Uta uba leh ïa ka babha u long na U Blei, hynrei, uta uba leh ïa ka basniew um shym la ïohi ïa U Blei. 12#Ïoan. 21:24.Ïa u Dimetrios la phla babha da ki briew baroh, bad da ka jong ka jingshisha hi: ngi hi ruh ngi ïaphla babha, bad me tip ba kata ka jingphla jong ngi ka long kaba shisha.

Ki jingkhublei

13 # 2 Ïoan. 1:12. Nga don shibun kiei kiei ruh ban thoh sha me, hynrei, ngam mon da ka sia bad u khulom ban thoh ha me; 14hynrei, nga kyrmen ban ïohi ïa me shen shen, bad ngin ïakren markhmat.

15To long ka jingsuk ha me.

Ki lok ki ïakhublei ïa me. To ai khublei ïa ki lok uwei pa uwei.

Currently Selected:

3 ÏOANNIS 1: KHB

Highlight

Copy