2 TIMOTHI 3

Ki sngi ki bakhatduh

1Hynrei, to tip ïa kane, ba ha ki sngi ki bakhatduh kin wan ki por bashitom. 2Namar ki briew kin long kiba ieit tang ïa lade, kiba ieit sbai, kiba kren sarong, kiba leh khraw, kiba kren sniew, ki bymkohnguh ïa la ki kmie ki kpa, ki bymsngewnguh, ki bymkhuid, 3kiba khlem ieit ïa la ka kynja, kiba khlem map, kiba kren siar, ki bymsuidñiew, kiba runar, ki bymieit ïa ka babha, 4ki nongdie lok, kiba hangamei, kiba leh meng, kiba ieit ïa ki jingsngewbha kham tam ban ïa kaba ki ieit ïa U Blei; 5kiba don ka dur ka jingriewblei, hynrei, kiba la len ïa ka bor jong ka; na kine ruh to phai noh. 6Namar na jong kine long kita kiba par sian sha ki ïing, bad kiba ïalam mraw ïa ki kynthei babieit ba la pynkit khia da ki pop, ba la ïalam noh da ki bun jaid ki jingkwah sat, 7kiba ju ïoh hikai ha la ka sngi, bad kim ju lah ban poi sha ka jingtip ïa ka jingshisha. 8#Eks. 7:11.Bad kumba u Jannis bad u Jambris ki la ïeng ïaleh pyrshah ïa u Moses, kumta, kine ruh ki ïeng ïaleh pyrshah ïa ka jingshisha; ki briew ba la pynpyut ha ki jingmut, kiba la kyntait shaphang kata ka jingngeit. 9Hynrei, kin ym ïaid jngai shuh; namar kata ka jingbieit jong ki kan paw ha ki briew baroh, kumba ka jong kita ruh ka la long.

Ka jingsneng kyntu ïa u Timothi

10Hynrei, ma me, me la bud ïa ka jinghikai, ka jinglong jingim, ka jingthmu, ka jingngeit, ka jingshahslem, ka jingieit, ka jingïaishah, 11#Ki Kam. 13:14-52; 14:1-20; 16:1-5.ki jingshah behbeiñ, ki jingshahshitom jong nga; kiba katno ki la jia ha nga ha Antiok, ha Ikoniom, ha Lystra; ïa kiba katno ki jingbehbeiñ nga la shah: hynrei, na ki baroh U Trai u la pyllait ïa nga. 12Bad baroh kiba mon ban im riewblei ha U Khrist Jisu kin shah lehbeiñ. 13Hynrei, ki briew basniew bad ki nongshukor kin nang sniew nang sniew, ki da shukor bad shah shukor. 14Hynrei, ma me, to ïaineh ha kita kiei kiei ruh ïa kiba me la nang, bad ha kiba la pynngeit skhem ïa me, da kaba tip nano me la nang ïa ki; 15bad ba na myndang khunlung me la tip ïa kita Ki Jingthoh Bakhuid, kiba lah ban pynstad ïa me sha ka jingpynim da ka jingngeit kaba ha U Khrist Jisu. 16Ka Jingthoh baroh ka long kaba la pyrsad mynsiem da U Blei, bad kaba myntoi ïa ka jinghikai, ïa ka jingsneng, ïa ka jingpynbeit, ïa ka jingpynmlien kaba ha ka hok: 17khnang ba u briew jong U Blei un ïoh long janai, haba la pyndap biang ïa u sha ka jingleh babha baroh.

Currently Selected:

2 TIMOTHI 3: KHB

Highlight

Copy