2 KORINTH 12

Ki jingithuhpaw u Paul bad ki jingpynpaw

1Shisha ka dei ïa nga ban leh thaw burom la kam myntoi; hynrei, ngan wan sha ki jingithuhpaw bad ki jingpynpaw U Trai. 2Nga ithuh ïa u briew ha U Khrist palat khatsaw snem mynta, la u don ha ka met, ngam tip, ne ym ha ka met, ngam tip, U Blei u tip; ïa uta la rong noh haduh ka balai ka bneng. 3Te nga ithuh ïa uta u briew, la ha ka met, ne ym ha ka met, ngam tip, U Blei u tip; 4#Luk. 23:43.ba la rong noh ïa u haduh paradais, bad u la ïohsngew ki ktien bym lah ïathuh, ïa ki bymdei ïa u briew ban ïathuh. 5Shaphang uba kat uta ngan leh thaw burom; hynrei, shaphang ïa lade hi ngan ym leh thaw burom, lymda ha kita ki jingtlot jong nga. 6Namar lada nga mon ban leh thaw burom, ngan ym long u babieit; namar ngan kren ïa kaba shisha keiñ; hynrei, nga ieh, ïoh ba uno uno ruh un ñiew ïa nga tam ïa kaba u ïohi ïa nga, lane ïa kaba u ïohsngew na nga. 7#Job. 2:6.Hynrei, khnang ba ngan ym sngewkhraw palat eh namar ka jingkhraw kor tam eh kita ki jingpynpaw, la buh ha nga ïa u shiah ha ka doh, ka jingphah u Soitan ban ïoh pynshitom ïa nga, khnang ba ngan ym sngewkhraw palat eh keiñ. 8Shaphang une, nga la kyrpad lai sien ïa U Trai, ba yn pynkynriah noh ïa u na nga. 9Te u la ong ha nga, “Ka jingaiei jong nga ka dap biang ïa me; namar la pynjanai ïa ka bor jong nga ha ka jingtlot.” Da kaba kmen eh, namar kata, ngan kham leh thaw burom ha kita ki jingtlot jong nga, khnang ba ka bor U Khrist kan ïoh shong sah ha nga. 10#Rom. 5:3; 2 Kor. 6:4-5.Naba kumta, nga sngewbha ha ki jingtlot, ha ki jinglehbeiñ, ha ki jingkyrduh, ha ki jingbehbeiñ, ha ki jingshipa, na ka bynta U Khrist; namar haba nga sngewtlot, hangta nga long u bakhlaiñ.

Ka jingsngewsahnud u Paul ïa ki nong Korinth

11 # 2 Kor. 11:5. Nga la jia long u babieit; phi la ïa-pynleh ma phi ïa nga: namar nga la dei ban ïoh ïaroh na phi, namar ngam shym la duna ei ei ruh em ïa kita ki apostol kiba kongsan tam, la ngam long ei ei ruh em. 12Shisha ïa ki dak u apostol la pyntrei hapdeng jong phi ha ka jingshah baroh, ha ki dak bad ki jingphylla, bad ki jingleh badonbor. 13#2 Kor. 11:7.Namar ha kaei phi la kham duna ïa kita kiwei ki balang, lymda long ba nga hi ngam shym la ban khia ïa phi? to phin map ïa nga ïa kane ka jingleh bymdei.

14Ha khmih, kane ka balai sien nga la kloi ban wan ha phi; bad ngan ym ban khia ruh ïa phi; namar ngam wad ïa kiei kiei ki jong phi, hynrei, ïa phi: namar kam dei ïa ki khun ban kynshew na ka bynta ki kmie ki kpa, hynrei, ki kmie ki kpa na ka bynta ki khun. 15Hynrei, ma nga, da kaba kmen eh ngan pynlut bad ngan pynlut noh khoit ïa lade na ka bynta ki mynsiem jong phi; la ka long ba katba nga nang ieit ïa phi, pynban, ïa nga yn nang ieit duna. 16#2 Kor. 11:9.Hynrei, to ai kan long kumta; nga ngam shym la ban khia ïa phi, hynrei, ba nga long uba sianti, nga la kem ïa phi da ka jingshukor. 17Hato nga la myntoi bymdei na phi dano dano ruh na kita ïa kiba nga la phah ha phi? 18#2 Kor. 2:13; 8:18.Nga la kyrpad ïa u Titos ban leit, bad ryngkat bad u, nga la phah ïa uta u parabangeit. Hato u Titos u la myntoi ei ei na phi? hato ngim shym la ïaid ha kajuh ka mynsiem? hato ngim shym la ïaid ruh ha kijuh ki jingjam?

19Phi mut pat ba ngi ïasaid ksan ïa lade ha phi? ha khmat U Blei, ha U Khrist ngi kren keiñ; hynrei, kiei kiei baroh, ko hep ba-ieit, ki long ïa ka ban tei ïa phi. 20#2 Kor. 2:1-4; 1 Kor. 1:11; 3:3.Namar nga sheptieng, ïoh ba haba nga wan, ngan ym shem ïa phi kum kiba nga mon, bad phi ruh phin shem ïa nga kum uba phim mon; ïoh ba don ki jingïania, ki jingpihuiñ, ki jingbitar, ki jingïapyneh, ki jingkren siar, ki jingkren siar pasiaw, ki jingïaleh meng, ki jingïakhihwin; 21ïoh haba nga wan pat, U Blei jong nga un pynsngewbuhkhoh ïa nga hapdeng jong phi, bad ba ngan leh sngewsih namar shibun na kita kiba la leh pop baroh shi katta, bad ki bym shym la kylla-ka-bamut shaphang kata ka jingbymkhuid, bad kaba klim awria, bad kaba nuti jakhlia ïa kiba ki la leh.

Currently Selected:

2 KORINTH 12: KHB

Highlight

Copy