1 KORINTH 14

Shuh shuh shaphang ki jingai U Mynsiem

1To ïabeh phi sha kane ka jingieit; la kumta ruh, to da kwah hir hir ruh ïa kita ki jingai bakynja mynsiem, hynrei, kham tam ba phin ïoh ïathuhlypa. 2Namar uta uba kren da ka thylliej bymtip, um kren ha ki briew, hynrei, ha U Blei keiñ; namar ym don uwei uba sngewthuh; hynrei, ha U Mynsiem u kren ïa ki jingmaïan. 3Hynrei, uta uba ïathuhlypa, u kren ha ki briew ïa ka ban tei, bad ïa ka ban pyntngen, bad ïa ka ban hikai ruh. 4Uta uba kren da ka thylliej bymtip, u tei ïa lade; hynrei, uta uba ïathuhlypa, u tei ïa ka balang keiñ. 5Toi nga kwah shisha ba phi baroh phin kren da ki thylliej bymtip, hynrei, kham tam ba phin ïathuhlypa; namar uta uba ïathuhlypa, u long uba kham kor ban ïa uta uba kren da ki thylliej bymtip, lymda u batai noh ba ka balang kan ïoh pdiang ka jinghikai.

6Te kumta, ko parabangeit, lada nga wan ha phi da kaba kren da ki thylliej bymtip, hato ngan pynmyntoi aïu ïa phi, lymda nga kren ha phi da ka jingpynpaw, lane da ka jingtip, lane da ka jingïathuhlypa, lane da ka jinghikai? 7Wat kiei kiei kiba khlem mynsiem kiba ai jingsawa, kum ka jingput lane ka duitara, lymda ki pynpher ïa kita ki jingsawa, hato kumno yn ïoh pyntip ïa kaei ba la put lane kaei ba la tem? 8Namar lada ka ronsing ruh ka ai jingsawa ka bymthikna, hato uei u ban leit khreh ïa lade ïa ka thma? 9Kumjuh ruh, ma phi, lymda phi kren da ka thylliej ïa ka jingkren kaba lah ban sngewthuh bha, kumno yn ïoh sngewthuh ïa kata ba la kren? namar phin long kiba shu kren ha ka suiñ. 10Don lehse katta ki jaid ki ktien ha ka pyrthei, hynrei, pynban, ym don kaba khlem jingmut. 11Namar kata, lada ngam sngewthuh shuh ïa ka jingmut kata ka ktien, ngan long nongwei ha uta uba kren, bad uta uba kren un long nongwei ha nga. 12Kumta te, ma phi ruh; haba phi long kiba kwah hir hir ïa ki jingai bakynja mynsiem, to da wad khnang ba phin kham nang ban tei ïa ka balang.

13Naba kumta, to ai ba uta uba kren da ka thylliej bymtip un duwai ba un nang ban batai. 14Namar lada nga duwai da ka thylliej bymtip, ka mynsiem jong nga ka duwai; hynrei, ka jingshemphang jong nga ka long kaba khlem sei soh keiñ. 15#Eph. 5:19; Kol. 3:16.Te yn sa leh kumno? ngan duwai da ka mynsiem, bad ngan duwai da ka jingshemphang ruh; ngan rwai da ka mynsiem, bad ngan rwai da ka jingshemphang ruh. 16#1 Khrn. 16:36; Salm. 106:48; Mat. 15:36.Lym kumta, haba men nguh da ka mynsiem, hato kumno uta uba ïeng ha ka jaka u bymnang un ong “Amen” ha kata ka jingainguh jong me, haba um tip ïa kaei ba me ong? 17Namar ma me shisha me nguh bha, hynrei, ym shym ïoh tei ïa uta uwei. 18Nga nguh ïa U Blei jong nga, ba nga kren da ki thylliej kham bun ban ïa phi baroh; 19hynrei, ha ka balang nga kham sngewbha ban kren san kyntien da ka jingsngewthuh jong nga, ba ngan dup hikai ïa kiwei ruh, ban ïa ki shiphew hajar kyntien ha ka thylliej bymtip.

20 # Eph. 4:14. Ko parabangeit, to wat long khynnah ha ka jingshemphang; hynrei, ha ka jingbymman, to long khunlung; te ha ka jingshemphang, to long rangbah. 21#Isa. 28:11-12.La thoh ha Ka Hukum: “Da ki briew kiba kren nongwei bad da ki rmiang shyntur ki nongwei ngan kren ha une u paidlang; hynrei, la katta ruh, kin ym ïashahshkor ïa nga,” ong U Trai. 22Naba kumta, ki thylliej ki long ka dak, ym ha kita kiba ngeit, hynrei, ha kita ki bymngeit; hynrei, ka jingïathuhlypa kam long ïa kita ki bymngeit, hynrei, ïa kita kiba ngeit. 23Naba kumta, lada ka balang baroh kawei ka wan ïaseng lang ha kajuh ka jaka, bad baroh ki da kren da ki thylliej bymtip, bad ki da wan hapoh ruh ki bymnang ne ki bymngeit, kin ym ong ba phi la ïalamwir noh? 24Hynrei, lada baroh ki da ïathuhlypa, bad u da wan hapoh ruh uno uno ruh u bymngeit, lane u bymnang, la pynkynduh ïa u da baroh, la bishar ïa u da baroh; 25kumta te, la pynpaw ïa kiei kiei ruh kiba rieh ka dohnud jong u; kumta ruh, da kaba dem khrup un mane ïa U Blei, u da phla ba U Blei u long da shisha hapdeng jong phi.

Ka jinghikai ban leh ryntih ha kiei kiei baroh

26 # Eph. 5:19. Ka long kumno te, ko parabangeit? haba phi ïaseng, uwei pa uwei na phi u don ka salm, u don ka jinghikai, u don ka thylliej, u don ka jingpynpaw, u don ka jingbatai. To leh ïa kiei kiei baroh ïa ka ban ïatei. 27Lada uno uno ruh u kren da ka thylliej bymtip, to ai ba kan long tang da ar ngut, ne lada don eh ruh, lai ngut, bad kata ruh markylliang; to ai ruh ba uwei un batai. 28Hynrei, lada ym don u nongbatai, to uta un sngap jar noh ha ka balang; bad to un kren tang ha lade hi bad ha U Blei. 29Hynrei, to ai ba ar ngut ne lai ngut ki nongïathuhlypa kin kren, bad to ai ruh ba kita kiwei kin ïabishar. 30Hynrei, lada la pynpaw ei ei ha uwei pat uba shong hajan, to ai ba uta u banyngkong un sngap jar. 31Namar phi lah baroh keiñ ban ïathuhlypa uwei pa uwei, khnang ba baroh kin ïoh nang, bad ba yn ïoh pyntngen ïa ki baroh; 32namar ki mynsiem ki nongïathuhlypa ki long hapoh ka bor ki nongïathuhlypa, 33namar U Blei um long U Blei ka jingkhihwin, hynrei, ka jingsuk keiñ; kumba ha kita ki balang ki riewkhuid baroh. 34#1 Tim. 2:11-12; 1 Pet. 3:1.To ai ba ki kynthei jong phi kin sngap jar ha ki balang; namar ym shym shah ïa ki ban kren; hynrei, ban pynhapoh ïa lade, kumba ka hukum ruh ka ong. 35Hynrei, lada ki kwah ban nang ei ei, kin ïakylli ha ki tnga jong ki ha la ïing; namar ka long kaba khlem akor keiñ ïa ki kynthei ban kren ha ka balang. 36Hato na phi la mih noh ka ktien U Blei? ne ka la poi tang ha phi?

37Lada uno uno ruh u mut ba u long u nongïathuhlypa lane uba don ki jingai bakynja mynsiem, to un kohnguh ba kita kiei kiei ruh ïa kiba nga thoh ha phi ki long ki hukum U Trai. 38Hynrei, lada uno uno ruh u long u bymtip, to ai ba un sah u bymtip. 39Naba kumta, ko parabangeit, to da kwah hir hir phi, ïa ka ban ïathuhlypa, hynrei, wat adong ïa ka ban kren da ki thylliej bymtip. 40Hynrei, to ai ba yn leh itynnad bad ha ka jingryntih ïa kiei kiei baroh.

Currently Selected:

1 KORINTH 14: KHB

Highlight

Copy