YOHANA 8
8
Omukhasi owanyoolwa naheyanga
1Mana Yesu natsia khushikulu shia Miseituni. 2Mumabwibwi inyanga yalondakhwo, yenjila muhekalu. Mana abandu boosi nibamwitsila naye niyekhala nabeechesia. 3Abahandichi bamalako nende Abafarisayo nibareera omukhasi owali nanyolelesiibwe naheyanga, ne nibamusiinjisia hakari wabwe. 4Nibaboolela Yesu bari, “Omwechesia, omukhasi uno anyolelesiibwe naheyanga. 5#Abal. 20:10; Okhuk. 22:22-24Ne mumalako kefwe Musa yakhulaka mbu, omukhasi shinga uno alaswe namachina mana afwe. Nawe oboolakhwo shiina khuye?” 6Baboola amakhuwa ako khulwa okhuteema Yesu kho mbu, banyoole eshiisichirasio shiokhumwinjilila itookho. Nebutswa naye yenama butswa, nahandika hasi nende olwalalwe. 7#Sus. 1:34Ne olwa batsiililila okhumureeba amareebo, yachinguukha ne nababoolela ari, “Omundu yesi yesi khwinywe oushili okhukholakhwo eshionoono shiosi shiosi aranjilile okhumulasa lichina.” 8Ne namala niyenama khandi nachaaka okhuhandika hasi. 9Nabo olwa bahulila amakhuwa ako, barulaho mulala mulala, okhuchaachila khubali abakofu. Mana Yesu natong'aho yenyene nende omukhasi oyo nashisinjiileho. 10Yesu nachinguukha ikulu, ne nareeba omukhasi oyo ari, “Bali hena? Shialikhwoho outonyile okhukhukhalachila eshiina ta?” 11Naye nakalusia ari, “Abulaho outonyile tawe, Omwami.” Mana Yesu naboola ari, “Nobulayi, kho kata khandi siesi shikhukhalachila eshiina ta. Otsie, ne okhurula olwa leelo, olonoonakhwo khandi tawe.”]#8:11 Amahandiko amanji akakhale shikali nende eshitonye shia 7:53-8:11 shino tawe, ne akandi kashiloosia khu Yoh. 21:24 noho khu Luka 21:38; khu Yoh. 7:36.
Yesu niye obulafu bweshialo
12 #
Obuch. 7:26; Mat. 5:14; Yoh. 9:5 Yesu naboolela Abafarisayo khandi ari, “Isie nisie obulafu bweshialo. Omundu yesi yesi ounondakhwo, alaba nobulafu bwobulamu bweinziayo, ne shialachendakhwo khandi mushiilima tawe.”
13 #
Yoh. 5:31
Abafarisayo nibamuboolela bari, “Bulano wirumbulilanga omwene akobulolibwo. Obulolibwo nobwa butswa.”
14Yesu nakalusia naboola ari, “Tawe, kata nindiirumbulila omwene akobuloli bwanje, obuloli bwanje nobwatoto. Okhuba, emanyile ewa ndarula khandi kata ewa enzia. Inywe shimumanyile ewa ndarula kata ewa enzia tawe. 15Inywe mukhalachilanga omundu eshiina munjila shinga abandu nabandu butswa, isie nasi shikhalachilanga omundu yesi yesi eshiina tawe. 16Ne kata nimba nekhalaka eshiina, obukhalachi bwanje bunyala okhuba obwatieli, shichila shiendimwo sienyene ta, habula Papa owaruma ali halala ninasi. 17#Okhuk. 19:15Toto mumalako kenywe kahandikwa mbu, obuloli bwabandu babili nobwatoto. 18Kho isie Omwene ndirumbulilanga akobuloli bwanje, naye Papa owaruma, arumbulanga obuloli obwo khulwanje.”
19Kho nibamureeba bari, “Papawo mwene ali hena?” Yesu nabakalusia naboola ari, “Inywe shimumanyile isie kata Papa wanje ta. Nimuba nimwakhaamanyile isie, mwakhamumanyile kata Papa yesi.” 20Yesu yaboola amakhuwa ako koosi, olwa yali niyechesinjia muhekalu, nali ahambi ahamasanduku kebihaanwa kali nikareerwe. Ne abulaho owamutiilakhwo, shichila ebisebie biali nibishili okhuula.
Inywe shimunyala okhutsia ewa isie enzia ta
21Kho Yesu nababoolela khandi ari, “Isie enzia, ne namuukhaabe, nebutswa namufwile butswa mubwonooni bwenywe. Inywe shimunyala okhutsia ewa isie enzitsa tawe.”
22Kho abemilisi aba Abayahudi nibaboola bari, “Aboolanga mbu, shikhunyala okhutsia ewa atsia ta. Kanyala okhuba mbu, omwene aleyira noho?”
23Naye Yesu nakalusia naboola ari, “Inywe murula hasi hano, nasi isie ndarula ikulu. Inywe muli abomushialo muno, nebutswa isie shindi owomushialo muno tawe. 24Niko akachila nemuboolela inywe mbu, mulafwila butswa mubwonooni bwenywe. Nebutswa nimuba nimulasuubila mbu, ‘Isie Nisie,’ ta, mulafwila mubwonooni bwenywe.”
25Nibamureeba bari, “Niwe wina?”
Yesu nabakalusia naboola ari, “Kano niko akemubooleele okhurula mukhuchaaka khwene. 26Endi nende amakhuwa amanji akokhumuboolela, khandi akokhumukhalachila. Owaruma nowobwatoto, nasi erumbulilanga abomushialo aka ndahulila okhurula khuye.”
27Shibamanyilisia mbu, Yesu yababoolelanga amakhuwa khu Papawe tawe. 28Kho yamala nababoolela ari, “Olwa muchinguula Omwana womundu khumusalaba, nolwa mulamanya mbu, ‘Isie Nisie,’ khandi nolwa mulamanya mbu, shiekholanga likhuwa liosi liosi khulwanje ta, habula emboolanga aka Papa yanzechesia okhuboola konyene. 29Naye owaruma ali halala ninasi, shiyayandekha sienyene ta, shichila buli lwosi ekholanga akamuchamisia.”
30Olwa abandu abanji abahulila Yesu naboola amakhuwa ako, bamusuubila.
Obwatoto bulamukhola okhuba abalekhuule
31Yesu naboolela Abayahudi abali nibasuubile muye ari, “Nimuba nimulonda amechesio kanje, mulaba abeechi banje abatieli, 32mulamanya obwatoto, ne obwatoto obwo bulamukhola okhuba abalekhuule.”
33 #
Mat. 3:9; Luka 3:8 Nabo nibamukalusia bari, “Ifwe khuli olwibulo lwa Aburahamu, ne khushili okhubaakhwo abasumba khumundu yesi yesi ta. Kho nawe oboolanga orie mbu, ‘Mulakholwa abalekhuule?’ ”
34Yesu nababoolela ari, “Emuboolela toto mbu, omundu yesi yesi oukholanga obwonooni, nomukhalabani wobwonooni. 35Omusumba shiamenyanga mungo omwa omwamiwe tsinyanga tsiosi tawe. Nebutswa omwana omwibule amenyanga mungo mwabwe tsinyanga tsiosi. 36Kho Omwana naba namukhola inywe okhuba abalekhuule, kho mulaba abalekhuule toto. 37Emanyile mbu, muli toto abolwibulo lwa Aburahamu, nebutswa mukhaabanga okhunzira, shichila shimufuchililanga amechesio kanje tawe. 38Emboolanga aka Papa yamanyia, inywe nenywe mukholanga aka mwahulila okhurula khu senywe.”
39Nabo nibamukalusia nibaboola bari, “Sefwe niye Aburahamu.” Yesu nabakalusia ari, “Nimwakhabeele toto abaana ba Aburahamu, mwakhakholile aka Aburahamu yakhola. 40Isie ndamubooleele akatoto aka ndahulila okhurula khu Nyasaye, ne kata kario inywe mukhaabanga okhunzira. Aburahamu shiyakholakhwo amakhuwa shinga ako tawe. 41Inywe mukholanga aka senywe yakhola.”
Nibamukalusia bari, “Nyasaye niye Sefwe owakhuli ninaye yenyene, nefu nifwe abaanabe batoto.”
42Yesu nababoolela ari, “Nyasaye alaba mbu, niye Senywe toto, khane mwakhaaheelile isie, shichila ndarula khu Nyasaye, ne bulano endi hano. Ne shindayetsa khulwanje ta, habula Nyasaye niye owaruma isie. 43Ne mbushiina nimulamanyilisia akemboolanga kano ta? Eshifune shili mbu, shimwenyanga okhuhulila amakhuwa kanje tawe. 44#Obuch. 1:13; 2:24Inywe muli abaana ba senywe, ouli Setani, ne mwenyanga okhukhola akobwikombi bwa senywe. Okhurula khubuchachilo bwene, Setani yalinji omwiri, ne kata ashili okhubakhwo owobwatoto ta, shichila obwatoto shibuli muye tawe. Ne naboola akobubeeyi, abetsanga naboolanga butswa akeimeloye, okhuba nomubeeyi khandi niye samwana obubeeyi. 45Nebutswa isie, emuboolelanga obwatoto, niko akachila nimulaasuubila isie tawe. 46Niwiina khwinywe ounyala okhulolesia mbu, endi neshikha shiobwonooni? Nemba nemboolanga obwatoto, eshichila nimulaasuubila ta nishiina? 47Ourula khu Nyasaye ahulilanga amakhuwa ka Nyasaye. Ne kata kario, inywe shimurula khu Nyasaye ta, niko akachilanga nimulanyala okhuhulila tawe.”
Yesu yaliho Aburahamu nashili okhubaho
48Abayahudi nibareeba Yesu bari, “Shikhubeele habwene olwa khuboolile mbu, iwe oli Omusamaria, khandi mbu, eshishieno shili mwiwe?”
49Yesu nabakalusia naboola ari, “Isie shiendi neshishieno ta. Ehelesinjia Papa wanje oluyali, nenywe shimumbelesinjia isie oluyali tawe. 50Nasi shiekhaabanga oluyali lwanje omwene ta, habula aliho oulukhaabanga, khandi niye oukhalakanga eshiina shianje niyangoboshela. 51Emuboolela toto mbu, Omundu yesi yesi oulonda amakhuwa kanje, shialifwa kata nahatuutu ta.”
52Abayahudi abo nibamuboolela bari, “Bulano khwakhamanyila elala mbu, eshishieno shili mwiwe! Aburahamu yafwa, khandi abalakusi bosi bafwa, nebutswa iwe nawe oboolanga mbu, omundu yesi yesi oulonda amechesioko, shialifwa kata nahatuutu tawe. 53Aburahamu, ouli kuuka wefwe yafwa, kho nawe oli omukhongo okhushila Aburahamu noho? Khandi abalakusi boosi bafwa. Kho nawe wikholanga mbu, oli wina?”
54Yesu nabakalusia naboola ari, “Nimba nindakhehelesia isie omwene oluyali, kho oluyali lwanje olwo luba niluli olwa butswa. Oumbelesinjia oluyali ni Papa, ne niye owatsana owamuboolanga mbu, niye Nyasaye wenywe. 55Inywe shimwamumanya ta, nebutswa isie emumanyile. Ne nimba nimboola mbu, shiemumanyile ta, emba nendi butswa omubeeyi shinga olwa inywe muli ababeeyi. Nebutswa isie emumanyile ye, khandi ekholanga aka yenya. 56Aburahamu, ouli kuuka wenywe yekhoya niyenyanga mbu alolekhwo inyanga yokhwitsa khwanje. Yamala nachilola ne nasangaala.” 57Mana nibamuboolela bari, “Iwe oshili kata okhuusia emiyika amakhumi karano ta, wakhaba toto niwalola Aburahamu?”
58Yesu nakalusia naboola ari, “Emuboolela toto mbu, Aburahamu nashili okhwibulwa, Isie ndaliho.”
59Kho nibukula amachina mbu, bamulase, nebutswa Yesu yebisa ne narula muhekalu natsia.
Currently Selected:
YOHANA 8: OLUDC
Highlight
Share
Copy
Want to have your highlights saved across all your devices? Sign up or sign in
