YOHANA 19

1Mana Pilato nalaka mbu, Yesu anywekhwe netsikhoba. 2Nabo abelihe nibalukha olusimbi lwamahwa, nibamufwala khumurwe. Khandi nibamufwala ikanzu yobukondo bweisambarau. 3Kho nibetsa ewa yali nibaboola bari, “Oyindile, iwe omuruchi wa Abayahudi!” Ne nibamupaama tsikhofi.

4Pilato nakalukha elwanyi khandi, ne naboolela abomukanda ari, “Lole, ndalamureera elwanyi khwinywe kho mumanye mbu, shienyoolilekhwo eshikha shiosi shiosi muye tawe.” 5Mana Yesu narusibwa elwanyi, nafwalilwe olusimbi lwamahwa nende ikanzu yobukondo bweisambarau. Pilato nababoolela ari, “Lole, omundu tsana ngwouno!”

6Ne olwa abesaaliisi abakhulundu nende abalindi bomuhekalu bamulola, bayiiba obutinyu nibaboola bari, “Omubambe! Omubambe!”

Naye Pilato nababoolela ari, “Inywe mumubukule mumubambe, okhuba isie shienyoolilekhwo eshikha shiosi shiosi muye tawe.”

7Abayahudi nibamukalusia nibaboola bari, “Ifwe khuli nelilako, ne okhulondana nelilako elo, akhoyile okhufwa, shichila yelanganga mbu, Omwana wa Nyasaye.”

8Ne olwa Pilato yahulila amakhuwa ako, yatiilwa noburi obunji. 9Nakalukha itookho, ne nareeba Yesu ari, “Iwe orulanga hena?”

Nebutswa Yesu shiyakalusiakhwo likhuwa liosi liosi tawe. 10Mana Pilato namureeba ari, “Shioboolakhwo ninasi ta? Shiomanyile mbu, isie endi nobunyali bwokhukhulekhuula nende bwokhukhuhaana mbu, obambwe ta?”

11 # Obuch. 6:3 Yesu namukalusia naboola ari, “Iwe shiwakhabeelekhwo nobunyali khwisie nolakhabunyoolile okhurula khu Nyasaye tawe. Khulweshio ouhaanile isie khwiwe niye ouli nobwonooni obunji okhushila iwe.”

12Olwa Pilato yahulila ako, yateema okhukhaaba shinga olwa anyala okhulekhuula Yesu, nebutswa Abayahudi balaanjilisia nomwoyo omukhongo nibaboola bari, “Noba nolekhuula omundu uno, shioba noli omwitsa wa omuruchi wa Roma tawe! Omundu yesi yesi owikhola omwene okhuba omuruchi, afukula omuruchi wa Roma.”

13Olwa Pilato yahulila amakhuwa ako, yabukula Yesu namurusia elwanyi, ne niyekhala khushifumbi shiobukhalachi bweshiina, habundu ahalangwa mbu, “Olwanyi olwaalwa namachina.” Muluheburania mbu, “Gabatsa.” 14Yali ahambi khu isaa yakhasasaba, yeshiteere, khunyanga yokhwirecheshela lisabo lia Pasaka. Pilato naboolela abandu abo ari, “Omuruchi wenywe ngwouno!”

15Nabo nibayiiba nomwoyo omukhongo khandi bari, “Mwire! Mwire! Mubambe!”

Pilato nabareeba ari, “Mwenya mbu, isie ebambe omuruchi wenywe?”

Abesaaliisi abakhulundu nibakalusia nibaboola bari, “Omuruchi wefwe ni owa Roma yenyene!”

16Mana Pilato nahaana Yesu khubo mbu abambwe.

Yesu abambwa khumusalaba

(Mat. 27:32-44; Mrk. 15:21-32; Luka 23:26-43)

Kho nibabukula Yesu, nibatsia ninaye. 17Mana Yesu narula elwanyi welitookho, nachinjile omusalabakwe. Ne niyoola habundu ahalangwa mbu, “Eshihanganga,” Muluheburania ahalangwa mbu, “Goligotsa.” 18Mana nibamubambilaho. Khandi nibabamba abandu bandi babili, mulala khumukhono musaatsa kwa Yesu, naye oundi khumukhonokwe mukhasi, Yesu naba hakari wabwe. 19Pilato nalaka mbu, Amahandiko kahandikwe kareebwe hekulu khumusalaba kwa Yesu akaboola kari, “Yesu owa Nazareti, Omuruchi wa Abayahudi.” 20Abayahudi abanji bakasooma, shichila habundu aha Yesu yabambilwa yaho hali ahambi nelitookho. Amahandiko ako kahandikwa muluheburania, mululatini nende mulugiriki. 21Abesaaliisi abakhulundu nibaboolela Pilato bari, “Shiolahandika mbu, ‘Omuruchi wa Abayahudi’ ta, habula ohandiche mbu, ‘Omundu uno yaboola mbu, niye omuruchi wa Abayahudi.’ ”

22Pilato nabakalusia naboola ari, “Akemalile okhuhandika kalatong'a butswa kario.”

23Olwa abelihe bali nibabambile Yesu, babukula ebifwalobie nibabikabulamwo ebitonye bine, buli omusikari naheebwa eshitonye shilala. Khandi nibabukula ikanzuye eyali niyalukhwa bulukhwa yoosi okhurula ikulu okhuula hasi. 24#Tsits. 22:18Abelihe nibaboola abeene khubeene bari, “Shikhulachirandula ta, leshe khukhupe ikha okhumanya mbu, ouchibukula niwiina.” Ako kekholekha kho mbu, Amahandiko koosilibwe elala, akaboola mbu,

“Bakabana ebifwalo bianje,

khandi nibakhupa ikha khulwa ikanzu yanje.”

Ne niko akabelihe abo bakhola.

25Ne abali nibasinjiile ahambi nende omusalaba kwa Yesu, bali nyinamwana Yesu, omukhaana wabwe nyina Yesu, Mariamu omukhasi wa Kiliopa nende Mariamu Magadalene. 26Olwa Yesu yalola nyinamwana nende omwechiwe wa yaheela nibasinjiileho, yaboolela nyinamwana ari, “Lola, omwanawo ngwoyu.”

27Mana naboolela omwechi oyo ari, “Lola, mamawo ngwoyu.” Ne okhurula olwo, omwechi oyo yabukula Mariamu natsia ninaye ingowe, ne namenyayo ninaye.

Okhufwa khwa Yesu

(Mat. 27:45-56; Mrk. 15:33-41; Luka 23:44-49)

28 # Tsits. 69:21; 22:15 Yesu yali namanyile mbu, bulano amakhuwa koosi kahwele. Ne khulwa okhuusia Amahandiko, yaboola ari, “Endi nobuloho.”

29Ibakuuli yali niyirenjekhweho niyitsule idivai eyiranyile. Mana nibenikha mu idivai eyo eshiangwe, nibara khwikata, ne nibashira khumunwakwe. 30Olwa Yesu yanywa idivai eyo, yaboola ari, “Kahwele!” Mana niyenamia omurwekwe hasi, ne nafwa.

Yesu afumirwa mumbafu

31Mana abemilisi ba Abayahudi nibareeba Pilato mbu abafuchilile okhufunaka ebilenje biabandu abali nibabambilwe, mana beshie emibili echio okhurula khumisaalaba. Bareeba ako shichila mbu yali inyanga eyokhwirecheshela lisabo lia Pasaka, ne shibayenya mbu emibili echio chibe khumusalaba khunyanga ya Isabato tawe. Okhuba inyanga ya Isabato eyo yali inyanga indakatifu muno. 32Kho abelihe nibatsia nibafunaka ebilenje biomundu wambeli nende oundi oyo, abali nibabambilwe halala nende Yesu. 33Nebutswa olwa boola khu Yesu, nibanyoola mbu, amalile okhufwa. Kho shibafunaka ebilenjebie tawe. 34Nebutswa mulala khubelihe abo yafumira Yesu lifumo mumbafu, mana amatsayi nende amaatsi nibirulamwo. 35(Owalola ako nikekholekha, niye ouboolile obuloli obwo kho mbu, mwesi musuubile. Obulolibwe nobwa habwene, khandi amanyile mbu, aboolanga akatoto.) 36#Okhur. 12:46; Obub. 9:12; Tsits. 34:20Ako kekholekha kho mbu, Amahandiko koosibwe akaboolanga mbu, “Libulaho kata elala khumakumbake elilifunakwa tawe.” 37#Zak. 12:10; Obufw. 1:7Khandi Amahandiko kandi kaliho akaboolanga mbu, “Abandu balihenga khu owabafumiire.”

Yesu ayabilwa

(Mat. 27:57-61; Mrk. 15:42-47; Luka 23:50-56)

38Olunyuma lwako, Yosefu owomwitaala lia Arimatsaya, yareeba Pilato mbu, amufuchilile abukule omubili kwa Yesu. Yosefu oyo, yali omuloondi wa Yesu, nebutswa wamabiswi, shichila yaritsanga abemilisi ba Abayahudi. Pilato namufuchilila okhubukula omubili okwo, mana Yosefu natsia nakubukula. 39#Yoh. 3:1,2Nikodemo, owali niyatsia mushilo okhulola Yesu, yetsa nende Yosefu. Naye Nikodemo yali nachinjile emisaala chieshing'ari echihela hambi tsikilo amakhumi kataru, nichitsokaasibwe nende manemane nende amalesi kandi. 40Babili abo bakula omubili kwa Yesu, nibakuboha musanda yeikitani, mana nibakukaasia nende emisaala chieshing'ari echio okhulondana nende eshiima shia Abayahudi, khulwa okhukuyabila. 41Ahambi nende aha Yesu yali nabambiilwe aho, omukunda kwaliho okwalimwo ing'ani imbia, yomundu yesi yesi yali nashili okhuyabilwamwo. 42Ne khulwa okhuba yali inyanga ya Abayahudi okhwirechekha khulwa Isabato, khandi ing'ani eyo yali ahambi, bayabilamwo omubili kwa Yesu.

Currently Selected:

YOHANA 19: OLUDC

Highlight

Copy