OBUCHACHILO 48
48
Yakobo alaamila Efuraimu nende Manase ikhabi
1Olunyuma lwamakhuwa ako, Yosefu yaboolelwa ari; “Papawo akhayilwe.” Kho Yosefu nabukula abaanabe babili, Manase nende Efuraimu ne natsia okhulola samwana. 2Mana Yakobo naboolelwa ari, “Omusianiwo Yosefu yetsile okhukhulola.” Mana Yakobo niyetinyilisia, niyekhala khushitali. 3#Obucha. 28:13,14Kho Yakobo naboolela Yosefu ari, “Nyasaye Owobunyali Bwosi yandoleshela Luzi mushialo shia Kanani mana niyambelesia tsikhabi, 4Khandi niyamboolela ari, ‘Ndalakhukhola wibulane mana abolwibulolwo babe abanji. Khandi ndalakhukhola obe nomukanda kwabandu, ne ndilihelesia aboluyialwo abeetsa inyumawo eshialo shino okhuba eshiabwe khulwemiyika chiosi!’ ” 5Mana Yakobo natsiililila okhuboola ari, “Ne bulaano, abaanabo abasiani babili, aba webula mushialo shia Misiri neshili okhwitsa Misiri, nabanje. Efuraimu nende Manase balaba abaana banje, shinga olwa Rubeni nende Simoni bali. 6Ne abaana ba wakhebule olunyuma, bakhabe aboobo. Bakhakulikhwe ameera kabasiani babwe abembukuule khulwa okhukalukha mubulaame bwabasiani babwe aba embukuule. 7#Obucha. 35:16-19Okhuba olwa ndarula Padani, Raeli yafwila khunjila nikhushili okhuula Efuraimu, mana nemuyabilayo ahambi nende Efuratsi,” (nilio Betselehemu).
8Olwa Yakobo yalola abaana ba Yosefu, yareeba ari, “Abaraaka bano ni beena?” 9Naye Yosefu namukalusia ari, “Nabaana ba Nyasaye yambelesiye nendi Misiri hano.”
Naye Yakobo namuboolela ari, “Bandeerere hano mbu, ebalaamile tsikhabi.” 10Ne bulaano tsimoni tsia Yakobo tsiali nitsilolanga amaweliweli khulwa obukofu, kho, shiyali nalolanga obulayi tawe. Mana Yosefu nasitia abaanabe ahambi. Naye Yakobo nabatsunzuuna khandi nabafumbeelela. 11Mana Yakobo naboolela Yosefu ari, “Shindaapaarangakhwo mbu, ndilikhulolakhwo tawe. Nebutswa Nyasaye achilile kata endutsi abaanabo.” 12Mana Yosefu narusia abaana abo mumakulu ka Yakobo ne niyenamia obwenibwe okhuula hasi. 13Mana Yosefu nabukula Efuraimu mumukhonokwe omusaatsa nahafia mumukhono kwa Yakobo omukhasi naye Manase mumukhono kwa Yosefu omusaatsa nahafia mumukhono kwa Yakobo omukhasi, ne nababasitia ahambi khu Yakobo. 14Naye Yakobo nanyiila omukhonokwe omusaatsa natiila khumurwe kwa Efuraimu, owali omutiiti nakwo omukhonokwe mukhasi natiila khumurwe kwa Manase, owali omukhulundu, mushilenje shiokhura omukhonokwe musaatsa khu Manase owali omukhulundu, nakwo omukhasi khu Efuraimu, owali omwana mushe.
15Mana Yakobo nalaamila Yosefu ikhabi natiilile khubaana abo naboola ari,
“Nyasaye wa bapapa banje Aburahamu nende Isaka bakhalabanila,
khandi Nyasaye wanzimilila mubulamu bwanje bwosi okhuula inyanga yino,
16nende omumalaika wahonokosia okhurula mumabi koosi,
ahelesie abaraaka bano tsikhabi.
Ne okhubirira mubo, lekha eliira lianje nende eliabakuuka banje Aburahamu nende Isaka likulishilwe mubo.
Mana bebulane babe omukanda omukhongo khushialo.”
17Ne olwa Yosefu yalola mbu, Yakobo samwana yali nareere omukhonokwe musaatsa khumurwe kwa Efuraimu, likhuwa elo liamusinyisia. Kho nabukula omukhono kwa Yakobo okhurusia khumurwe kwa Efuraimu mbu, are khumurwe kwa Manase. 18Kho Yosefu naboolela samwana ari; “Ra omukhonokwo musaatsa khumurwe kwa Manase.” 19Naye Yakobo naloba naboola ari, “Emanyile, mwana wanje, emanyile mbu, Manase yesi yakhabe nabandu, ne okhuula yesi aliba omukhongo. Habula, omusiani wabwe omushe Efuraimu aliba omukhongo okhumushila, khandi abolwibulolwe bakhekhole okhuba amahanga amakhongo.” 20#Abaheb. 11:21Kho Yakobo nabalaamila tsikhabi inyanga eyo naboola ari, “Abandu ba Isiraeli balikhoonyela ameera kenywe okhulaamila abandu tsikhabi nibaboola bari, ‘Nyasaye akhukhole shinga Efuraimu nende Manase.’ ”
Kho Yakobo na Efuraimu imbeli wa Manase.
21Mana Yakobo naboolela Yosefu ari, “Endi ahambi okhufwa, ne Nyasaye alabetsanga ninawe, khandi alikhukalusia mushialo shiabakuukabo. 22Okhumeetakhwo, ekhuhelesiye mundaalila weshikulu shia ndanuula Abamori nolukanga lwanje nende obuyingo bwanje.”
Currently Selected:
OBUCHACHILO 48: OLUDC
Highlight
Share
Copy
Want to have your highlights saved across all your devices? Sign up or sign in
