OBUCHACHILO 46
46
Yakobo nende abomunzuye batsia Misiri
1Kho Yakobo nabukula ebindubie biosi nachaaka oluchendo, mana niyoola Beerisheba nakhola omusango khu Nyasaye wa papawe Isaka. 2Naye Nyasaye nalanga Yakobo mumalolelo keshilo ari, “Yakobo, Yakobo,” naye Yakobo nakalusia ari, “Endiho.” 3Mana Nyasaye namuboolela ari, “Nisie Nyasaye, Nyasaye wa papawo, Shiolaria okhukholomokha okhuula Misiri ta, shichila ebweneyo ndalakhukhola lihanga likhongo. 4Ndalakholomokha ninawe okhuula Misiri khandi isie mwene ndakhachelesie abolwibulolwo, ne olwa olifwa, Yosefu alikhufumba.”
5Kho Yakobo narula Beerisheba. Nabo abasianibe nibara sabwe nende abaana babwe abatuutu nende abakhaye babwe khumakari ketsing'ombe, aka omuruchi yali nahaanile mbu, bachinjilwemwo. 6#Ebikh. 7:15Babukula tsing'ombe tsiabwe nende emiandu chiabwe, echia bali nibanyoola mushialo shia Kanani ne nibeetsa ninabio Misiri. Yakobo nabukula abolwibulolwe boosi, 7abasianibe nabaana babasianibe, abakhaanabe nabaana babakhanabe, ne nibeetsa ninaye Misiri.
8Abolwibulo lwa Yakobo, abatsia ninaye Misiri bali Rubeni omusianiwe wambeli, 9nende abasianibe mbu, Hanoki, Palu, Hezironi, nende Karimi. 10Simeoni nende abasianibe mbu, Yemueli, Yamini Ohadi, Yakini, Zohari, nende Shauli omusiani womukhasi omukanani. 11Lewi nende abasianibe mbu, Gerishoni, Kohatsi, Morari. 12Yuda nende abasianibe mbu, Eri, Onani, Shela, Perezi nende Zera (Yuda nende abasianibe bandi mbu, Eri nende Onani bali nibafwila mushialo shia Kanani.) Naye Perezi nende abasianibe mbu, Hezironi nende Hamuli. 13Isakari nende abasianibe mbu, Tola, Puwa, Iyobu nende Shimuroni. 14Zebuluni nende abasianibe mbu, Seredi, Eloni nende Yaleeli. 15Abo nibo abasiani ba Lea yebulila Yakobo mushialo shia Mesopotamia, omukhaanawe oulangwa mbu Dina nabulakhwo. Abolwibulo lwa Yakobo, aba yebula nende Lea boosi halala abakhaana nabasiani nende abetsukhulube bali amakhumi kataru nabataru. 16Gadi nende abasianibe mbu, Sifioni, Hagi, Shuni, Eziboni, Eri, Arodi nende Areli. 17Asheri nende abasianibe mbu, Imuna, Ishiwa, Ishiwi, Beria nende Sera omukhaana wabwe. Beria nende abasianibe mbu, Heberi nende Malakieli. 18Ekhumi nabasasaba abo nibo abolwibulo lwa Yakobo, aba yebula nende Zilipa, owa Labani yahelesia Lea omukhaanawe. 19Abasiani ba Raeli omukhaye wa Yakobo bali Yosefu nende Benjamini. 20#Obucha. 41:50-52Ne aba Asenatsi omukhaana wa Potifera omwisaaliisi wa Oni yebula nende Yosefu mushialo shia Misiri bali Manase nende Efuraimu. 21Ne abasiani ba Benjamini bali Bela, Bekeri, Eshibeli, Gera, Namani, nende Aridi. 22Boosi halala aba Raeli yebula nende Yakobo bali abandu ekhumi nabane. 23Omusiani wa Dani yali Hushimu. 24Abasiani ba Nafutali bali Yahazeli, Guni, Yezeri, nende Shilemu. 25Abasiani musaafu abo nibo aba Biliha, owa Labani yahelesia Raeli omukhaanawe yebula nende Yakobo.
26Abolwibulo lwa Yakobo, abetsa Misiri, abakhaye babasianibe nibabulakhwo, bali abandu amakhumi kasasaba nabasasaba boosi halala. 27#Ebikh. 7:14Ne abasiani aba Yosefu yebula nali mushialo shia Misiri bali babili. Kho abandu boosi aboluyia lwa Yakobo, abetsa Misiri bali amakhumi musaafu.
Yakobo nende abomunzuye nibali Misiri
28Yakobo yaruma Yuda mbu aranjilile okhutsia okhureeba Yosefu mbu, yakaanile Yakobo samwana mushalo shia Gosheni. Mana Yakobo nende abolwibulolwe niboola mushialo shia Gosheni. 29Yosefu narechekha likaarilie lietsifarasi natikulukha natsia Gosheni okhwakaanila Yakobo samwana. Olwa Yosefu yamulola, yamukwakhwo ne nalila, namulililakhwo khulwoluhono. 30Yakobo naboolela Yosefu ari, “Bulano lekha efwe, shichila emalile okhukhulola khandi emanyile mbu oshiliho mwoyo.” 31Yosefu naboolela abasiani babwe nende abomunzu ya samwana ari, “Ndalatsia emboolele omuruchi endi, abasiani befwe nende abomunzu ya papa, abali nibamenya mushialo shia Kanani betsile ewanje okhundola. 32Ndalamuboolela mbu, inywe muli abaayi, okhuba mwali abaruchi betsing'ombe khandi mwetsa nende ebiayo bienywe nende tsing'ombe tsienywe nende biosi ebia mwali ninabio. 33Olwa omuruchi amulanga namureeba ari, ‘Mukholanga milimo shiina?’ 34Mumukalusie muri, ‘Ifwe abakhalabanibo nende abakuuka befwe khubetsanga abaruchi betsing'ombe okhurula muburaaka bwefwe okhuula bulano.’ Muboole murio Kho mbu, amufuchilile mumenye mushialo shia Gosheni. Yosefu yaboola ario shichila abaayi bali eshisinyo khubandu ba Misiri.”
Currently Selected:
OBUCHACHILO 46: OLUDC
Highlight
Share
Copy
Want to have your highlights saved across all your devices? Sign up or sign in
