OBUCHACHILO 43

Abasiani babwe Yosefu bakalukha Misiri nende Benjamini

1Bulano inzala eyo yatsiililila okhuba indulu mushialo shia Kanani. 2Ne olwa abeinzu ya Yakobo bali nibamalile okhulia imele yabakula okhurula Misiri, sabwe yababoolela ari, “Kalusheyo khandi mukhukulilekhwo eshiokhulia shituutu.” 3Nebutswa Yuda yamuboolela ari, “Omusaatsa oyo yakhulaka obutinyu naboola ari, ‘Shimulandoleshelakhwo mumoni mwanje, omusiani wenywe nalali ninenywe tawe.’ 4Noba nokhuruma nende omusiani wefwe khulakholomokha Misiri mana khukhukulile eshiokhulia. 5Nebutswa noba nolakhuruma ninaye ta, shikhukholomokhayo tawe, shichila omusaatsa tsana yakhuboolela ari, ‘Shimulandoleshelakhwo mumoni mwanje, omusiani wenywe nalali ninenywe tawe.’ ” 6Yakobo nabareeba ari, “Mbushiina nimukholela amabi kano, nimuboolela omusaatsa oyo mbu, muli nomusiani wenywe undi?” 7Nibamukalusia bari, “Omusaatsa oyo yakhurebelesia okhwenya okhukhumanya ifwe nende abolwibulo lwefwe, nakhureeba ari, ‘Senywe ashili mwoyo? Mulikhwo nomusiani wenywe undi?’ Akakhwamuboolela kali amakalusio khumareebo ako. Khwakhamanyile khurie mbu, alakhuboolela ifwe ari, ‘Reere omusiani wenywe oyo?’ ” 8Mana Yuda naboolela Yakobo ari, “Ruma isie nende omuraka uno ne khularula khutsie kho mbu, ifwe nende iwe kata nende ababuukha bano khubeho mwoyo, khuleshe okhufwa khulwa inzala. 9Ndalasinjila mushilenjeshie, ne olimwenya okhurula mumakhono kanje. Nimba nindalamukalusia khwiwe nende okhumura imbeli wo ta, nisie oulaba nendi neshikha emiyika chiosi. 10Nikhuba nikhulashindile ta, khane bulano khuba khutsiile khandi khuba khwakhakalukha akhandi khabili.”

11Mana Yakobo samwana nababoolela ari, “Nikaba mbu, okhuula kabe kario, kho khole muri: Bukulekhwo ebiamo ebilayi ebiomushialo shienywe ne muchinje muyilile omusaatsa oyo shinga eshihaanwa, indesi yeshiuya, obuushi butuutu, obubane, manemane, tsinjuku nende tsilusi. 12Mubukule amapesa eshikhabili, mukalusheyo nende amapesa akakalusibwa mumakunia kenywe ako, haundi khwali butswa okhwibilila. 13Bukule nende omusiani wenywe, mana murule mutsie khumusaatsa oyo khandi. 14Nyasaye Owobunyali Bwosi amukholele akeshisa imbeli womusaatsa oyo, amukalusilie omusiani wenywe undi oyo nende Benjamini. Ne khulwanje nikaba mbu, okhuula engosie abaana banje boosi, kho ndalabakosia boosi.” 15Kho abasiani babwe Yosefu nibabukula ebihaanwa, khandi nibabukula amapesa eshikhabili, nende Benjamini, ne nibarula nibakholomokha okhutsia Misiri, nibasinjila imbeli wa Yosefu.

16Olwa Yosefu yalola Benjamini nali ninabo, yaboolela omusinjilili wokhuteekha munzuye ari, “Yinjisia abandu abo munzu mana osinze eshiayo oshikaasie obulayi, shichila abandu abo balalia ninasi eshiokhulia shimushiteere.” 17Omusinjilili wokhuteekha oyo nakhola shinga olwa Yosefu yali namulachililsiye, mana niyenjisia abandu abo munzu mwa Yosefu. 18Mana nibahenda omwoyo, okhuba benjisibwa munzu mwa Yosefu. Ne nibaboola bari, “Ni khulwa amapesa kakalusibwa mumakunia kefwe, olwa khwetsa olwambeli niko akachila nikhwinjisibwa muno kho mbu, anyoole obwiyangu bwokhukhuraakhwo eshikha, akhunuule tsisishili tsiefwe mana akhukhole abasumbabe.” 19Kho nibatikulukha nibatsia hekulu khumusinjilili wokhuteekha womunzu mwa Yosefu oyo, nibaboola ninaye nibali hamuliango 20bari, “Iwe Omwami wefwe, ifwe, khwetsa olwambeli okhukula eshiokhulia, 21ne olwa khwola habundu hokhwiyalisia, khwaboholola amakunia kefwe, ne amapesa kabuli mundu kali hamunwa welikunialie. Amapesa kefwe koosi shinga olwa kachelwa, kho khukaluushe ninako khandi. 22Mana khwitsile namapesa kandi mumakhono kefwe, akokhukula eshiokhulia, shikhumanyile owara amapesa kefwe ako mumakunia kefwe tawe.” 23Omusinjilili wokhuteekha nabakalusia ari, “Shimulahenda omwoyo ta, khandi shimularie tawe. Nyasaye wenywe khandi Nyasaye wa senywe okhuula abe niyamureera inganga mumakunia kenywe, isie ndanyoola amapesa kenywe.” Mana nareera Simeoni ewa bali. 24Ne lwomundu oyo yali niyenjisiye abandu abo munzu ya Yosefu, khandi nabahelesiye amaatsi kokhwosia ebilenje mana khandi nibahelesiye tsisishili tsiabwe eshiokhulia, 25barechekha okhuhesia Yosefu ebihaanwa, shichila bali nibahuliile mbu, yetsanga mushiteere hakari okhulia omukaate ninabo. 26Olwa Yosefu yachelela, bareera ebihaanwa bia bali nibetsile ninabio munzu okhumuhelesia, nibenamia obweni bwabwe okhuula hasi. 27Yosefu nabareeba khukobulamu bwabwe ari, “Omukofu wamwaboola mbu ni senywe nomulamu? Ashili mwoyo?” 28Nibamukalusia bari, “Omusumbawo papa wefwe nomulamu, ashili mwoyo” nibenamia emirwe chiabwe okhumwinamila. 29Ne Yosefu nachinguula tsimonitsie, nalola Benjamini omusiani wabwe ne nabareeba ari, “Uno niye omusiani wenywe omushe, owamwamboolela? Mwana wanje, Nyasaye akhuhelesie tsikhabi!” 30Mana Yosefu narula bwangu, natsia mushisikashie nalililamwo amasika, khulwa amahofu khumusiani wabwe. 31Olunyuma lwokhwiyosia mumonimwe, yakalukha ewa bali, naboolela omusinjilili wokhuteekha ari, “Eshiokhulia shireerwe.” 32Nibamureerera eshishie yenyene, khandi abasiani babwe eshiabwe bonyene, ne Abamisiri bokhulia ninaye khandi nibahebwa eshiabwe bonyene, shichila kwali omusilo khu Abamisiri okhulia omukaate nende Abayahudi halala. 33Kho nibekhala imbeliwe shinga olwa balondana mukhwibulwa, okhurula khuwambeli okhuula khumushe. Ne olwa abasiani abo balola mbu, bali nibekhaale okhulondana shinga olwa bebulwa, bachenya. 34Ebichelo biebiokhulia biabwe biareerwa okhurula khumesa ya Yosefu, nebutswa eshichelo shia Benjamini shiali eshinji okhushila ebiabasiani babwe akhandi kharano. Kho nibanywa khandi nibekhoya halala ninaye.

Currently Selected:

OBUCHACHILO 43: OLUDC

Highlight

Copy