OBUCHACHILO 38
38
Yuda nende Tamari
1Mutsinyanga etsio, Yuda yalekha abasiani babwe, ne natsia okhumenya nende omusaatsa undi Omuadulami oulangwa mbu, Hira. 2Ne Yuda nali ebweneyo, yalola omukhaana undi Omukanani, owa samwana yalangwa mbu, Shua, ne namuteeshia. 3Mana omukhaana oyo nahela inda, ne niyebula omwana omusiani, ne Yuda namukulikha mbu, Eri. 4Khandi Shua nahela inda niyebula omwana omusiani ne namukulikha mbu, Onani. 5Khandi nameeta niyebula omwana undi omusiani ne namukukulikha mbu, Shela. Olwa Shela yebulwa, Yuda yali nali Keziba. 6Olunyumakhwo, Yuda yabashila omusianiwe omwikulanda oulangwa mbu Eri, omukhasi owalangwa mbu, Tamari.
7Nebutswa Eri yali omumayanu imbeli wa OMWAMI Nyasaye, ne OMWAMI Nyasaye namwiira. 8Mana Yuda naboolela Onani ari, “Tsia khumukhasi womusiani wenywe Eri, omukalusie shichila iwe oli mulamunyene omukhasi oyo, obuusilie omusiani wenywe olwibulo.” 9Nebutswa Onani yamanya mbu, abaana shibalaba abeebe ta, kho buli olwa yakonanga nende omukhasi womusiani wabwe oyo, Onani yatsukhanga butswa elwanyi hasi kho mbu, aleshe okhubuusilia omusiani wabwe olwibulo. 10Aka Onani yakhola kasinyisia OMWAMI Nyasaye, mana Nyasaye namwiira. 11Mana Yuda naboolela Tamari omukhasi womusianiwe ari, “Tong'a butswa noli omukhasi omulekhwa munzu yapapawo, omenye okhuula lwomusiani wanje Shela aliba nakhulile,” shichila yali noburi mbu, Shela yesi yakhafwa shinga abasiani babwe. Kho Tamari nakalukha ingo wabwe namenyayo.
12Olunyumakhwo omukhasi wa Yuda, owali omukhaana wa Shua nafwa. Ne olwa Yuda yali namalile amasika, yatsia Timuna nende omwitsawe Hira Omuadulami, ewa amakondike katetulungwa obwoya. 13Ne olwa Tamari yaboolelwa ari, “Nyakhufialayo atikulukhanga natsia Timuna okhuteta obwoya bwamakondike,” 14Tamari yefwalula ebifwalobie ebiobulekhwa, niyeboha olububi niyefuunikha obwenibwe, niyekhala hashiliibwa eshihenjile Enaimu, litookho eliali khunjila yitsia Timuna. Tamari yali namanyile mbu, Shela omusiani omushe wa Yuda yali namalile okhukhula. Naye Shela shiyali niyaboolelwa mbu, akalusie Tamari tawe. 15Olwa Yuda yalola Tamari, yapaara mbu nomutamba, shichila Tamari yali niyefuuniishe obwenibwe. 16Yuda natsia aha Tamari yali, handulo womwanda ne namuboolela ari, “Yitsa khukone ninawe,” shichila shiyali namanyile mbu, ni nyakhufialanyene tawe. Tamari namureeba ari, “Nengona ninawe olambelesia shiina?” 17Yuda nakalusia Tamari ari, “Ndalakhurumila eshimeeme shieimbusi okhurula mubiayo bianje,” naye Tamari nareeba ari, “Olambelesia omusingo bulano okhuula lwolareera eshimeeme eshio noho?”
18Yuda namukalusia naboola ari, “Omusingo shiina okwa wenya mbu, ekhuhelesie? Tamari namukalusia ari, Ingaka yeshibalikho nende olutsaha lwayo neindabushi yili mumukhonokwo eyo.” Kho Yuda nahelesia Tamari ebindu ebio, ne nakona ninaye, ne Tamari nahela inda. 19Mana Tamari nabuukha natsia niyefwalula olububi olwo, nafwala ebifwalo biomukhasi omulekhwa. 20Olwa Yuda yaruma omwitsawe Omuadulami okhuyilila Tamari eshimeeme shieimbusi, mbu abukule ebiomusingo, akalusilie Yuda, 21Hira shiyanyoola Tamari naliyo tawe. Hira nareeba abandu bali nibaliho, ari, “Omutamba owali Enamu khulubeka womwanda ali heena?” Nabo nibamukalusia bari, “Omutamba yesi yesi shiabetsangakwo hano tawe.” 22Kho Hira nakalukha ewa Yuda, ne namuboolela ari, “Shiemunyoolileyo tawe. Kata khandi abandu bamenyayo bambooleele bari, ‘Omutamba yesi yesi shiabetsangakhwo hano tawe.’ ” 23Yuda namukalusia ari, “Lekha omutamba oyo atoonye nende ebindu ebio, bibe ebibie, abandu bakhetsukhana bakhutsekha. Isie embeele nekhurumile mbu, omurunje, nebutswa shiomunyoolileyo tawe.”
24Olunyuma lwemiesi chitaru, Yuda yaboolelwa ari, “Nyakhufialayo Tamari, yekholile omutamba mana ahelile inda yomwana wobutamba.”
Naye Yuda naboola ari, “Muyinie elwanyi mana asambwe afwe.”
25Shinga olwa Tamari yali nayilungwa elwanyi, yarumila nyakhufialanyene likhuwa naboola ari, “Ndahela inda eyomusaatsa mwene ebindu bino, emusaaya mbu, muhenje obulayi mwene ebindu bino, ingaka yeshibalikho, olutsaha lwayo nende indabushi.”
26Mana Yuda namanyilisia mbu, ebindu ebio nebibie, ne naboola ari, “Tamari nomulunjishi okhushila isie. Ni toto, okhuba shindamuhaana khumusiani wanje Shela okhumukalusia tawe.” Okhuchaaka inyanga eyo Yuda shiyakonakhwo nende Tamari khandi tawe.
27Olwa ebise biola ebiokhwibula khwa Tamari, kanyoolekha mbu, yali neinda yamakhwana. 28Ne olwa Tamari yali nalumungwa, omwana mulala yarusia omukhonokwe elwanyi mana omukhasi owamwibusia natiila omukhonokhwo naboyakhwo oluusi olwakhanyu ne naboola ari, “Uno niye ouranjiliile okhwibulwa.” 29Nebutswa lwomwana oyo yakalusia omukhonokwe munda, omusiani wabwe naranjilila okhwibulwa. Omukhasi webusinjia oyo naboola ari, “Kho nolwa orula elwanyi orio!” Omwana omusiani oyo nakulikhwa mbu, Perezi#38:29 Perezi: eshisina mbu, Eshibanga.. 30Mana olunyumakhwo, omusiani wabwe niyebulwa nali noluusi olwakhanyu khumukhohokwe, ne nakulikhwa mbu, Zera.
Currently Selected:
OBUCHACHILO 38: OLUDC
Highlight
Share
Copy
Want to have your highlights saved across all your devices? Sign up or sign in
