2 MAKABAYO 15
15
Amakhuwa amabi aka Nikanori yarechekha okhukhola
1Olwa Nikanori yahulila mbu, Yuda halala nende abelihebe bali mushialo shia Samaria, yalola mbu abaseere khunyanga ye Isabato, olwa Abayahudi balanyala okhukhola liosi liosi ta, okhuba neinyanga yabwe yokhuhuluukha. 2Abayahudi abali nibanichilisibwe okhumulondakhwo bateema okhumukania mbu, aleshe okhusasia nende okhumulula abandu munjila yimayanu eyo. Nibamuboolela mbu, ahelesie Isabato oluyali okhuba neinyanga eya Nyasaye oulolanga koosi yaahula, nayikhola okhuba indakatifu mutsiosi. 3Kho Nikanori, omundu owalaamwa eshilaamo shiobubi oyo yabareeba naba nalikhwoho omuruchi undi mwikulu, owabalachilisia okhulindanga inyanga ya Isabato eyo. 4Abayahudi nibamukalusia bari, “Aliho, OMWAMI Nyasaye, Ouli Mwoyo, ourukanga mwikulu, niye owakhulachilisia okhulinda Isabato.” 5Nebutswa Nikanori yabakalusia ari, “Nasi nisie ourukanga eshialo. Khulweshio, emulachilisia mbu, mubukule ebimanulwa bienywe mana mukhole aka isie emboola.” Kata kario Nikanori shiyanyalilwa okhukhola aka yali narecheeshe okhukhola ta.
Yuda Makabayo arechekha abelihebe okhulwana
6Mukhwichinjimisia nende munjinia, Nikanori yali nareerekhwo omwoyo okhumbakha omunaara kweshitsulilo shiobuhulibwe khu Yuda. 7Nebutswa Yuda Makabayo yali nobusuubili oburalilu mbu, alanyoola obuhabini okhurula khu OMWAMI Nyasaye. 8Yatinyisia abelihebe mbu boome ikholo, balaria omusuku tawe. Yabatinyisia omwoyo khulwa okhubetsusia shinga olwa OMWAMI Nyasaye, Wobunyali Bwosi yali nibahabina mutsinyanga tsia khale. Khandi yabasuubisia mbu, OMWAMI Nyasaye alabahelesia obuhuli khandi. 9Yabatinyisia omwoyo khulwa okhubasomela amalako nende amebaalo aka Abalakusi. Khandi yabetsusia akamahe kabalwana nibahula. Nabakhola okhuba nomwoyo kwokhulwana.
10Olwa abelihebe berechekha okhulwana, yabalachilisia nababoolela shinga olwa abandu bamahanga kandi shibaali abasuubilwa ta, okhuba shibalinda indakano yabakhola ta. 11Yabatsuuba mbu, babe neitswoni, baleesika butswa tsingabo namafumo bionyene ta, habula beesiche amakhuwa akeitswoni khandi kokhubatinyisia omwoyo. Khandi yabatinyisia boosi khulwa okhubaboolela akeliloorolie, eliali shinga lilolelo elia yali nalutsi, eliali nilikwaniile okhusuubililwa.
12Yababoolela mbu mwilolelolie elo, yalola Onia, owali omwisaaliisi omukhulundu, omundu omulayi wamakana, omuholo, owokhwitutuyia, omubooli omulayi khandi owali niyechesibwa akeinjenda indayi muno okhurula obwanabwe, nachinguulile amakhonoke nasaayilanga Abayahudi boosi. 13Khandi yalola omundu, oweliswi lietsimbutsi, woluyali nobunyali. 14Onia naboolela Yuda ari, “Yeremia uno, nomulakusi wa Nyasaye, owaheela Abayahudi bashie muno, khandi oukhusayilanga ifwe halala nelitookho litakatifu lia Yerusalemu.” 15Mana Yeremia nanyiila omukhonokwe musaatsa, nahelesia Yuda olukanga lweitsahabu, namuboolela ari, 16“Olukanga lweitsahabu olutakatifu luno neshihanwa okhurula khu Nyasaye. Lubukule omululile abasukubo.”
17Amakhuwa amalayi ka Yuda yaboola ako katinyisia buli mundu omwoyo, kata ababuukha banyoola itswoni yokhulwana shinga abandu abatukhu. Litookho liabwe lia Yerusalemu, idiini yabwe, nende Ihekalu yabwe, biali nichoomile mumatinyu kokhusasibwa. Kho, Abayahudi balola mbu, baleshe okhukosia ebise, habula batsie bwangu baseere abasuku babwe nende okhulola mbu, nikaba nikanyilikha, bahule buli lihe lia balwana. 18Shibahendelakhwo abakhasi babwe, abaana babwe kata abeekho babwe ta, habula bahendela butswa Ihekalu yabwe indakatifu. 19Ne abo abali nibakhoyile okhutong'a mwitookho lia Yerusalemu bahenda muno khulwa lihe eliali nilitsiililanga ebulafu wabakhupanilanga.
Okhuhulwa nende okhufwa khwa Nikanori
20Buli mundu yali nalindililanga okhulola mbu ni wina oulahula lihe elo. Abelihe babasuku abo bali nibatsilililanga imbeli, halala nende abokhutsifarasi nibasinjiile khumukhono kwabwe musaatsa nende omukhasi. Khandi bali nibarecheeshe tsinzofu tsiabwe habundu aha tsikhoyeele okhuba khulwa lihe. 21Olwa Yuda Makabayo yalola omukanda omukhongo kwabelihe abasuku nibetsanga nende ebimanulwa biabwe bietsimbia tsiosi nende tsinzofu tsiabwe tsimbalaba, yachiinguula amakhonoke ikulu namuhaabila OMWAMI Nyasaye oukholanga akamakana. Okhuba yamanya mbu OMWAMI Nyasaye shiahelesinjia obuhuli abelihe liamaani ta, habula ahelesinjia abo abakhoyile okhuhula. 22#2 Abar. 19:35Kho namuhaabila Nyasaye naboola ari, “Iwe, OMWAMI Nyasaye, olwa Hezekia yali omuruchi weshialo shia Yuda, owaruma malaikawo, niyeera abandu belihe liomuruchi Senakeribu ebikhumila eshikhumi shilala nebikhumila amakhumi munane nabirano (185,000). 23Bulano, iwe OMWAMI Nyasaye, omuruchi womwikulu, ruma khandi olwa khabili malaikawo omulayi, arundusie nende okhutechesia nariisia abasuku befwe. 24Mubunyalibwo obukhongo, omulule abandu bano, abafwolile eliralio, abeetsile okhuseera lihangalio eliahule.” Yuda yamalilisia amasayoke namakhuwa ako.
25 #
1 Mak. 7:43-50
Nikanori nende abelihebe batsiililila imbeli nibakhupa tsinzika nende okhwimba tsinyimbo tsielihe. 26Nebutswa Yuda nende abelihebe batsia mwihe elo nibamuhabilanga Nyasaye mbu abakhoonye. 27Abayahudi balwana nomusuku namakhono kabwe, ne nibamuhaabila Nyasaye mumioyo chiabwe. Bakhola bario okhuula nibeera abelihe abasuku hambi ebikhumila amakhumi kataru nabirano (35,000). Bekhoyela muno obukhoonyi bwa bali nibanyoolile okhurula khu Nyasaye obwo.
28Olunyuma lwelihe, olwa bali nibakalukhanga nango wabwe, nibekhoyanga khulwa obuhuli bwabwe, balola Nikanori nakwile mushikuuri shielihe nafwile, nashifwalile ebimanulwabie biosi. 29Mana nibakhupa tsingalakala nomwoyo omukhongo, nibetsoomia OMWAMI Nyasaye mululimi lwabwe. 30Yuda Makabayo, owali nalwanilenje lihe buli lwosi khulwa Abayahudi bashie namaanike koosi nende omwoyokwe kwosi, khandi owalinji omwisiikwa okhurula obwanabwe, yalachilisia abelihebe okhukhalaka omurwe kwa Nikanori nende omukhonokwe musaatsa, nabiyila Yerusalemu. 31Olwa boola mwitookho lia Yerusalemu, Yuda yakhung'aasia halala abandu bosi, ne narechekha abesaaliisi imbeli weshimalilo shiemisango, khandi nalachilisia mbu abali mulukoba bareerwe. 32Yabamanyia omurwe kwa Nikanori, omundu wali niyalaamwa oyo, nende omukhono kwa yanyiilanga nakhola injinia nafwola Ihekalu indakatifu eya OMWAMI Nyasaye. 33Mana nateta olulimi lwa Nikanori, omundu omukhayi oyo, ne nalaka mbu alalukhalakamwo ebitonye nafuubila amanyonyi okhulubootsa, khandi mbu alaachikha omurwekwe habundu hahengaane nende Ihekalu, shibe eshilolelo shiobuyingwa bwa Nikanori yakhola. 34Boosi abaliho bachinguula nibahenga mwikulu, nibamwitsoomia OMWAMI Nyasaye, owali nalolesiye obunyalibwe, nende okhwikalila Ihekaluye mbu yileshe okhufwolwa. 35Mana Yuda niyaachikha omurwe kwa Nikanori khwisisi liolukoba, mbu shibe eshilolelo shia habulafu eshiobukhoonyi obwa OMWAMI Nyasaye khubo. 36#1 Mak. 7:49Bafuchilisania boosi nomwoyo mulala mbu baleebililakhwo inyanga eyo nahatutu ta, habula bayitsulilenje nibakhola lisabo, eliranjililanga inyanga yelisabo lia Moridekai#15:36 lisabo lia Moridekai: Lisabo lia Purimu (Soma Esi-Mu. 9:17-22). khubuli khumuyika, omwesi kwekhumi nakhabili, nikwo omwesi kulangwa mbu Adari, mululimi lwa Abaramu, nikuli ekhumi nakhataru.
Akahelelesia
37Nolwa amakhuwa kekholekha khu Nikanori kario. Okhurula olwene olwo, litookho lia Yerusalemu lili muburuchi bwa Abayahudi. Kho isie ndaakamilia yaho amakhuwa kanje. 38Nemba nekenoosiye obulayi shinga olwa kakhoyile okhwinoosibwa, endi nobusaangaali. Ne nemba nekeenoosiye munjia imbi khandi eyilasaangaasia ta, nolwa enyaliilwe endio. 39Khumanyile mbu shibuli obulayi okhunywa idivai noho amaatsi konyene ta, habula idivai eyitsokasiibwemwo amaatsi niyo eyonywetsanga nohulilamwo eshiuya. Kho nolwa amakhuwa amalayi, akahandikwa munjila yobusitsa, kasaangasinjia nikachamisia, abakasoma. Ndakamila yaho.
Currently Selected:
2 MAKABAYO 15: OLUDC
Highlight
Share
Copy
Want to have your highlights saved across all your devices? Sign up or sign in