Mk. 12

Lukano lwe bakholi mwiruuti lie kimisabibu

(Mat. 21.33-46; Lk. 20.9-19)

1 # Isa. 5.1-2 Nio Yesu abalomalomakho mu lukano ali, “Abao omundu mulala owabiaala liruuti lie kimisabibu, asira lumako abotookhelesia, ayaba liloo lie khukhamululilamo endali, mala ombakha endeleelwa eye khulindilakho. Aelesia liruuti elio bakholi baliemo, mala arura mungo acha lukeendo mu sibala sisiindi. 2Oli siise sie khubuta chisabibu aruma nasioobi khu bakholi be mwiruuti anyoole sitonyi siewe. 3Bakholi abo batiila nasioobi bamupa mala bamuoona akobolayo makhono mataaka. 4Omwene liruuti aruma nasioobi okundi, bakholi chana bamwara kamakuma ne khumuambia chisoni. 5Omwene liruuti aruma nasioobi okundi naye bamwiira mala bakhola bario khu bakali khu khupa balala ne khukhwira babaandi. 6Omundu owarama khurumwa aba omusoleeli wewe omusiime. Ekhumaliilikha aruma omwana wewe yuno khu bakholi bano aaloma ali, ‘Ndi nasuubi kane barie omwana owase.’ 7Bakholi chana baboolana bali, ‘Yuno omwana wewe, yiicha khumwire, mala kimiaandu kiewe kino kilaba kikiefwe!’ 8Nio batiila omwana oyo bamwiira mala bamwaata kumubili kwewe enje we liruuti.”

9Yesu abareeba ali, “Nono omwene liruuti alakhola siina? Alecha mala eere bakholi be mwiruuti abo ne khuelesia liruuti babaandu babaandi. 10#Chiny. 118.22-23 Ng'ali mwasomakho liiandiko lino:

‘Libaale nilio babombakhi baloba bali se lili ne bukhala tawe,

liliene ne liliene liabeele lie bukhala khukhila koosi.

11Wele Omunyali Owa Bioosi niye owakhola kano,

kali ke khuukia mu moni chefwe.’ ”

12Babemeelesi be Bayaudi bakhaka khutiila Yesu, sikila bamanya bali Lukano luno luli khu nibo. Ne kakhali baba ne buuri sikila babaandu babaao bakali, khwako bamulekha bacha.

Lireeba khu buruungi bwe busuuru

(Mat. 22.15-22; Lk. 20.20-26)

13Bafarisayo balala ne babaandu babaandi be kumukaanda kwa Herodi barumwa khukhaka Yesu ne kamareeba. 14Becha niio ali baloma bali, “Omwekisia, khumanyile khuli olomanga kang'ali, se wieendekhelelanga niko baandu bebaasia tawe, se winananga khumanya naanu niye naanu tawe, ne kakhali wekisianga bung'ali bwe kamakhuwa niko Wele enya khu baandu. Khuboolele, kali ng'ali bali khufunanga Lilaka liefwe khuruunga busuuru khu mwami owe Burumi? Khuruunge namwe tawe?”

15Yesu anyoa abona kumureko kwabwe mala abakobosia ali, “Siina sikila ne mukhaka? Reera erupia ndole.”

16Nio bamureerera ndala mala abareeba ali, “Kumurwe ne lisina liilikho bia naanu?” Bamukobosia bali, “Bia Kaisari.” 17Yesu abakobosia ali, “Khwako, elesia Kaisari biili bia Kaisari ne eelesia Wele biili bia Wele.”

Mala baba ne liuka khu Yesu.

Lireeba khuloondekhana ne lilamukha

(Mat. 22.23-33; Lk. 20.27-40)

18 # Bikh. 23.8 Balala khu Basatukayo, balomanga bali babaandu se balilamukha mu bafu tawe, bacha khu Yesu baloma bali, 19#Likh. 25.5 “Omwekisia, Musa akhuandikila efwe Lilaka lino: ‘Omundu aba ne afwa mala aalekha omukhasi okhali na mwana tawe, wandaaye owo mundu oyo khukhwola eele khu namulekhwa yuno nio banyoole babaana balaangilwe khu mundu owafwa oyo.’ 20Babao basoleeli saba, omukhulu areera omukhasi mala afwa busa khaba mwana tawe. 21Owa khabili eela khu mukhasi yuno mala yesi aafwa busa ario khaba mwana tawe, kaaba kario akhaba wandaaye owa khataru aafwa ario. 22Kaaba kario khu boosi. Boosi saba beela khu mukhasi yuno mala bafwa bario mwana tawe, ekhumaliilikha omukhasi chana yesi aafwa. 23Babaandu bano ne balilamukha, omukhasi yuno aliba owa naanu? Sikila boosi saba baba baseecha bewe.”

24Yesu abakobosia ali, “Mwekhiikhile! Kano kakila ne mukhamanyile kamaandiko namwe bunyali bwa Wele tawe. 25Sikila nga bafu ne bakhalamukhe, baliba nga malaika mwikulu mala se bakhareerane tawe. 26#Khur. 3.6 Khuloondekhana ne bafu khulamukha, khaba enywe mukhasomakho mu Sitabu sia Musa kamakhuwa ke sichakha sisiaba ne siyia tawe ku? Mu bweene omwo kaandikwa kali Wele aboolela Musa ali, ‘Ndi Wele owa Aburahamu Wele owa Isaaka lundi Wele owa Yakobo.’ 27Ali Wele owe balamu se ali owe bafu tawe, mwekhiikhile lukali po.”

Lilaka liboofu

(Mat. 22.34-40; Lk. 10.25-28)

28 # Lk. 10.25-28 Omwekisia owe Lilaka abao owaulila embakha eyo. Abona ali Yesu akoboosie Basatukayo likobosio lilayi, khwako echa niio Yesu aba areeba ali, “Lilaka siina likhila kamalaka koosi?”

29 # Likh. 6.4-5 Yesu aakobosia ali, “Liikhila koosi nilieli, ‘Ee Isiraeli rekeeresia! Omwami Wele, Wele wefwe, Omwami ali mulala. 30Siima Omwami Wele wowo ne kumwoyo kwowo kwoosi, ne liiba liowo lioosi, ne kamebaasio kowo koosi lundi ne kamaani kowo koosi!’ 31#Bal. 19.18 Lilaka lia khabili khukhila koosi nilio lino: ‘Siima owasio nga wesiima wamwene.’ Mbao lilaka liliindi liboofu liikhila kabili kano tawe.”

32 # Likh. 4.35 Omwekisia owe Lilaka aboolela Yesu ali, “Walomile bulayi Omwekisia. Lili lia ng'ali nga noboola oli Omwami yeng'ene niye Wele lundi mbao wele okundi tawe ne akhali niye. 33#Hos. 6.6 Khukhwola omundu asiime Wele ne kumwoyo kwewe kwoosi, ne kamebaasio kewe koosi, ne kamaani kewe koosi; lundi khukhwola asiime owasie nga esiima omwene. Lili liboofu khuria kabili kano khukhila khurusia biianwa bie bibiaayo nende bibiindu bie khukhwosia khu Wele.”

34Yesu abona nga nilwo akobosie sikesi mala amuboolela ali, “Se oli aleeyi khukhwama khu Bwami bwa Wele tawe.”

Enyuma wa kano se abao yesi yesi owanyindaalila khureeba Yesu lireeba liosi liosi tawe.

Lireeba Kristo niye naanu?

(Mat. 22.41-46; Lk. 20.41-44)

35Nga nilwo Yesu aba ne ekisia mu Lukaangu areeba lireeba ali, “Linyalikhana liriena baandiki khuboola bali Kristo aliama mu lisaaye lia Daudi? 36#Chiny. 110.1 Daudi omwene aloma khubirira mu Roho Omutakatifu ali,

‘Omwami aaboolela Omwami wase ali,

Yikhala ano khu mukhono kwase kumuseecha,

khukhwola nga ndara basiku bowo boosi aasi mu bikele biowo.’

37Daudi omwene amulaanga ali, ‘Omwami,’ nio kaba kariena Kristo ama mu lisaaye lia Daudi?”

Yesu akaambila babaandu khuloondekhana ne baandiki be lilaka

(Mat. 23.1-36; Lk. 20.45-47)

Babaandu bakali baba barekeeresie Yesu ne busangaafu. 38Nga nilwo aba ne ekisia aloma ali, “Loleelela lukali baandiki babasiima khukeendela chikaanjo ne khukhesibwa mu ngila eye buuri khu soko. 39Barobora chindebe chindayi mu sinakooki ne abuundu we lukoosi mu naikara. 40Barumikhira bubweyaangu buno khukhwila khu banamulekhwa ne khubanuula kimiaandu kiabwe mala beyekesia mu khusaba lisaba lileeyi. Siiukuumo siabwe siliba sikali lukali.”

Siianwa nisio namulekhwa arusia

(Lk. 21.1-4)

41Nga Yesu aaba ne ekhaale siimbi ne lisanduku lie libiikhilo lie Lukaangu, aloleelela babaandu nga barusianga biianwa, baiinda bakali baraamo chirupia chingali. 42Ekhumaliilikha namulekhwa omutaambi echa araamo bisimiri bia koopa bibili bitiiti, bibioola erupia ndala. 43Nio Yesi alaanga babeeka bewe alala mala aloma ali, “Ng'ali muboolela enywe ndi, namulekhwa yuno areere mwisanduku lie siianwa lino sikali khukhila omundu okundi yesi yesi. 44Sikila babaandi bareeremo nisio abeele babikhile khu buiinda bwabwe, ne kakhali namulekhwa yuno, mu mutaambo kwewe areeremo bioosi nibio abeele nabio, arusiisie sioosi nisio abeele nasio khulwe khumenya.”

Currently Selected:

Mk. 12: LUBUKUSU

Highlight

Copy