Mat. 2

Bakesi babaama ebukwe

1Yesu nga ne asaalwa mu lukoba lwa Betelehemu e Buyuda mu ndaalo cho mwami Herodi, babaandu bakesi baama ebukwe becha Yerusalemu, ne bareeba bali, 2“Omwana osaalilwe khuba Omwami owe Bayaudi ali waena? Sikila khwaboone eng'enieesi yewe ebukwe, mala khwechile khumusaaya.” 3Nga omwami Herodi aaulila kano, eendekhelela, akhaba be mu Yerusalemu boosi. 4Abuusia basaayi bakhulu ne baandiki be Lilaka boosi, khukhwenya khumanya niio Kristo alisaalilwa.

5Nio bamukobosia bali, “Mu Betelehemu, lwe Buyuda, sikila kano niko omung'oosi aandika,

6 # Mik. 5.1 ‘Ne ewe, Betelehemu, mu sibala sia Yuda,

se olaba omutiiti mu ngoba che Buyuda tawe,

sikila omuruki okhaame mwiwe akhaaye babaandu base Isiraeli.’ ”

7Nio Herodi alaanga bakesi abo mu bwikisi amanyila elala khukhwama khu nibo siise nisio eng'enieesi yabonekha; 8mala aabaruma Betelehemu, aabalaka ali, “Khemuche muenje omwana oyo bulayi, ne mumalile khumunyoola mundereere likhuwa nio sesi nje musaaye niye.”

9Nga bamala khuulila ko mwami, barekukha bacha; oli basiili, babona eng'enieesi niyo babona ebukwe yarangiire, yecha yema abuundu niio omwana aba. 10Ne nga babona eng'enieesi chana eyo basangaala, bekhoya lukali po, 11oli bengila munju, babona Omwana ne maawe Maria; basaaya omwana ne khukangulula chioochwa chabwe, bamuturira esahabu ne bimuli bie kumuuya kumulayi nende manemane.

12Nio Wele aabakaania mu marooro ali bakhakobola wa Herodi tawe, barekukha bela mu sibala siabwe, khubirira khu ngila ekiindi.

Khukhwilukhila e Misiri

13Baba oli bamalile khurekukha, malaika owa Wele Omunyali Owa Bioosi abonekhela Yosefu mumarooro aaloma ali, “Yinyokha obukule Omwana ne maawe, wilukhile e Misiri, mala omenyeyo nabwila ndikhureerera likhuwa, sikila Herodi alikhuyiima omwana enya khumwiira.”

14Yosefu enyokha siilo aabukula Omwana ne maawe, acha e Misiri. 15#Hos. 11.1 Bamenyayo nabwila Herodi afwa. Kano kaba kario khukhwichusia niko Omwami aboola khubirira mu Mung'oosi ali, “Nalaanga Omwana wase arure e Misiri.”

Liliirwa lie Babaana

16Herodi nga amanya ali bakesi chana abo bamubachile, aba ne lirima likali, abisia lilaka lie khukhwira babaana be siseecha boosi be bukhulu bwe kimiiko kibili khukhwila aasi mu Betelehemu, ne birekere biili siimbi nalwo, khukhwamila khu siise nisio amanyilamo bung'ali khukhwama khu bakesi chana abo khuloondekhana ne siise nisio eng'enieesi yabonekhelamo. 17Nio niko omung'oosi Yeremia aaloma kekholekha,

18 # Yer. 31.15 “Kumumilo kuuliilikha mu Rama,

ne bililo birafu ne khusooma.

Raeli alila babaana bewe,

alobile khuolelesibwa,

sikila boosi babunile.”

Khukobola khukhwama e Misiri

19Nga Herodi ne afwa, malaika wo Mwami abonekhela Yosefu mu marooro e Misiri, amuboolela ali, 20“Yinyokha obukule Omwana ne maawe, okobole mu sibala sia Isiraeli, sikila abo babenyanga khukhwira Omwana bafwa.” 21Nio Yosefu enyokha abukula omwana ne maawe, mala bakobola mu sibala sia Isiraeli.

22Ne nga Yosefu aulila bali Akelasi aamiie e Buyuda mu bweyaangu bwa raraawe Herodi, aria khucha ebweeneyo, nga nilwo aboolelwa mu marooro, akobola mu sibala sia Kalilaya. 23#Mk. 1.24; Lk. 2.39; Yn. 1.45 Khwako acha khumenya mu lukoba lwa Nasareti, nio kakaboolwa ne bang'oosi kechusibwe bali, “Alilaangwa Omunasareti.”

Currently Selected:

Mat. 2: LUBUKUSU

Highlight

Copy