Lk. 4

Likhakwa lia Yesu

(Mat. 4.1-11; Mk. 1.12-13)

1Yesu akobola khukhwama e Yoritani ne echuule Roho Omutakatifu mala arangirirwa ne Roho ayilwa mu sichiimi, 2niio akhakwa ne Sietani khu ndaalo kamakhumi kane. Mu siise esio sioosi se aliakho siakhulia tawe, oli siise esio siawa enjala yamulia.

3Sietani amuboolela ali, “Ewe waaba ne oli Omwana owa Wele boolela libaale lino likele siakhulia.”

4 # Likh. 8.3 Nio Yesu amukobosia ali, “Liiandiko liboola lili, ‘Omundu sanyala khumenya sikila siakhulia siong'ene tawe.’ ”

5Nio Sietani amuniinia khu sikulu mala amwekesia khangu bubwami bwe sibala sioosi. 6Sietani amuboolela ali, “Ndakhuelesia ewe bunyali buno ne buiinda buno bwoosi. Naebwa bioosi, mala ese nyala naelesia omundu yesi yesi niye samwene nenya. 7Nono, bino bioosi bilaba bibiowo waba ne usaaya ese.”

8 # Likh. 6.13 Yesu akobosia ali, “Liiandiko liboola lili, ‘Saaya Omwami Wele wowo, ne khumukhalaabanila niye yeng'ene!’ ”

9Nio Sietani amubukula amuyila Yerusalemu, mala amura khu sisekese sie Lukaangu, mala amuboolela ali, “Ewe waaba ne oli Omwana owa Wele, suna aasi khukhwama ano. 10#Chiny. 91.11 Sikila liiandiko liboola lili, ‘Wele alaboolela malaika bewe bakhuliinde bulayi.’ 11#Chiny. 91.12 Lundi liboola lili, ‘Balakhutiila mu makhono kabwe nio okhetuya khu mabaale tawe.’ ”

12 # Likh. 6.16 Ne Yesu akobosia ali, “Liiandiko liboola lili, ‘Okhakhaka Omwami Wele wowo tawe.’ ”

13Nga Sietani ne amala khukhaka Yesu mu buli ngila, amulekha khulwe siise.

Yesu arakikha kimilimo kiewe mu Kalilaya

(Mat. 4.12-17; Mk. 1.14-15)

14Nio Yesu akobola mu Kalilaya mu maani ka Roho Omutakatifu. Lilomaloma lie babaandu khu niye liasalaanila mu sibala esio siosi. 15Ekisia mu masinakooki mala aebwa efuma ne babaandu boosi.

Babaandu baloba Yesu e Nasareti

(Mat. 13.53-58; Mk. 6.1-6)

16Nio Yesu acha e Nasareti, niio achoela, mala oli mu Sabato acha mu sinakooki nga buli lwoosi. Enyokha khusoma kamaandiko 17mala bamuelesia sitabu sio mung'oosi Isaya. Abambula sitabu mala anyoola abuundu niio kaandikwa kali,

18 # Isa. 61.1-2 “Roho owo Mwami ali khwise,

sikila andobora ese khureera Elomo Endayi khu bataambi.

Andumire khukhwilwacha bulekhuule khu baambe,

khukhola baabofu babone, khulekhuula babapisibwa sibi,

19ne khuboola ndi siise siolile,

nisio Omwami alaonia babaandu bewe.”

20Yesu afuunikha sitabu, asiakanisia omukholi mala ekhala aasi. Babaandu boosi mu sinakooki baunguusa Yesu 21nga ababoolela ali, “Endaalo yino kamakhuwa ke liiandiko kano kechusibwe mu moni chenywe.”

22Boosi basiimisibwa naye mala bauka bulayi bwe kamakhuwa niko alomaloma. Baloma bali, “Se ali okhwa Yosefu ta ku?”

23Ababoolela ali, “Ndi nang'ali ndi mulamboolela lusimo luno, ‘Musilikhi, yionia wamwene.’ ” Lundi mulamboolela khukhola mu lukoba lwase lwengo bibiindu bibieene ne bibieene nibio mwauliile bali biekholeekhe mu Kaperinaumu. 24#Yn. 4.44 Yesu ababoolela ali, “Ng'ali muboolela enywe ndi, se aliio omung'oosi ofukiililwa mu sibala siewe tawe.” 25#1 Bab. 17.1 Muboolela enywe bung'ali ndi, “Babao banamulekhwa bakali mu Isiraeli mu ndaalo cha Elicha, nga efula ne yabira kimiiko kitaru ne kimieesi sita, mala enjala engali yaba mu sibala mwoosi. 26#1 Bab. 17.8-16 Ne Elicha se arumwa khu mundu yesi yesi mu Isiraeli tawe, ne kakhali arumwa khu namulekhwa yeng'ene, owamenya mu e Sarefati mu sibala sia Sidoni. 27#2 Bab. 5.1-14 Lundi be bulwaale bwe kamakele babaao bakali mu Isiraeli mu ndaalo cho mung'oosi Elisha, ne se aliio namulala khu nibo owaonisibwa tawe, nakhali Naamani owe Siria yeng'ene.”

28Boosi ba baaba mu sinakooki omwo, nga baulila kano baambwa lirima.

29Mala benyokha basindikha Yesu bamurusia enje we lukoba, bamuniinia khu sikulu nisio bombakhakho lukoba lwabwe. Beenya bamumwaate emaayo. 30Ne kakhali ababiramo busa echiila.

Omundu owaba ne sisieeno

(Mk. 1.21-28)

31Mala Yesu ekha acha e Kaperinaumu lukoba lwa Kalilaya, niio ekisia mu Sabato. 32#Mat. 7.28-29 Babaandu bauka kamekisio kewe lukali sikila lilomaloma liewe liaba lie bunyali. 33Ne omundu we sisieeno aaba mu sinakooki, mala akukuula lukali ali, 34“Aa Yesu owe Nasareti, ewe wenya khukhola siina khwifwe? Wenya khukhubunia efwe? Ese khumanyile ndi ewe oli Omutakatifu owa Wele.” 35Nio Yesu ayibila sisieeno chana naloma ali, “Sila, mala omururemo! Mala sisieeno siapa aasi omundu chana ebweeni we babaandu mala siamururamo busa khumuumisia tawe.”

36Babaandu boosi bauka, mala bareebana bali, “Makhuwa siina kano? Sikila khulwe bunyali ne kamaani akhokhela bisieeno mala bicha!” 37Mala kamakhuwa ka Yesu kasalaanila buli abuundu mu lukoongo olwo.

Yesu aonia babaandu bakali

(Mat. 8.14-17; Mk. 1.29-34)

38Yesu arura mu sinakooki mala acha engila munju mwa Simoni. Masalaawe owa Simoni aba alwala bulwaale bwe kumureengo, mala baboolela Yesu bulwaale bwa masalaawe chana. 39Yesu amwimao mala ayibila bulwaale buwe mala bwawa. Omuloosi chana enyokha khangu ne khu bayeeta khurekekha siakhulia.

40Nga enyanga yaba nelikho ekwa, boosi ba baaba ne basaale balwala bulwaale chingano na ngano, babareera khu Yesu ara kamakhono kewe khu buli sia mulala, mala abaonia boosi. 41Bisieeno biarura mu baandu bakali, ne bilila bili, “Ewe oli Omwana owa Wele!”

Ne kakhali Yesu abikhokhela ne se abielesia kumunwa bilomalome lundi tawe, sikila biamanya bili niye ali Kristo.

Yesu elwacha mu sinakooki chingali

(Mk. 1.35-39)

42Oli busia Yesu arura mu lukoba acha abuundu niio omundu akhaaba tawe. Babaandu barakikha khumuyiima mala nga bamunyoola khwenya abarureo tawe, 43ne kakhali ababoolela ali, “Khukhwola nilwache Elomo Endayi eye Bubwami bwa Wele mu ngoba chichiindi chosi; sikila ako niko Wele anduma khole.”

44Nio elwacha burume mu chisinakooki mu sibala sioosi.

Currently Selected:

Lk. 4: LUBUKUSU

Highlight

Copy