Lk. 23

Yesu ayiilwa ebweeni wa Pilato

(Mat. 27.1-2,11-14; Mk. 15.1-5; Yn. 18.28-38)

1Be kumuse abo boosi bayila Yesu ebweeni wa Pilato. 2Mala barakikha khu musitaka ne baloma bali, “Khunyoolile omundu yuno atiimia babaandu befwe, ne khu bakaania ali bakharuunga busuuru khu Kaisari tawe, lundi omwene elaanga ali, niye Kristo, Omwami.”

3Nio Pilato amureeba ali, “Ewe oli Omwami owe Bayaudi?” Yesu amukobosia ali, “Ewe walomile orio.”

4Pilato aboolela basaayi bakhulu ne sipupu ali, “Se nanyoolile likila mukhalakile tawe.”

5Ne kakhali bakhayilila lukali bali, “Khulwe liliekisia liewe alikho aachilisia babaandu khukhola sisiayuumba mu Buyuda mwoosi. Arakikhira mu Kalilaya luno oolile ano.”

Yesu ayiilwa ebweeni wa Herodi

6Nga Pilato aulila kano, areeba ali, “Omundu yuno Omukalilaya?” 7Ne nga amanya ali Yesu ama mu lukoongo lurukwa ne Herodi, amuruma khu Herodi, owaba yesi nali mu Yerusalemu siise esio. 8Herodi nga abona Yesu, asangaala lukali sikila aba ekoomba lukali khumubona sikila aba aulila ka kewe mala eenyanga khubona Yesu nakhola kamayia. 9Nio Herodi areeba Yesu kamareeba kamakali, ne kakhali Yesu se amukobosiakho tawe. 10Basaayi bakhulu ne baandiki becha ebweeni mala basitaka Yesu lukali. 11Herodi ne banamae bewe bakholela Yesu siienyameno ne khumulekelesia mala bamufwara engubo eye lukoondo lulayi lukali mala bamukobosia wa Pilato. 12Endaalo eyo Herodi ne Pilato baamba busaale, kano ne kakhakholekha tawe, baba basiku.

Yesu akhalakilwa khufwa

(Mat. 27.15-26; Mk. 15.6-15; Yn. 18.39—19.16)

13Pilato alaanga alala basaayi bakhulu, babemeelesi ne babaandu, 14mala ababoolela ali, “Mureerire omundu yuno ebweeni wase ne muboola muli abeele alikho atiimia babaandu. Ne enyuma we khumuocha ebweeni wenywe, se namunyoolilekho likoso liosi liosi lie khumukhalakila tawe. 15Ne akhaba Herodi yesi se amunyoolilemo libi liosi liosi tawe, sikila namukoboosie khwifwe. Omundu yuno se akholilekho sisiindu siosi siosi sikila erwe tawe. 16Khwako ndamupa biboko mala mulekhuule ache.”

[ 17Buli lwosi mu naikara eye Pasaka Pilato abalekhuulilanga omuboe mulala.]#23.17 Chibibilia chindala se chili ne lunyilili luno tawe.

18Babaandu boosi bayokela ne baloma bali, “Mwire! Khulekhuulile Baraba!” 19(Bara Baraba mu siboe sikila sisiayuumba sisiaba mu lukoba ne bubwiri.)

20Pilato enya khulekhuula Yesu, khwako asaaya sipupu lundi. 21Ne kakhali bayokela bali, “Mubaambe! Mubaambe!”

22Pilato ababoolela lukhola khataru ali, “Siina sikila, akholile mabi siina? Se namunyoolilekho kamabi kakila erwe tawe! Khwako, ndamupa biboko mala mulekhuule ache.”

23Ne kakhali bachiililila khuyokela lukali bali, Yesu khukhwola abaambwe, ne ekhumaliilikha lilienya liabwe liafukiililwa. 24Nio Pilato akhalakila Yesu khuloondekhana ne lilienya liabwe. 25Nio alekhuula Baraba niye benyaanga, mala abaelesia Yesu bakhole nga benyile.

Yesu abaambwa khu musalaba

(Mat. 27.32-44; Mk. 15.21-32; Yn. 19.17-27)

26Nio banamae babukula Yesu bacha naye. Nga baba ne balikho bacha, bakaanana omundu khukhwama Kireni owalaangwa Simoni ne alikho engila mu lukoba khukhwama enje. Bamutiila mala bamurakho asutile Yesu kumusalaba amuloondekho. 27Babaandu bakali bamuloondakho, bakhasi ba baba mu sipupu omwo balila ne khukhwesasaara. 28Yesu abekhebukha mala ababoolela ali, “Bakhaana ba Yerusalemu! Mukhandila ese tawe, ne kakhali khemwelilile mwabeene ne khulwe babaana benywe. 29Sikila chindaalo chilikho chiicha, nicho babaandu baliloma bali, ‘Bakuumba bali ne khabi, ne chinda chikhasaalakho namwe kamaturu kakhanuuniakho tawe!’ 30#Hos. 10.8; Lif. 6.16 Esio siliba siise nisio babaandu baliboolela bikulu bali, ‘Khukwekho!’ Lundi baliboolela chingulu bali, ‘Khukise!’ 31Ne babaandu baaba ne bakhola bario khu murongooro kumubisi, kacha khuba karie khu mwomu?”

32Babaandu babili ba baaba banuuli bayilwa khukhwirwa alala ne Yesu. 33Nga boola abuundu aalaangwa, “Siaanga,” Babaambilao Yesu, ne banuuli abo, mulala kumukhono kwa Yesu kumuseecha no kundi kumukhasi. 34#Chiny. 22.18 Yesu aloma ali, “Paapa babeele sikila se bamanyile niko bakhola tawe.”#23.34 Chibibilia chindala se chili ne kamakhuwa kano tawe.

Baapa ekura khukabana chingubo chewe. 35#Chiny. 22.7 Babaandu bemao baloleelela, ne kakhali babemeelesi be Bayaudi bamukholela embelekeu, ne baloma bali, “Aonianga babaandi, ne aaba nali Kristo lundi omurobore owa Wele lekha eonie omwene!”

36 # Chiny. 69.21 Basikari bosi bamukholela siienyameno ne khumua endali endulu, 37mala baloma bali, “Waaba ne oli Omwami owe Bayaudi yeonia wamwene!”

38Amurwe wewe kabao kamaandiko kano, “Yuno niye Omwami we Bayaudi.”

39Mulala khu banuuli owaba nali khu musalaba aboolela Yesu ali, “Ewe se oli Kristo? Yeonia mala okhuonie nafwe!”

40Ne okundi oyo arafwira owasie oyo aloma ali, “Ewe se oria Wele tawe? Akhaba ne khukhalakiilwe kamafwaanane. 41Ne efwe ng'ali, mu bung'ali khwanyoolile kumuruuru kwe bikholwa biefwe ne kakhali omundu yuno se akholile sisiindu siibi tawe.” 42Nio aboolela Yesu ali, “Ne woola mu Bwami bwowo ukhebulile.”

43Yesu amukobosia ali, “Khusuubisia ndi luno olaba alala nase mu Paratiso.”

Lifwa lia Yesu

(Mat. 27.45-56; Mk. 15.33-41; Yn. 19.28-30)

44Oli choola embi chisa sita che kumuusi, sisiilima siaamba khu sibala sioosi khukhwola chi saa tisa che kumuusi. 45#Khur. 26.31-33 Mala epasia eye mu Lukaangu yatabukhamo bitonyi bibili. 46#Chiny. 31.5 Nio Yesu alila ne kumumilo kumurafu ali, “Paapa, nda kumwoyo kwase mu makhono kowo!” Oli aboola kano ekhilisia kumuuya mala akwiisia kumwoyo.

47Omukhulu owe kamae abona kakekholeekhe, afumia Wele naloma ali, “Ng'ali omundu yuno se abeelekho ne bubi bwosi bwosi tawe.”

48Ne babaandu boosi ba baaba ne babuusiisie alala khuloleelela nga babona kakekholeekhe, boosi barekukha bakobola chingo chabwe ne barere kamakhono kabwe emukoongo mu bubeeleli. 49#Lk. 8.2-3 Ne boosi babamanya Yesu alala ne bakhasi babamuloondakho khukhwama Kalilaya bema sinao khuloleelela mala babona bibiindu bino bioosi.

Lisiikhwa lia Yesu

(Mat. 27.57-61; Mk. 15.42-47; Yn. 19.38-42)

50Abao omundu mulala owalaangwa Yosefu khukhwama mu lukoba lwe Buyuda lwa Arimatea. Aaba mulala khu be kumuse, omundu omulayi lundi omuluungi. 51Se afukiilisiana ne babasie mu bukhalaki bwabwe khu Yesu tawe, alindiililanga liliicha lie Bubwami bwa Wele. 52Omundu yuno acha khu Pilato asaba amuelesie kumulaambo kwa Yesu. 53Nio akurusia khu musalaba, akuulukusilia mu suuka eya katani, akusiikha mu ng'ani embia niyo aabeecha mu lwanda niyo yaba bakhasiikhamo omundu tawe. 54Yaba endaalo eye khukhwerekekhera e sabato sikila e sabato yaba eli siimbi khurakikha.

55Bakhasi ba baaba ne baloondile khu Yesu khukhwama e Kalilaya, bacha ne Yosefu, mala babona eng'ani lundi babona nga kumulaambo kwa Yesu ne kwasiikhwamo. 56#Khur. 20.10; Likh. 5.14 Bakhasi abo bakobola engo mala bang'oona bibiindu biunyanga bulayi ne kamafura kaunyanga bulayi khulwe kumulaambo kwa Yesu.

Baola mu Sabato khuloondekhana ne Lilaka.

Currently Selected:

Lk. 23: LUBUKUSU

Highlight

Copy