Lk. 20

Lireeba khu bunyali bwa Yesu

(Mat. 21.23-27; Mk. 11.27-33)

1Endaalo ndala nga Yesu aba mu Lukaangu ne alikho ekisia babaandu ne khukhwilwacha Elomo Endayi, Basaayi bakhulu ne baandiki be lilaka ne babemeelesi becha alala, 2ne bamuboolela bali, “Khuboolele bibiindu bino olabikholanga mu bunyali siina? Naanu owakhuelesia ewe bunyali buno?”

3Yesu abakobosia ali, “Akhaba sesi ndamureeba mumboolele, 4Yoana aamia waena bunyali bwe khubatiisia, khu Wele namwe khu baandu?”

5Barakikha khuyingana akari wabwe babeene ne babeene bali, “Khwaloma khuli, ‘Bwama khu Wele’; alaboola ali ‘Siina, ne mukhamusuubila?’ 6Ne khwaboola khuli, ‘Bwama khu baandu’, babaandu bano boosi balakhuupa kamabaale; sikila basuubila bali Yoana aaba omung'oosi.” 7Nio bamukobosia bali, “Se khumanya niio bwama tawe.”

8Ne Yesu ababoolela ali, “Akhaba sesi, se muboolela kholaanga bibiindu bino mu bunyali bwa naanu tawe.”

Lukano lwe bakholi mwiruuti lie kimisabibu

(Mat. 21.33-46; Mk. 12.1-12)

9 # Isa. 5.1 Nio Yesu arakikha khuboolela babaandu lukano ali, “Abao omundu owabiaala liruuti mala alielesia bakholi baliemo, mala acha mu sibala sisiindi amenyayo siise sileeyi. 10Nga siise sie khubuta chisabibu sioola aruma nasioobi wewe khu bakholi abo, bamuelesie sikelo siewe sie chisabibu nicho babutile, ne kakhali bakholi abo bamupa mala bamutimania akobola engo mu makhono busa. 11Omwene liruuti aruma nasioobi okundi mala bamukholela ke chisoni mala yesi bamutimania akobola engo makhono mataaka. 12Omwene liruuti oyo aruma nasioobi owa khataru; yuno bamwara kamakuma mala bamumwaata enje we liruuti. 13Nio, omwene liruuti aloma ali, ‘Ndakhola siina? Ndaruma Omwana wase Omusiime wakana banyala bamuria!’ 14Nga bakholi be mwiruuti abo bamubona, baboolana bali, ‘Yuno niye omwana wo mwene liruuti lino. Khekhumwire nio efwe khwiile khu miaandu.’ 15Nio, bamuyila enje we liruuti, mala bamwiira.”

Yesu areeba ali, “Nono omwene liruuti alikhola siina bakholi be mwiruuti abo? 16Aliicha mala eere bakholi be mwiruuti mala areemo bakholi babaandi.”

Nga babaandu baulila kano baloma bali, “Se kakhoya kaaba kario tawe!”

17 # Chiny. 118.22 Yesu abalola mala abareeba ali, “Nono liiandiko lino liboola siina?

‘Libaale nilio babombakhi baloba bali se lili ne bukhala tawe,

liliene ne liliene liabeele lie bukhala khukhila koosi.’

18Buli mundu okwa khu libaale elio alitonyekhakamo bitonyi, ne likwa khu mundu lilimutubundulaka.”

Lireeba khu buruungi bwe busuuru

(Mat. 22.15-22; Mk. 12.13-17)

19Baandiki ne basaayi bakhulu bakhaka khuamba Yesu abwene ne abwene, sikila bamanya bali aboolile lukano luno khubekiicha nibo. Ne kakhali baria babaandu. 20Nio bamwayilisia banyoole bubweyaangu. Baonga babaandu balala, mala babaruma khu Yesu nga bayooti. Bekhola khuba balayi khu niye nio bali bamutiile khu niko aloma mala bamuambe bamuyile khu be bunyali mala bamusitake khu muruki. 21Bayooti abo bareeba Yesu bali, “Omwekisia, khumanyile khuli olomalomanga mala wekisia buluungi ne soyekhelanga lubeka lulala tawe, ne ng'ali wekisianga bung'ali bwe ngila eya Wele. 22Khuboolele, lilaka likhufukiilila efwe khuruunga busuuru khu Kaisari, namwe tawe?”

23Yesu amanya kumureko kwabwe mala ababoolela ali, 24“Njekesie erupia. Kumurwe ne lisina liilikho bia naanu?” Bamukobosia bali, “Bia Kaisari.” 25Nio Yesu ababoolela ali, “Khwako, eelesia Kaisari biili bia Kaisari ne eelesia Wele biili bia Wele.”

26Se banyala khunyoola ke khu musitakilakho ebweeni bwe babaandu tawe ne kakhali bauka likobosia liewe mala basila busa.

Lireeba khuloondekhana ne lilamukha

(Mat. 22.23-33; Mk. 12.18-27)

27 # Bikh. 23.8 Basatukayo ba balomanga bali, lilamukha se liliio tawe, 28#Likh. 25.5 becha khu Yesu, bamureeba bali, “Omwekisia, Musa aakhuandikila efwe lilaka ali, omulebe ne afwa ne alekha omukhasi ne akhali no mwana tawe, wandaaye khukhwola eele khu namulekhwa mala asaalile wandaaye owafwa oyo babaana. 29Nono babao babaandu saba bo mundu mulala. Omubele aareera omukhasi mala omwene aafwa ne asiili khunyoolakho omwana tawe; 30mala oomuloonda eela khu namulekhwa oyo, yesi aafwa, 31owa khataru yesi aamwiilakho mala kaaba busa kario khu boosi saba, se banyoola babaana tawe. 32Lumaliilisi, aakhaba namulekhwa oyo yesi aafwa. 33Nono mu khulamukha, namulekhwa oyo aliba mukha naanu? Sikila boosi saba bamenya naye nga omukhasi wabwe.”

34Yesu aabakobosia ali, “Babaandu be selukho yino bareerana, 35ne baseecha ne bakhasi baakholaane khulamukha mala bamenye mu siise sisiicha se balireerana tawe. 36Se banyala bafwa lundi tawe, sikila bakhabe busa nga malaika bakhanyala bafwa tawe, lundi bali babaana ba Wele, sikila balamuukhe khukhwama mu lifwa. 37#Khur. 3.6 Lundi Musa ekesia abuwaanga ali babafwa balilamukha. Mumakhuwa ke sichakha siiya ne kumulilo Musa alaanga Omwami Wele Omunyali Owa Bioosi ali, ‘Wele owa Aburahamu, Wele owa Isaaka, ne Wele owa Yakobo!’ 38Wele ali Wele we balamu se ali Wele we bafu tawe. Sikila khu niye boosi bali balamu.”

39Balala khu baandiki bakobosia Yesu bali, “Omwekisia elio likobosio lilayi!” 40Se bakhakakho lundi khu mureeba lireeba tawe.

Lireeba Kristo niye naanu?

(Mat. 22.41-46; Mk. 12.35-37)

41Yesu abareeba ali, “Banyala baloma bariena bali Kristo ali omwana owa Daudi? 42#Chiny. 110.1 Sikila Daudi omwene aboola mu sitabu sie Chinyimbo ali,

‘Omwami aaboolela Omwami wase ali,

Yikhala kumukhono kwase kumuseecha

43nabwila nga khola basiku bowo

babe nga endebe eye khuswalakho bikele biowo.’

44Khwako Daudi amulaanga ali, ‘Omwami,’ nono linyalikhana liriena Kristo abe omwana owa Daudi?”

Yesu akaambila babaandu khuloondekhana nende baandiki be lilaka

(Mat. 23.1-36; Mk. 12.38-40)

45Nga babaandu boosi baba ne bamurekeeresia, Yesu aboolela babeeka bewe ali, 46“Khe mwiyaye khuloondekhana ne baandiki be lilaka babasiima khukeendela chikaanjo ne khukhesebwa mu buriaani khu chisooko. Ne khu robora chindebe chindayi mu chisinakooki ne abuundu e lukoosi mu naikara. 47Bebukulila bie banamulekhwa, ne eyi bekholesia mu khusaba kamasaba kamaleeyi! Balinyoola siiukuumo siboofu khukhila boosi!”

Currently Selected:

Lk. 20: LUBUKUSU

Highlight

Copy