Lk. 13

Yekanila namwe mufwe

1Siise esio babaandu balala baboolela Yesu ke Bakalilaya nibo Pilato eera atubasia kamafuki kabwe ne chimbosio chabwe. 2Nio Yesu abakobosia ali, “Enywe mwibaasia muli Bakalilaya bano baba babooni lukali khukhila Bakalilaya babaandi boosi, sikila ne banyaasibwa bario? 3Muboolela ndi se kali kario tawe; ne mukhekanila bubwoni bwenywe tawe, mwesi mulabuna nga nibo. 4Namwe ekhumi na munaane nibo lisiisi lie khulindilakho mu Siloamu liakwakho liera abo, enywe mwibaasia muli baba babooni lukali khukhila babaandi boosi bamenyile mu Yerusalemu? 5Muboolela ndi se kali kario tawe, ne mukhekanila bubwoni bwenywe, mwesi mulabuna nga nibo.”

Kumutuli kukhaama tawe

6Nio Yesu ababoolela lukano luno ali, “Omundu aabiaala kumutuli mu mukuunda kwewe; acha khubutakho chinduli mala khunyoolakho tawe. 7Nio aboolela omulimi wewe ali, ‘Khu miiko kitaru nichaanga ndi mbutekho chinduli ne kakhali se njinyoolangakho tawe. Khwako khokureme kurureo, siina sikila kwonake busa kamaloba?’ 8Ne kakhali omulimi amukobosia ali, ‘Omwami, lekha kube khulwe kumwiiko kuno kwong'ene, ndakwakila mala ndemo esiina. 9Ne kwaaba ne kukhaame chinduli kumwiiko kukwiicha, bulayi, ne kwaaba ne kukhaama tawe, aba nono onyala wakurema.’ ”

Yesu aonia omukhasi omuleme khu ndaalo eya Sabato

10Yesu aba alikho ekisia mu sinakooki mu ndaalo eye Sabato. 11Omukhasi owaba ne sisieeno sisiamukhola efumba kumukoongo, abeele se anyala akololokha tawe. 12Ne nga Yesu ne amubona, amulaanga mala amuboolela ali, “Mukhasiwe, oli omulekhuule khukhwama mu bulwaale bwowo.” 13Yesu amurakho kamakhono aona ne khukololokha khangu, mala omukhasi yuno afumia Wele. 14#Khur. 20.9-10; Likh. 5.13-14 Omwimeelesi owe sinakooki akhalala sikila Yesu aonisie omundu khu ndaalo eya Sabato, nio aboolela babaandu ali, “Chiliio chindaalo sita, che khukhola kimilimo, yiicha mu ndaalo ng'ene echo mala muonisibwe, ne mukhecha mu Sabato tawe!” 15Nio Omwami amukobosia ali, “Babacha enywe! Buli mulala khwinywe, se akangululanga ekhaafu namwe epunda yewe acha khunywesia khu ndaalo eya Sabato tawe ku? 16Oyuno ali owe lisaaye lia Aburahamu niye Sietani ara mu siboe khu miiko ekhumi na munaane, se akhoyeele alekhuulwa khu ndaalo eya Sabato tawe ku?” 17Likobosia liewe lino liaambia basiku bewe chisoni, ne babaandu boosi bekhoya khulwe bibiindu bioosi bie liukia nibio aaba ne akholile.

Lukano lwe khamiicho khe kumupeeli

(Mat. 13.31-32; Mk. 4.30-32)

18Yesu areeba ali, “Bubwami bwa Wele buli nga siina? Nyala nabufwaananisia khu siina? 19Buli nga khamiicho khe kumupeeli nikho omundu abukula mala amiicha mu siluundu siewe, ne khamela, khachoanga kuba kumurongooro mala chinyuni chombakhamo biswi mu sakia chakwo.”

Lukano lwe liimela

(Mat. 13.33)

20Lundi Yesu aboola ali, “Nyala nafwaananisia Bubwami bwa Wele khu siina? 21Buli nga kamamela niko omukhasi aabukula mala aakapaakhila mu bipaange bitaru bie bufu nabwila bufu bwoosi bwayiimba.”

Kumuliango kumunyiki

(Mat. 7.13-14,21-23)

22Yesu achiililila ne lukeendo lwewe lwe khucha Yerusalemu, mala ekisia nabirira mu ngoba ne mu birekere. 23Ne omundu okundi amureeba ali, “Omwami, babaandu baliiona baliba busa bakeekhe bari?”

Yesu akobosia ali, 24Khuboolela ndi, “Khola kamaani wingilile mu muliango kumunyiki sikila babaandu bakali balikhaka khukhwingila ne se balinyala tawe.

25“Omwenenju ne enyokha mala ekalao, mukharakikhe khukhwima enje ne khukhong'oonda khu lwiki ne muloma muli, ‘Omwami khwikulileo.’ Ne alimukobosia ali, ‘Se manya niio mwama tawe.’ 26Ne nanywe mulirakikha khu muboolela muli, ‘Khwalia ne khunywa nawe, lundi wekisia mu lukoba lwefwe.’ 27#Chiny. 6.8 Ne alikobosia ali, ‘Ese muboolela enywe ndi se manya niio mwama tawe, ndureo mweesi mukholanga kamamayaanu!’ 28#Mat. 22.13; 25.30 #Mat. 8.11-12 Ebweeneyo, mukhalile ne khukhwelumakaka nga mu libona Aburahamu ne Isaaka ne Yakobo ne bang'oosi boosi mu Bwami bwa Wele ne enywe mwamwaatiilwe enje. 29Ne baandu baliama ebukwe ne mumbo lundi baliaama ebunaswa ne siafubo mala balikhala khu sialwa mu Bwami bwa Wele. 30#Mat. 19.30; 20.16; Mk. 10.31 Be khunyoa baliba bamaliilisi, ne bamaliilisi baliba be khunyoa.”

Busiime bwa Yesu khu Yerusalemu

(Mat. 23.37-39)

31Siise esio ne sisiene Bafarisayo balala becha khu Yesu bamuboolela bali, “Rura ano oche abuundu aandi, sikila Herodi eenya khukhwira.”

32Nio Yesu abakobosia ali, “Cha muboolele enjusi eyo muli, ‘Luno ne kumuchuli ndarusia bisieeno ne khuonia balwale, ne endaalo eya khataru aba namalile kimilimo.’ 33Ne kakhaba kario khukhwola nje lukeendo lwase endaalo eya luno ne kumuchuli ne busiayo; sikila se buli bulayi omung'oosi khufwila enje wa Yerusalemu tawe.

34“Yerusalemu, Yerusalemu! Wira bang'oosi ne khukhupa kamabaale barumwa nibo Wele arumire khwiwe! Nenyile Khukhwola khenga khubuusia babaana bowo alala nga engokho ebuusianga binywinywi biayo mundaa chayo mala se wenyanga tawe! 35#Chiny. 118.26; Yer. 22.5 Lukaangu lwenywe lwanjuukhwe. Mala muboolela enywe ndi se mulambonakho lundi tawe khukhwola nga muliloma muli, ‘Ali ne ekhabi oyo owichila mu lisina lio Mwami!’ ”

Currently Selected:

Lk. 13: LUBUKUSU

Highlight

Copy