Lir. 28

1Isaaka alaanga Yakobo mala amubiita chikhabi ne amulaka ali, “Okhayila mulala khu bakhaana Bakanaani tawe. 2Yinyokha oche e Padani-aramu munju eya Betueli kukaao mala oyile omukhasi khukhwama ebweeneyo, mulala khu bakhaana ba Labani khochao, wandaaye owa maao. 3Wele Owe Bunyali Bwoosi akhubiite chikhabi mala akhue babaana bakali lundi akhukuche mala obe paapa owe babaandu bakali. 4#Lir. 17.4-8 Akhoya akhuua chikhabi nga cha Aburahamu, ewe ne lisaaye liowo nio obukule sibala nisio olimo omukwa nisio Wele aelesia Aburahamu!” 5Isaaka aruma Yakobo ario, mala acha Padani-aramu owa Labani, okhwa Betueli Omuarameani, wandaaye owa Rabeka, maayi owa Yakobo ne Esau.

Esau ayila omukhasi okundi

6Esau amanya ali Isaaka aaba abiitile Yakobo chikhabi ne khumuruma e Padani-aramu ayileyo omukhasi. Lundi amanya ali amulaka ali, “Okhayila mulala khu bakhaana Bakanaani tawe.” 7Yakobo aba ariire raraawe ne maawe mala acha e Padani-aramu. 8Nio nga Esau ne abona ali bakhaana Bakanaani se basiimisia Isaaka tawe, 9acha owa Ishimaeli okhwa Aburahamu, mala ayila omukhaana wewe lisina bali Mahalati, omukooko owa Nabaiothi.

Kamarooro ka Yakobo e Beteli

10Yakobo arura Beerisheba acha lubeka lwa Harani. 11Ne ola abuundu nabulebe mala enyanga yakwa, akonao siilo esio. Abukula libaale abuundu ao, etikiya emurwe mala akona. 12#Yn. 1.51 Aroora ali engaasi yemisiibwe khu sibala abuundu ao ne emurwe wayo yolile mwikulu, ne malaika ba Wele baba balikho baniinilakho ne khukhwikhilakho! 13#Lir. 13.14-15 Ne Wele Omunyali Owa Bioosi aaba emile khu ngaaki, emurwe wayo mala aloma ali, “Ese ndi Wele Omunyali Owa Bioosi, Wele owa paapa wowo Aburahamu lundi Wele owa Isaaka,” sibala nisio okonilekho sino, ndikhua ewe ne lisaaye liowo. 14#Lir. 12.3; 22.18 Lisaaye liowo lilaba likali nga lipukhuulu mala olibalaa khu sibala lubeka lwe mumbo, ebukwe, ebunaswa, ne siafubo. Khubirira mwiwe ne mu lisaaye liowo, chikholo choosi chilibiitwa chikhabi. 15“Ese ndi ne nawe mala ndakhuliinda buli abuundu osi osi niio ocha, mala ndikhukobosia mu sibala sino sikila se ndikhulekha tawe, khukhwola nga ndikhola niko khuboolele kano.”

16Nio Yakobo asisimukha khukhwama mu lilo liewe, mala aloma ali, “Ng'ali Wele Omunyali Owa Bioosi ali abuundu ano, ne ese abeele se namanyilekho tawe!” 17Mala aria lukali ne aloma ali, Abuundu ano ariisia lukali! Ano se ali abuundu aandi busa tawe ne kakhali ali enju eya Wele, mala ano sili silibwa sie mwikulu.

18Nio Yakobo enyokha makhelebeende abukula libaale nilio aaba ne eetikiiye emurwe mala alisimikha nga enjeko mala achukha kamafura khungaaki khwalio. 19Atiuukha abuundu ao ali Beteli (ne lisina lie lukoba lwe abuundu ao mu khunyoa liaba bali Lusi). 20Yakobo echuba ne aloma ali, “Kaaba bali Wele alaba ne nase, mala alaniinda khu lukeendo nilwo ndikho nja luno ne alamba siakhulia ne chingubo, 21mala noole munju eya paapa mu muleembe, aba nono Wele Omunyali Owa Bioosi alaba Wele wase. 22Libaale lino nilio simiikhe nga enjeko lilaba enju eya Wele. Ne khu bioosi nibio umba ndaamua sie ekhumi.”

Currently Selected:

Lir. 28: LUBUKUSU

Highlight

Copy