Bikh. 27

Paulo acha e Burumi

1Nga ne liabisibwa bali khukhoyeela khucha Italia khu birira khu nyanja, baana Paulo ne baboe babaandi khu Chuliasi owaba Naitiriani omukhulu owe kamae, owemeelelanga sipupu silaangwa sili “Sipupu sia Kaisari.” 2Khwaniina e meeli khukhwama Aturamitio, eyaba ne yerekekhe khucha khubirira mu mafubukho ke chimeeli mu sibala sia Esia. Nio khwacha ne Arisitakaasi, Omumasedonia khukhwama e Tesalonike. 3Nga bwasia khwola e Sidoni. Chuliasi aba omulayi khu Paulo mala amufukiilila khucha khubona basaale bewe, bamuyeete nibio aaba ne enya. 4Khwama abwenao khwachiililila, sikila ekhuungu yauchanga khukhwama ebweeni, khwabirira lubeka lwe sibala sia Saipurasi, sisiakarwa ne kameechi, ebweeneyo ekhuungu yaaba engeekhe. 5Khwambukha enyanja eya Silisia ne Pamufilia, khwacha khwola Mira mu Lukia. 6Abwenao, naitiriani chana oyo anyoola e meeli eyama Alekisanduria eyaba necha Italia, mala akhwingisiamo.

7Khwacha kalaa khulwe chindaalo chingali mala ekhumaliilikha khwola siimbi mu lukoba lwa Nito ne khubirira mu butinyu bukali. Ekhuungu se yakhufukiilila khukhwesenda lundi aleeyi lubeka lwene olwo tawe, khwako khwekha khwabirira lubeka lwe sibala sisiakarwa ne kameechi sia Kurete, ne khulandila khu lukuku lwa Salimoni. 8Khwalandilanga khundulo khwalwo siimbi siimbi, mala mu butinyu bukali khwola abuundu alaangwa bali, “Lifubukho lie Buonelo,” se ali aleeyi khukhwama mu lukoba lwa Lase tawe.

9Khwemao siise sileeyi, lialolekhana ne buli busiku khuchiililila ne lukeendo, sikila Endaalo eye khukhweyimana khulia yaba yabirire. Nio Paulo abakaambila ali, 10“Basaakhulu, naboone ndi lukeendo luno khukhwama ano lulaba ne busiku. Emeeli ne bisutwa bilonekha akhaba ne bulamu bwefwe bwoosi bunyala khutiba.” 11Ne kakhali Naitiriani aulila niko Kaputeni ne omwene meeli baloma, mala aloba ka Paulo. 12Ne sikila mwifubukho omwo se mwaba mulayi khumenyamo mu munaane tawe, bakali bafukiilisiana khuchiililila ne lukeendo, ne kanyalikhana boole e Foenike, bamenyeyo mu munaane. Foenike lili lifubukho lia Kurete lilialoleelela akari we siafubo ne mumbo ne akari we siafubo ne bunaswa.

Embembeesi khu nyanja

13Ekhuungu eya kalaa yaucha khukhwamila siafubo, nono babaandu bebaasia bali balakhola niko benyile khukhola, kakila bakhuula sichaangi sie meeli, barakikha khuchila siimbi siimbi khu lukulu lwa Kurete nga kanyalikha. 14Ne ao ne nao ekhuungu eye kamaani kamakali niyo balanga bali, “Eye Bunaswa-bukwe” yaucha khukhwama e sikiingi. 15Yaucha emeeli mala nga ne bwaba butinyu khucha lubeka nilwo yama, khwalekha yakhuyila niio yaba ne elikho elosia. 16Khwanyoola niio khwekhiinga nga ne khwaba ne khulanda siafubo eye khabala khalaangwa Keuta. Abwene ao, mu butinyu bwenobwo khwanyala khuonia liliaro ne emeeli. 17Khwalikhwesa liecha khu sikiingi khu ngaaki mala khwaliboela kimikoye khu meeli tatatata. Baba ne buuri bali wakana banyala bengila mu muyekhe kwe khu sikiingi siili siimbi ne lukuku lwa Libia, nio baulukusa engubo eye meeli nio emeeli euchwe busa ne ekhuungu. 18Embembeesi eye kamaani yachiililila khuucha, ne nga ne bwasia barakikha khumwaata mu meechi bisutwa bie khu meeli, 19ne endaalo eloondakho bamwaata lundi bilala khu biindu bie khu meeli mu nyanja. 20Khulwe chindaalo chingali enyanga namwe ching'enieesi se biabonekhanakho tawe, ne kakhali ekhuungu yachiililila khuucha lukali. Ekhumaliilikha lilieyikina liefwe lie khuona liakhuwamo. 21Enyuma we babaandu khuba ne njala khulwe siise sileeyi, Paulo eema ebweeni wabwe mala aloma ali, “Basaakhulu, abanga mwambulila andi se mwarura e Kurete tawe; mala andi se khwengiile mu butinyu buno ne khutibia nibio khwabeele nabio tawe. 22Ne kakhali luno musaba mube banyindaafu! Se aliio namulala khwinywe okane atibie bulamu bwewe tawe; emeeli yong'ene ekane yonekhe. 23Sikila silo sia luno, malaika owa Wele wase niye saayanga anjichilekho 24mala aloma ali, ‘Paulo, okharia tawe! Khukhwola wime ebweeni wo mwami Kaisari. Bulayi bwa Wele khwiwe bwaoniisie bulamu bwe babaandu boosi bali khu lukeendo luno ne nawe.’ 25Nono, nyindaalila basaakhulu sikila suubila mu Wele ndi kalakholekha bulayi bwene nga ne mboolelwe. 26Ne kakhali ekhuungu elakhuyila khwikhupe khu sikiingi sie sibala nabulebe.”

27Mwaba mu silo muukhola ekhumi na khane, ne khwaba khulikho khuuchwa ne embembeesi khu nyanja eya Mediterenia. Embi mu silo akari babaandereba be meeli baabona bali khwembiisie khu sibala. 28Nio bekhisia kumukoye mu meechi kuboelwekho busiro, banyoola bali buli buleeyi bwe chimita kamakhumi kane. Oli khwesendakho atiiti bakhola bario lundi mala ne banyoola bali buli buleeyi bwe chimita kamakhumi kataru. 29Baria bali kane e meeli yikhupe khu lwanda, nio bekhisia mu nyanja bichaangi bine khukhwama enyuma we meeli mala basaba bali busie khangu. 30Nio babaandereba be meeli bakhaka khukhwilukha khurura mu meeli; bekhisia liliaaro mumeechi bekhola nga bali khucha khu khwikhisia bichaangi mu meechi khukhwama ebweeni we meeli. 31Nio Paulo aboolela naitiriani omukhulu owe liie ne banamae ali, “Kaaba bali be mu meeli se balikho bacha khurama mu meeli tawe, aba se mulaona tawe.” 32Nio banamae bakhala kimikoye kikiaamba liliaro, mala balilekha liche ne embembeesi. 33Oli makhelebeende, Paulo abasaba boosi balie siakhulia ali, “Mu ndaalo ekhumi na chine, mwama khuba ne liaayaaya, ne khu ndaalo chino choosi se mwalilenge sisiindu tawe. 34Nono, musaba mulie siakhulia nio mube balamu. Se aliio olatibia akhaba lichuune lilala liewe tawe.” 35Nga Paulo aamala khuloma ario, abukula kumukaati, aapa orio khu Wele ebweeni wabwe boosi, akumesula, mala arakikha khulia. 36Banyindaalila kimiooyo, mala buli mulala alia. 37Fweesi alala mu meeli khwaba babaandu chimia chibili ne kamakhumi saba na sita. 38Boosi nga balia bekura, bamwaata engaanu yoosi mu nyanja banguyia emeeli.

Emeeli yonekha

39Nga bwasia, ba baaba mu meeli khumanya sikiingi tawe, nio babona lukhuna lwe nyanja ne lukulu lwe kumuyekhe, nio bakhalaka bali, ne kanyalikhana, bayile e meeli khu sikiingi esio. 40Nio balekha bichaangi bisiikhe mu nyanja, ne mu siise sienesio bakangulula kimikoye kikiabowa khu makhono kaluungisia e meeli. Nio baboa engubo ebweeni we meeli nio ekhuungu eyile emeeli ebweeni, mala khwacha e sikiingi. 41Ne kakhali emeeli yekhupa khu sikiingi sie kumuyekhe mala yaanda ebweeni khunyala khucha tawe. Ne lubeka lwe enyuma emeeli yafunikhaka mu bitonyi sikila bibuli bie kameechi bikali.

42Banamae berekekha khukhwira baboe boosi bali bakhakhola bario basoka boola khu sikiingi mala belukha tawe. 43Ne kakhali naitiriani omukhulu oyo enya khuonia Paulo, kakila abakhiingilila khukhola bario. Ne kakhali arusia lilaka boosi bamanyile khusoka banyoe basune khurura mu meeli basoke boole khu sikiingi; 44baramire baloondekho, ne beambile khu mbao namwe khu bitonyi bie chimbao che meeli eyaba nefunikhaakemo. Kaba kario nio fweesi khwola bulayi khu sikiingi.

Currently Selected:

Bikh. 27: LUBUKUSU

Highlight

Copy