Bikh. 24
24
Bayaudi basitaka Paulo
1Enyuma we chindaalo chiraano, Omusaayi Omukhulu Lukali Anania ola Kaesarea ne babemeelesi babaandi no mundu oweyika kamalaka lisina liewe bali Terutulo. Bacha ebweeni wo muruki Felikisi ne bamuboolela lisitaka liabwe khu Paulo. 2Paulo alaangwa mala Terutulo arakikha khumusitaka ne aloma ali
“Owe lukoosi Felikisi, bubwimeelesi bwowo bwe limanya bwa khurereere kumuleembe khu siise sileeyi, lundi bibiindu bikali biakalukhaane khulwe bulayi bwe sibala siefwe sino. 3Khusiima lukali po fwesi buli abuundu lundi buli khase. 4Se nenya khu khumalila siise siowo sikali tawe, ne kakhali, khusaba mu bulayi bwowo obe ne siisa okhurekeeresie kamalilo kefwe mu bwimbi. 5Khwaboone omundu yuno anyala arera busiku, alikho arera sisiayuumba mu Bayaudi buli abuundu mu sibala siosi, lundi ali omwimeelesi owe kumukaanda kwe Banasareti. 6Lundi aakhakile khunyaalutia Lukaangu, mala khwamuaamba. [Khwenya khumukhalakila khuloondekhana ne lilaka liefwe. 7Ne kakhali Lusia, naitiriani owe liie, eyingisiamo, amubukula ne kamaani khukhwama mumakhono kefwe. 8Nio aboolela babamusitaka beche ebweeni wowo.]#24.8 Chibibilia chindala se chili ne kamakhuwa kano tawe. Ewe wamweene nga ne olamureeberesia olamanya kakila ne khumusitakile.” 9Bayaudi baambaana alala mu lisitaaka baloma bali, “Kano koosi kali kang'ali.”
Paulo alomaloma kakewe ebweeni wa Felikisi
10Nio omuruki asibula Paulo khulomaloma, mala Paulo aloma ali,
“Manyile ndi wabeele omukhalaki owe kholo yino khulwe kimiiko kimikali, ndi ne busangaafu khulomaloma kano ebweeni wowo. 11Nga wamweene nonyala khureeberesia wamanya, chindaalo se chabirire ekhumi na chibili nga ne nachiile mu Yerusalemu khusaaya tawe. 12Bayaudi se banyoolakho ne mbingana no mundu yesi yesi mu Lukaangu tawe. Se banyoolakho mu Sinakooki, namwe abuundu osi osi mu lukoba ne ndikho mbaachilisia babaandu khukhola sisiayuumba tawe. 13Ne se banyala khurusia buloli bwosi bwosi khu niko basitakiilekho kano tawe. 14Ne kano niko fukiilila khwiwe; Saayanga Wele owe bakuuka befwe mu khuloonda Engila niyo nibo baboola bali eli eye bubeeyi. Lundi suubila mu buli siindu sisiaandikwa mu Lilaka lia Musa ne mu bitabu bie bang'oosi. 15Ese ndi ne lilieyikina mu Wele bulayi bwene nga nilio bano boosi bali nalio, ndi khukhabeo khulamukha khwe babaandu baluungi ne nabo bakhali baluungi tawe. 16Buli lwosi khakanga kamaani khuba ne kumwoyo kumukololofu mukari ebweeni wa Wele ne babaandu.
17 #
Bikh. 21.17-28
“Enyuma we khumenya aleeyi ne Yerusalemu khulwe kimiiko kimikali, nechile khureerera babaandu base chirupia che buyeeti ne khuaana biianwa. 18Nga naba nendikho khola kano, banyoola mu Lukaangu. Naba nemalile kumulukha kwe khukhwekwalaasia. Babaandu se babakhoo nase bakali, namwe bali kamaaya kabeo tawe. 19Ne kakhali Bayaudi balala khukhwama mu sibala sia Esia nibo ba babao. Nibo bakhoya beche ebweeni wowo basitake ne bali ne sisiindu khwise. 20Namwe lekha babaandu bano bakhuboolele mabi siina niko nakhola nga nema ebweeni we kumuse, 21#Bikh. 23.6 ne sikhali sisiindu silala nisio naloma nga nema ebweeni wabwe. Naloma ndi, ‘Ndikho njaalwa ano endaalo eya luno sikila, suubila ndi bafu balilamukha.’ ”
22Felikisi aaba amanyilisie bulayi ke Ngila oyo. Nio amaliilisia sisiina ali, “Ndakhalaka kumusaango kwenywe naitiriani Lusia omukhulu we kamae ne olile.” 23Nio alaka omunamae omukhulu khura Paulo mu buliindi, mala abe ne bulekhuule bwe khufukiilila basaale bewe khumuelesia nibio enya.
Paulo ebweeni wa Felikisi ne Turusila
24Chindaalo ne chibirirekho, Felikisi echa no mukhasi wewe Turusila owaba Omuyaudi. Alaanga Paulo mala amurekeeresia ne alomaloma ke lisuubila mu Yesu Kristo. 25Ne Paulo nga ne achiililila khulomaloma khuloondekhana ne bung'ali, ke khukhweliinda wamwene, ne khukhwicha khwe Ndaalo eye likhalakilwa, Felikisi aambwa buuri aloma ali, “Onyala wacha nono. Ndakhulaanga lundi ne nyoolile bubweyaangu.” 26Siise esio ebaasianga ali fwaana Paulo alamua chirupia nio kakila alanganga Paulo busiele nalomaloma naye.
27Oli kimiiko kibili kiabira, Porukio Fesito ela mu bukono bwa Felikisi nga omwami. Felikisi mu khwenya Bayaudi bamusiime, alekha Paulo mu siboe.
Currently Selected:
Bikh. 24: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
