Bikh. 22

1“Bawandaayase ne bapaapa, khemundekeeresie nga nimile ndi ebweeni wenywe!” 2Nga ne bamuulila ne alomalomela mu Lueburania, basila chu, nio Paulo achiililila ali,

3 # Bikh. 5.34-39 “Ese ndi Omuyaudi, nasaalwa Tasasi mu Silisia, mala nakhulila mu Yerusalemu muno nga omweyika owa Kamalieli. Nekisibwa lukali kamalaka ke sikuuka siefwe lundi naba neana khu Wele nga enywe mwesi muli ano luno ne muli. 4#Bikh. 8.3; 26.9-11 Napia siibi lukali ne khukhwira babaandu babaloondanga Engila yino. Naambanga babaandu be siseecha nende be siikhasi ne mbamwaata mu siboe. 5Omusaayi Omukhulu Lukali nende be kumuse boosi banyala khufukiilila bali mboola ka ng'ali. Nanyoolanga chibarwa khukhwama khu nibo chiandikwe khu Bayaudi bali mu Damasika, mala njayo mbaamba ne khubareera Yerusalemu ne bali khu minyololo nio banyoole siiukuumo.

Paulo aboola khu likaluukhasibwa liewe

(Bikh. 9.1-19; 26.12-18)

6“Nga naba khu lukeendo embi Damasika, yaba mwiangilwe mala ao ne nao buwaanga bukali khukhwama mungaaki bwakhosiakho, naba akari wabwo, 7nakwa asi mala naulila kumumilo ne kumboolela kuli, ‘Saulo! Saulo! Siina sikila ne unyaasia?’ 8Nakobosia ndi, ‘Ne ewe naanu Omwami?’ Aloma ali ‘Ese Yesu owe Nasareti niye olanyaasianga’. 9Babaandu nibo naba nabo babona buwaanga, ne se baulila kumumilo kwoyo owalomalomanga khwise tawe. 10Nareeba ndi, ‘Omwami, khole siina?’ Ne Omwami amboolela ali, ‘Yinyokha oche mu Damasika, ebweeneyo kane oboolelwe buli siindu nisio Wele aarobore ewe khukhola!’ 11Buwaanga bukali obwo bwakhola nabofula, nio babasiaase nibo naba nabo bandiila kumukhono bambila mu Damasika.

12“Mu lukoba lwene olwo abamo omundu lisina liewe bali Anania. Aaba omundu owaria Lilaka lundi aaba omurie lukali ebweeni we Bayaudi boosi ba baamenya mu Damasika. 13Eecha niio naba, anjimao, mala aloma ali, ‘Wandaayase Saulo, moka obone lundi!’ Mu saa eyo ne ng'ene, chimoni chase chamoka mala namubona. 14Nio aloma ali, ‘Wele owe bakuuka befwe akhurobore ewe khumanya lilienya liewe, obone oyo oli Omuluungi mala oulile kumumilo khukhwama mukhanwa mwewe. 15Sikila okhabe omuloli wewe khuboolela buli mundu niko oboone ne khuulila. 16Nono oliindile sina? Yinyokha mala obatiisibwe nio bubwoni bwowo buweo khulwe khulaanga lisina liewe.’

Kumulaango kwa Paulo khukhwilwachila Be Chikholo

17“Nakobola Yerusalemu, ne nga naba mu Lukaangu ne ndikho saba, naba ne kamalola. 18Nabona Omwami, andomalomakho ali, ‘Yuuya orure mu Yerusalemu khangu, sikila babaandu ano se balafukiilila buloli bwowo khwise tawe.’ 19Nakobosia ndi, ‘Omwami, bamanyile bulayi bwene bali ese nachilenge mu sinakooki ne ndila ne khukhupa abo ba bakhusuubila ewe. 20#Bikh. 7.58 Ne omuloli wowo Sitefano nga ne aaba ne eerwa, ese samwene nabao ne mbona ne chimoni chase ne nindile kamakooti kaabo ba baaba ne bamwiira.’ 21Omwami amboolela ali, ‘Cha! Sikila ndakhuruma aleeyi mu Be Chikholo.’ ”

22Babaandu barekeeresia ka Paulo nabwila amala khulomaloma, nio barakikha khu khuupa luyoka lukali bali, “Murusieo! Mwire! Se akhoyeela khumenya tawe!” 23Bakukuulanga ne basisakula chingubo chabwe, ne khuaanya lutuukhulu mungaaki. 24Naitiriani omukhulu oyo aana lilaka babaandu bewe khuyila Paulo mu kambi, lundi ababoolela bamuupe biboko nio bamanye sikila siina Bayaudi ne bakukuula lundi ne bakhamwenya tawe. 25Nga bamala khumuboa bali nio bamupe biboko, Paulo areeba omunamae owaba ne emileo ali, “Lifukiililwa mu lilaka ewe khukhupa Omuromani na nakhayaalwa tawe?”

26Nga omunamae oyo ne aulila ario, acha khu naitiriani ne khumureeba ali, “Ewe olakholanga siina? Omundu oyo ali Omurumi.”

27Nio naitiriani acha areeba Paulo ali, “Mboolele, ewe oli Omurumi?” Paulo akobosia ali, “Yee.”

28Naitiriani aloma ali, “Ese nekela Omurumi khulwe khuruunga chirupia chingali.”

Nio Paulo amukobosia ali, “Ese nase nasaalwa Omurumi.”

29Siise esio babaandu ba baaba ne benya khureeba Paulo bamururao, nio buuri bwatiila naitiriani omukhulu oyo nga amanya ali Paulo aaba Omurumi mala naye amuboyile kiminyololo.

Paulo ebweeni we kumuse

30Naitiriani oyo enya khumanya sifuno sisiakila Bayaudi ne basitaka Paulo, nio nga bwasia, bamukaangulula Paulo kiminyololo, mala alaka basaayi bakhulu nende be kumuse kwosi bakaanane. Nio abukula Paulo amwimia ebweeni wabwe.

Currently Selected:

Bikh. 22: LUBUKUSU

Highlight

Copy