Bikh. 19

Paulo elwacha mu Efeso

1Apolo ne asiili mu Korinjo, Paulo aakeenda mu ngoongo ng'ene echo mala ola mu Efeso, mu bwenomwo aanyoolamo babeeka, 2nio abareeba ali, “Nga ne mwasuubila mwanyoola Roho Omutakatifu?” Bamukobosia bali, “Khaba khukhaulilakho sisiindu bali Roho Omutakatifu siliio tawe” 3Paulo areeba ali, “Kaba kario, aba libatiisia lia lukano siina nilio enywe mwanyoola?” Bamukobosia bali, “Libatiisia lia Yoana.”

4 # Mat. 3.11; Mk. 1.4,7-8; Lk. 3.4,16; Yn. 1.26-27 Paulo aloma ali, “Libatiisia lia Yoana liaba khwaabo babekanila bubwoni bwabwe, ne khuboolela babaandu ba Isiraeli khusuubila mu oyo olikho owiicha enyuma wewe, niye Yesu.”

5Nga ne baulila kano, babatiisibwa mu lisina lio Mwami Yesu. 6Paulo abarakho kamakhono kewe, ne Roho Omutakatifu abekhakho; balomaloma mu nimi chimbia ne khung'oola. 7Boosi baaba embi babaandu ekhumi na babili.

8Paulo aacha mu sinakooki, mala khulwe kimieesi kitaru alomalomanga ne babaandu bunyindaafu. Ayinganaanga nabo ne khubasaaya khulwe bubwami bwa Wele. 9Ne kakhali balala baba ne sileka, baloba khusuubila, barakikha abuwaanga khuloma kamabi khuloondekhana ne Ngila yo Mwami. Kakila Paulo abalekha abukula basuubili bewe aacha nabo ne abeyikia buli ndaalo munju eye khukhwikisia eya Turanu. 10Achiililila khukhola ario khu siise sie kimiiko kibili, nabwila babaandu boosi ba baamenya mu lukoongo lwa Esia, Bayaudi ne Bakiriki baulila elomo eyo Mwami.

Basoleeli ba Sikeba

11Wele aakhola kamaya kakhasala tawe khubirira mu Paulo. 12Babaandu babukulanga bitambaa bie mukhono ne chingubo cha Paulo, ne bachiyilila balwale mala bulwaale bwabwe buwa. Ne akhaba ba baaba ne bisieeno biabaruramo. 13Bayaudi balala ba bakeendanaanga busa eyi ne neyi ne barusia bisieeno, boosi bakhaka khurumikhira lisina lio Mwami Yesu khurusia bisieeno. Ne baboolela bisieeno bali, “Khumurafwira mu lisina lia Yesu, niye Paulo elwachanga.” 14Babao basoleeli saba bo Omusaayi Omukhulu Lukali owe Bayaudi, owalaangwa bali Sikeba bakholanga bario.

15Ne kakhali sisieeno siababoolela sili, “Ese manyile Yesu, lundi Paulo yesi mumanyile, ne enywe naanu?”

16Nio omundu owabamo sisieeno oyo, abachunukhila ne kamaani kamakali mala abakhila boosi. Bekhupa enje ne chimbala ne chingubo chabwe chatabulwake. 17Bayaudi ne Bakiriki boosi ba baamenya Efeso baulila kano koosi, baambwa buuri, ne lisina lio Mwami Yesu liaebwa efuma engali. 18Basuubili bakali beecha, ne beyama abuwaanga koosi niko bakholaanga. 19Bakali ba bakholanga bufumu, babuusia bitabu biabwe alala, mala babiosela ebweeni we babaandu boosi. Bakhola esaabu eye bukusi bwe bitabu ebio bwoola chirupia chielefu khamusini. 20Mu ngila eye kamaani yino, elomo eyo Mwami yachiililila khusalanila ne khuba ne kamaani kamakali.

Sisiayuumba mu Efeso

21Enyuma we kamakhuwa ako, Paulo akhalaka mu Roho khucha Yerusalemu khubirira Masedonia ne Akaya. Aaloma ali, “Enyuma we khukhwola Yerusalemu lilamiina nole akhaba e Rumi yosi.” 22Nio aruma babili khu bayeeti bewe, Timoteo ne Rasito, bacha Masedonia ne naye arama Esia khu siise sitiiti.

23Siaba siise sino nisio sisiayuumba sibi siabela mu Efeso sikila Engila eyo Mwami. 24Abamo omubasi owe bibia lisina liewe Demetirio, owabasanga bifwaani bie lukaangu lwa wele owe siikhasi niye balanga bali Aritemi. Bubasi obwo bwareereranga Demetirio ne baabasi basie bukhala bukali. 25Nio Demetirio abuusia baabasi basie abo boosi ne babaandi be kimilimo nga kimiene ekio, mala ababoolela ali, “Baandu enywe, mumanyile muli buiinda bwefwe bwamanga mu milimo kino. 26Nono, mwabeene munyala khubona ne khuulila niko omundu Paulo yuno alakholanga. Alaboolanga ali ba wele babakholwa no mundu babenabo se bali bawele tawe, mala aakaluukhasie babaandu mu Efeso muno ne embi mu ngoongo cha Esia choosi. 27Nono khuli ne busiku, kumulimo kwefwe kulaba ne lisina libi. Se kali ako kong'ene tawe, aba lundi lukaangu lwa wele omukhasi omukali Aritemi se lulaba ne sifuno tawe, ne bulayi bwewe bulonakwa mala niye ali wele niye buli mundu asaayanga mu Esia mwoosi, ne mu sibala sioosi.”

28Nga babaandu bakali abo ne baulila kamakhuwa kano, lirima liabakhaya, baapa luyoka bali, “Aritemi owa Efeso ali Omukali!” 29Luyoka lwechula mu lukoba lwoosi. Nio bafwakhila Kayo ne Arisitakaasi ne Bamasedonia babili ba bakeendanga ne Paulo, baabakhuruura ba bareera munju eye kiminyawe. 30Paulo omwene enya khucha ebweeni we babaandu abo, ne kakhali basuubili bamukhaya. 31Bakhulu babaandi ba Esia, ba baaba basaale bewe, barumira Paulo likhuwa ne bamukaania bali akhacha ebaandu abo munju eye kiminyawe tawe. 32Siise siene esio likoyana liabao, buli mundu aapa luyoka; balala baloma kano babaandi kakaandi, ne babaandi khaba khumanya sikilile ne babusania alala tawe. 33Balala khu baandu abo bebaasia bali Alekisanda niye owaba mwene makhuwa ako, sikila Bayaudi bamukhola niye acha ebweeni. Ne Alekisanda ne kumukhono kwewe abasisia khu khwenya bamurekeeresie, mala akhaka khulomaloma ne khukhwikaana. 34Ne nga bamanya bali aaba Omuyaudi, boosi baapila alala luyoka lwe kamakhuwa kamafwaanane khulwe chisa chibili; bali, “Aritemi owa Efeso ali Omukali”

35Ekhumaliilikha omuandiki omukhulu mu lukoba, asisia babaandu, ababoolela ali, “Baandu base ba Efeso, buli mundu amanyile ali lukoba lwa Efeso luno luli luliinda lukaangu lwa Aritemi ne libaale litakatifu liliakwa khukhwama mwikulu. 36Se aliio onyala khuyingana kamakhuwa kano tawe. Nono khwako, khukhwola mulekhe sisiayuumba, mukhakhola sisiindu siosi siosi mu khuyuyukhana tawe. 37Mwareerire babaandu bano ano ne se bakhunuulile bie mu lukaangu namwe khuloma bibiindu biibi khu bawele befwe tawe. 38Demetirio ne bakholi bewe ne bali ne kamasitako khu mundu yesi yesi, khuli ne baruki lundi khuli ne chindaalo che chikesi, khwako kamasitako kanyala kakholebwa ebweeneyo. 39Ne mwaba ne mwenya sisiindu sisiindi sikhilakho ao, aba kane sikololosibwe mu siikhasio siifukiililwa sie babaandu boosi. 40Sikila khunyala khwasitakwa khu siayumba khulwe kakekholeekhe endaalo eya luno. Se khuli nga khubeelwa khu luyoka luno tawe, ne lundi se khuli ne sifuno silayi khu siayuumba sino tawe.” 41Enyuma we khuloma kano, aabolela babaandu baloote.

Currently Selected:

Bikh. 19: LUBUKUSU

Highlight

Copy