Mariko 4

Ngakitadapet a eketan

(Matayo 13:1-9; Luka 8:4-8)

1Tolomak Yesu akitatam nabo alokwaas a anam a Galilaya. Kotere asepich a ngitunga na achunakina neni, todoka Yesu natubwa kiboikin. Towo asepich a ngitunga alokwaas a anam. 2#Luk 5:1-3 Kitatam ngesi kesi ngakiro nakaalak a ngakitadapet tolimok tama:

3“Topupokisi! Ayei kolong itwaan ni alosi akitare. 4Na elakinea ngesi ngikinyam mana, apot ngikinyam ngiche kialakin lorot, sodi kidepasi ngikieny. 5Apot ngiche kialakin nalup na ewarawarakina kidiama natabab. Toruput ngikinyam atipei kainyo pealalak ngalup. 6Sodi na ariraunea akolong tonom ngimomwa luuchik ngulu, nabo kotere nipeapisitotor ngaten apot tooniyosi. 7Apot ngikinyam ngiche kialakin tooma lookwa. Ani erupunete ngiikwa torida ngimomwa lu arupunito sodi nyekoniut ngimomwa. 8Nakaneni kialakinos ngikinyam ngiche nalup naajokak, toruput ngimomwa topolout, tokoniut ngimomwa: ngiche ngitomwon-uni, ngiche ngitomwon-kapei, ngiche amiat apei.”

9Sodi tolim Yesu ngakiro narumoret tama, “Ani keya ngaki nakiiraret, kiira robo!”

Eger a ngakitadapet

(Matayo 13:10-17; Luka 8:9-10)

10Na ebooyo Yesu alopei, kirukut ngirukitos lutomon ka ngiarei ka epewae asepich a ngitunga anasek etatami ngesi tolimokis ngesi atamar kisaki kesi atoyena eger a ngakitadapet. 11Tatachak Yesu kesi tama, “Kidodikin esi ngakiro namunonoe a Apolou a Akuj. Nakaneni epupete ngitunga luche ngakiro nguna daang a ngakitadapet, 12#Isa 6:9-10 sodi toliwor,

‘Iteete cha iteete, nakaneni nyeyenete,

epupete cha epupete nakaneni

nyechoiarete.

Arai kikoni neni, kereuna kesi nia Akuj,

nakaneni kerimaki ngesi kesi.’ ”

Esisauni Yesu eger a ngakitadapet a eketan

(Matayo 13:18-23; Luka 8:11-15)

13Sodi kingit Yesu kesi tama, “Nyiyenete esi eger a ngakitadapet kanu a? Ikokinete esi iyenete eger a ngakitadapet a ngache ai? 14Itae eketan Akiroit a Akuj. 15Ikote ngitunga ngiche ngikinyam lu ealakinosi lorot, napei iirareta kesi Akiroit a Akuj, bu Esiitan tolema akiroit na eyei lotai kech. 16Ikote ngitunga ngiche ngikinyam lu ealakinosi natabab. Napei iirareta kesi Akiroit a Akuj tonupa a alakara. 17Nakaneni nyenupete kesi lokojokon kori nyenupete akiroit ngina nikooyen. Na ichanere kesi kori na eboliare kotere akiroit ngina, dio toisikis kesi atipei. 18Ikote ngitunga ngiche ngikinyam lu ealakin tooma lookwa. Eraakasi ngulu ngitunga lu iirarete akiroit, 19nakaneni ngichan a eboyor a akwap ka aminakinit ebari ta ngiboro luche daang lu iterekuyarito kesi, nyisirichakinete kesi akiroit ngina nakaneni tongopa ngakiro naajokak anakiroit kangina. 20Ngikinyam lu ealakinosi nalup naajokak ikote ngitunga lu iirarete akiroit tonupa, ani erumor tokoniut ageor, ngiche ngatomwon-uni, ngiche ngatomwon-kapei, ngiche amiat apei.”

Ataa alokwap ekitanda

(Luka 8:16-18)

21Torubak Yesu isuruori kesi ebala, “Ekoe, eyei itwaan ni inokakini ataa tobuburik atubwa kori kiwaak kwap ekitanda a? Meere kongina, iwaakinio ni ikeuna. 22Kainyo emam ibore ni idaitae ni nyetakanuni, kori emam ibore ni erapap ni nyileereuni. 23#Mat 5:15; Luk 11:33 Ani keya ngaki nakiiraret kiira robo!” #Mat 10:26; Luk 12:2

24Tolimok nabo tama, “Tochoikisi nguna ipupete! Ngitalio lupei iriraata esi luche kesi lupei kirira esi Akuj nabo kirirao esi niaronon noi. 25#Mat 7:2; Luk 6:38 Itwaan ni eyei ibore, einakinio nikaalan, itwaan ni emam ibore, edemario tani nidiochichi ni etingit.” #Mat 13:12; 25:29; Luk 19:26

Ngakitadapet a ngikinyam alu arupunito

26Tolim Yesu tama, “Ikoni Apolou a Akuj itwaan ni itakini ngikinyam mana keng. 27Ejotoe ngesi nakwaare ani esaa lo a apaaran tokienyu. Ngirwa ngulu daang, erupete ngikinyam keng topolout nakaneni nyeyeni ngesi erupe kech. 28Iturupunete ngalup ngikinyam tokoniut ageor. Ekingaren isiauni kibutungia ani erumor kiala sodi tokon emwae. 29#Yoel 3:13 Na ekokioto ngimomwa, elemuni elope ekileng kitelio ngimomwa, kainyo anang ngirwa lu elemere.”

Ngakitadapet a echokit a ekoropus

(Matayo 13:31-32,34; Luka 13:18-19)

30Kingit Yesu tama, “Nyo kisikwaanea Apolou a Akuj? Isikwaanio ka akitadapet ani? 31Ikoni nege. Elemuni itwaan echokit a ekoropus kitak mana keng. Edit echokit a ekoropus noi idwangit ngichok daang. 32Nakaneni ani kerupu, topoloor noi kidwang ngikito luuchik daang. Epete ngaten nalangir toduko ngikieny ngakais naten na eya lotorube.”

33Etatami Yesu ngitunga a ngakitadapet a ngache anakaalak ana ikote nguna, kiruor a eger kadaang alo apedorete kesi akiyen. 34Esuruori ngesi kesi ngakiro daang a ngakitadapet. Nakaneni ani erukito ka ngirukitos keng make, esisaununi ngakiro daang ileerete.

Esililingi Yesu ekuwam loapolon

(Matayo 8:23-27; Luka 8:22-25)

35Atabong a akolongit kangina, tolimok Yesu ngirukitos keng tama, “Kapana ewaaros atodokasi ekwakaye anam.” 36Sodi toisikis kesi asepich a ngitunga kaneni. Tolomasi ngirukitos a Yesu natubwa na ebooyo ngesi kirukosi. Aya ngatubwae ngache dang neni. 37Atipei tokut ekuwam loapolon ananam. Tokuut ngitoroi kilapakinos natubwa tonyout ngakipi akilelebun natubwa. 38Ayei Yesu naabor a atubwa ajotoe icholongit aworu. Kitokienyut ngesi ngirukitos keng tamasi, “Eketataman, nyikikachit iyong sua kimunyar a?”

39Tonyou ngesi kikilak ekuwam tama, “Kililing chek!” Sodi alimokin ngitoroi tama, “Topero!” Toper ekuwam tachakin wadaang chek. 40Kingit Yesu ngirukitos keng tama, “Nyo kibulitor esi kona? Ikwa eringa esi nyenupa?”

41Tobul kesi noi kingitas make tamasi, “Ani itwaan ikoni nege en? Epupete ngesi tani ekuwam ka ngitoroi!”

Currently Selected:

Mariko 4: ABIBILIA

Highlight

Copy