Mariko 16

Ayarun a Yesu

(Matayo 28:1-8; Luka 24:1-12; Yoana 20:1-10)

1Adaunet a Sabato, apot Mariam Magadalene ka Mariam itiokeng a Yakobo ta Salome toloto akigiel akimiet nakakukunyon esakete alosit akiwasakin nakwaan a Yesu. 2Toloto kesi naliel Jumapili nataparach napei ipiripiruuni akolong. 3Ani eloose alorot kingitanaros make ebalasi, “Ngae kingarakini ngoni akikokoriyor amoru anakituk a aliel?” (Apolot amoru ngina noi). 4Ani ingoliarete kesi, taanyungasi amoru ngina kikokoriyor. 5Sodi tolomasi kesi naliel, taanyungasi edia lo anapit ngiworui luakwaak kea ibooyi alowae alo aloteten a aliel, tobul kesi noi.

6Tolimok kesi tama, “Kuriasi nyiiriangakinosi. Ayeni ayong atamar isakete esi Yesu lo a Nasaret, longoon aramakinio napir. Emam ngesi kane, eteyarun! Kingolikisi a, ningoon eteperikinitoe ngesi nege. 7#Mat 26:32; Mar 14:28 Kapesi tokona tolimokisi Petero ka ngirukitos luche ngakiro nugu tamasi: ‘Elosi ngesi Galilaya kingareni esi! Ianyungarete esi ngesi kaina loger lokolong kilimokinitor ngesi esi.’ ”

8Sodi topudosi kesi nikalapatan kipiirioto analiel emaranete, tobulite. Nyelimokina kesi itwaan tani ipei ngakiro nguna kainyo abulit kesi.

Atakanuni Yesu ani a Mariam Magadalene

(Matayo 28:9-10; Yoana 20:11-18)

[ 9Na ayarunea Yesu Jumapili nataparach, kidodiun Yesu ani a Mariam Magadalene ana kolong epudori ngesi ngipean ngikan-kaarei. 10Tolot ngesi tolimok ngirukitos keng lu egorosi kialolongete, 11ani iirarete kesi ngesi ebala eyari Yesu engolik ngesi, nyenupa kesi ngakiro keng.

Atakanuni Yesu alorukitos a ngiarei

(Luka 24:13-35)

12Ani erumor, tatakanu Yesu alorukitos keng a ngiarei a eger a eche. Aloose ngirukitos keng lowae lo a ngadakarin. 13Tobongosi kesi sodi tolimokis luche, nakaneni nyenupa kesi.

Atakanuni Yesu alorukitos alutomon ka epei

(Matayo 28:16-20; Luka 24:36-49; Yoana 20:19-23; Ngitichisio 1:6-8)

14Esal kanguna kadaang tatakanu Yesu ani a ngirukitos alutomon ka epei imujete. Kikilak kesi ani peanupeta ngakiro keng ka akichananu kech ani awouneta akinup ngakiro alu aanyunete ngesi eyari. 15Tolimok kesi tama, “Kapesi nakwapea daang kitatama ngitunga daang ngakiro naajokak. 16Itwaan cha daang ni enupi kibatisae eyuun. Nakaneni ngini nyenupi, irirao. 17Eanyunete ngikanupak agogongu na esubeta ngakitoodikinet nakailiilok ikote nugu, itwaranakinete ngipean a ekiro kang. Iruorosi ngabukui nakiteat, 18#Tich 1:8 ani kirumut kesi ngimunio kori kemat ekitoe lokangedaran, nyewanasi. Idokokinete kesi ngikadeakak ngakan, tangalekis.”

Ayaario Yesu kidiama nadis

(Luka 24:50-53; Ngitichisio 1:9-11)

19Arumoret a ekiruor a Ekapolon Yesu ka kesi, yaarae ngesi kidiama nadis kiboikin lowae lo a aloteten a Akuj. 20#Tich 1:9-11 Toloto ngirukitos keng akitatam wadaang. Tosub Ekapolon Yesu etich ka kesi aapei, sodi kisileereu atamar eraakasi ngakitatamet kech ngaka iteni kotere ngakitoodikinet nakailiilok asubete kesi.]

Currently Selected:

Mariko 16: ABIBILIA

Highlight

Copy