Mariko 14

Alokito ngitunga Yesu

(Matayo 26:1-5; Luka 22:1-2; Yoana 11:45-53)

1Edongit ngirwa ngiarei tanang akolongit na esukukuu alo anyaritae Adeparet ka lo a Ngamugati Anapadok. Apot ngimurok luapolok a akai a Akuj ka ngiketatamak a etal tasaka erot lo irumuneta Yesu peeyenio, sodi taara. 2#Apud 12:1-27 Tamasi kesi, “Nyejoikinit kirumuni ngesi ngirwa lu a esukukuu, kainyo elomakinete ngitunga ekurikur.”

Ewasakinio Yesu akimiet alo Betania

(Matayo 26:6-13; Yoana 12:1-8)

3Ayei Yesu Betania kai a Simon, itwaan ni adeaka sek enomokere. Ani eringa Yesu imuji, bu aberu etingit echupa lokooyen lo enyaritae alabasita lo eleleba akimiet nakaakunyon na enyaritae nardo.*g** Arai akimiet ngina na elalak ngaropiyae egielere. Tobwang ngesi echupa ngolo dio tobukok akimiet nakou a Yesu. 4Tongoa ngitunga ngiche lu ayakasi neni kingitanaros ebalasi, “Nyo enyasunere akimiet nakakukunyon naga? 5#Luk 7:37-38 Adikino akimiet naga peegielario a ngadinari#14:5 ngadinari; arai adinari apei atacheeneo itwaan kotere etich a akolongit a apei. ana iporito ngamiae ngauni sodi nakinae ngikebootok ngaropiyae a?” Kisuburata kesi aberu ngina niaronon. #Etal 15:11

6Nakaneni tolim Yesu tama, “Kimiekisi ngesi. Nyo ichaneta esi ngesi? Kasubakinea ngesi ayong etich loajokon noi. 7Irukito esi ka ngikebootok jiik ipedorete akingarakin esaa daang lo cha isaketa. Nakaneni nyikiruki ayong ka esi ngirwa daang. 8Asubaki ngesi ngakiro na epedori. Abukokini ngesi akimiet nakakukunyon nakwaan kang sodi katonukere ayong. 9Tokona, kalimokinit iteni dir atamar, wadaang nicha itatamere Ngakiro Naajokak a Akuj anakwapea, elimorio aberu naga kotere ngakiro na asub ngesi nugu.”

Achamuni Yuda arikokin Yesu ngitunga

(Matayo 26:14-16; Luka 22:3-6)

10Sodi tolot Yuda Isikariote lo erai epei a ngirukitos alutomon ka ngiarei, lomurok luapolok a akai a Akuj, arikokin kesi Yesu. 11Talakaros noi iirarete ngakiro keng, kichikakis ngesi atamar kiinakini ngaropiyae. Sodi tolomak Yuda akisak erot lo erikokinea kesi Yesu.

Emujete Yesu ka ngirukitos keng akimuj a esukukuu a Adeparet

(Matayo 26:17-25; Luka 22:7-14,21-23; Yoana 13:21-30)

12Akolongit na ingareni akolongit na esukukuu a Ngamugati Anapadok, na engolere ngimesekin lu enyamio akolongit a Adeparet, kingita ngirukitos a Yesu ngesi tamasi, “Aliwae isaki iyong sua atoloto atosubakineta iyong akimuj a esukukuu a Adeparet?”

13Sodi tomea Yesu ngiarei kech ebala: “Kapesi lore, kisiriamuuni esi ekile lo edakit alupe a ngakipi. Kiwapakisi ngesi 14tanang kai na elomari ngesi. Tolimokis ilope a akai tamasi, ‘Ebala Eketataman kingitutu iyong keyei amaniyat na imujeta ngesi ka ngirukitos keng akimuj a esukukuu a Adeparet?’ 15Kidodikini ngesi esi amaniyat naapolon na esubakinitae alokidiama akai, nabo iriamunete ngiboro daang esubakinitae.”

16 # Eosio 41:9 Torotokis ngirukitos keng toloto lore, toriamut ibore daang ikoni ni alimokinitor Yesu kesi. Tosubakis akimuj a esukukuu a Adeparet.

17Na anangea ebong, kirukut Yesu ka ngirukitos lutomon ka ngiarei. 18Ani eringa imujete, tolim Yesu tama, “Kalimokinit esi ngakiro na iteni dir atamar, karikokini epei kus ayong ngitunga, ngolo ngesi lo kimuji ka ayong aapei.”

19Tonoma ngirukitos keng ngakiro nguna ngitai tolomakis akingitanar ngesi a ngapeipei tamasi, “Kori erai robo ayong?”

20Tatachak Yesu kesi tama, “Erai epei kus alutomon ka ngiarei, ngesi lo ilumokini amugati tooma natubwa ka ayong aapei. 21Etoani Lokookeng a Itwaan eger lo igiritere nagiran, nakaneni etioko nginyas lu eriamuni itwaan ngini erikokini Lokookeng a Itwaan ngitunga! Kejoikinit kolong itwaan ngini peidounitoe!”

Akimuj a Ekapolon Yesu

(Matayo 26:26-30; Luka 22:14-20; 1 Ngikorintoi 11:23-25)

22Ani eringa imujete, tolem Yesu amugati kilipak ebuakinit Akuj alakara. Tonyilinyili sodi nak ngirukitos keng ebala, “Totinga tanyama, akwaan kang ngesi naga.”

23Sodi tolem ekopo, kilip ebuakinit Akuj alakara, nak kesi dio tamata daang. 24Tolim Yesu tama, “Ngaakot kang nugu na abukor kotere ngitunga lukaalak, erai kesi iyookinete achamunet a Akuj. 25#Apud 24:8; Yer 31:31-34 Kalimokinit esi ngakiro na iteni dir atamar nyamasi nabo jik emuna lo epuritoe lo tanang akolongit na amasea emuna lo epuritoe lokitetet Anapolou a Akuj.”

26Sodi toeokis kesi eos ani erumor, toloto moru a ngikito a akimiet.

Alimun a Yesu atamar kapegi ngesi Petero

(Matayo 26:31-35; Luka 22:31-34; Yoana 13:36-38)

27Tolimok Yesu kesi tama, “Irotokinete esi daang kotere ayong, kainyo igiritae nagiran atamar, ‘Eari Akuj ekeyokon, sodi kialaros ngamesekin daang.’ 28#Sek 13:7 Nakaneni naketeyarunea ayong Akuj, kengarenikini ayong esi atolot Galilaya.” #Mat 28:16

29Tolimok Petero Yesu tama, “Nyakaisikini ayong iyong jik, tani kiisikis luche daang!”

30Tolimok Yesu Petero tama, “Kalimokinit ngakiro na iteni dir atamar, takae nakwaare eringa ekokoroit nyerukino ngarukinet ngaarei, ilimuni iyong ngalimunet ngauni atamar nyikiyeni ayong.”

31Tatachak Petero iricha tama, “Nyalimuni ayong atamar nyakayeni iyong jik, tani ketamar kaario ayong ka iyong!”

Tolimut ngirukitos luche daang ngakiro napei nguna.

Akilip a Yesu alo Getisemane

(Matayo 26:36-46; Luka 22:39-46)

32Tanangut kesi nakwap na anyaritae Getisemane, sodi tolimok Yesu ngirukitos keng tama, “Kiboikinos nege eringa ayong elipit.” 33Toriko ngesi Petero ka Yakobo ta Yoana. Toriaba ngakiro etau keng kisialolongo noi, 34sodi tolimok kesi tama, “Kanomito ayong ngakiro etau edikino tani kaarete. Kiboikinos nege tokienya.”

35Torotok ngesi ngaren wadio, tadakakin kwap sodi kilip atamar ani kepedor, nyeanyun ngesi ka aboliaro naaronon ngina. 36Kilip ngesi tama, “Apa, Apakang! Epedorosi ngakiro daang anikon. Tolema ekopo lo aboliaro lo anikang. Nakaneni meere loger lo asaki ayong, pearai lo isaki iyong.”

37Sodi tobong Yesu torukau ngirukitos luuni ejotoote. Tolimok ngesi Petero tama, “Simon, ijotoe iyong a? Nyikienyete esi tani esaa epei a?” 38Tolimok kesi tama, “Tokienya, kilipa sodi nyianyunosi ka akiningo. Echamit etau nakaneni nyechamit akwaan.”

39Tolot ngesi nabo inaa kilip elimuununi ngakiro napei nguna. 40Sodi tobong lorukitos keng toriam ejotoote, tokuruwo kesi akikieny. Nakaneni tongopikis kesi ngakiro na elimokinete ngesi.

41Na abongunio na a ngauni, abu tolimok kesi tama, “Eringa esi natete ijotoote, iangarito a? Arumor! Anang esaa! Kingolikisi a! Erikio tokona Lokookeng a Itwaan napolou a ngikasechak. 42Tonyoutu atoloto. Kingolikisi a, lokarikokinit ayong ngitunga ngesi lo!”

Erumunio Yesu

(Matayo 26:47-56; Luka 22:47-53; Yoana 18:3-12)

43Ani eringa Yesu iruoro, todolu Yuda lo erai epei a ngirukitos alutomon ka ngiarei. Arukito ngesi ka ajore naatingit ngilengea ka ngiseboe. Ameunito kesi Ngimurok Luapolok a Akai a Akuj ka ngiketatamak a etal ta ngikasukou a Atuk. 44Alimokini sek lo arikokini ngesi ajore tama, “Itwaan ngini emalae ayong atonuak, ngesi ngolo, kirumutu ngesi, torikosi ichoikinito lokojokon.”

45Napei adolunio Yuda, tolot nia Yesu tama, “Eketataman!” Sodi tonuak ngesi. 46Sodi kirumut kesi Yesu totinga lokojokon. 47Nakaneni tout epei kangulu awaasi kaneni ekileng totubo akit a akedalan a Emuron a Loapolon a akai a Akuj. 48Sodi Yesu kingit kesi tama, “Nyo tokona iponitotor esi itingito ngilengea ka ngiseboe akirumun ayong ikwa ibore esibit arai ayong erukoot? 49#Luk 19:47; 21:37 Kirukit ayong ka esi ngirwa daang etatami alokai a Akuj, ipot esi nyikirumut ayong. Nakaneni ejoikinit ngagiran iyookin.”

50Sodi toisikis ngirukitos daang ngesi, tamataros.

51Ayei esorokit epei lo anapit eworu epei, kiwapite Yesu. Tasaka ngitunga akirumun ngesi, 52nakaneni abu toisik eworu keng kipiiri emuner.

Yesu Anatuk

(Matayo 26:57-68; Luka 22:54,55,63-71; Yoana 18:13-14,19-24)

53Sodi torikoroe Yesu kai a Emuron a loapolon a akai a Akuj, ni ayakasi ngimurok luche daang luapolok a akai a Akuj ka ngiketatamak a etal ta ngikasukou a Atuk. 54Kiwap Petero Yesu echadakina toloma tooma nalaar a Emuron a Loapolon a akai a Akuj kiboikinos ngesi ka ngasigerea kipiera akim. 55Toripa Ngimurok Luapolok a akai a Akuj ka ngitunga daang a Atuk ngakiro naaronok ani a Yesu, sodi taareta ngesi, nakaneni emam na aanyut kesi. 56Kisudo ngikaanyunak lukaalak ngakiro kotere Yesu, nakaneni nyikwaanikina ngakiro kech.

57Sodi tonyout ngitunga ngiche kisudokineta ngesi ngakiro ebalasi: 58“Kiira sua ebala, ‘Abwangi Akai na a Akuj na adukete ngitunga naga sodi atodukok ache a ngirwa a nguuni na nyepedorete ngitunga akiduk.’ ” 59#Yoa 2:19 Nakaneni emam ngakiro kangulu na apot kikwaanikin.

60Tonyou Emuron Loapolon a akai a Akuj alokiding kech kadaang, kingit Yesu tama, “Eya ngakiro isakit iyong atachun alotitas alo kititakinitere iyong kalo a?”

61Nakaneni kililing Yesu chek, emam akiroit atachu. Kingit nabo Emuron Loapolon a akai a Akuj tama, “Iyong irai Kiristo, Lokookeng a Akuj ana epuruunitoe a?”

62 # Dan 7:13 Tatachak Yesu tama, “Ayong ngolo, nabo ingolikinete Lokookeng a Itwaan ibooyi alowae alo aloteten a Akuj Anaapolon noi nabo irukunete ka ngidowon a adis!”

63Tochilichili Emuron Loapolon a akai a Akuj ngiworui tama, “Nyeringa nabo kisaki ngikaanyunak ngiche! 64#Lawi 24:16 Iirasi esi ngimeny keng. Ibalasi tokona esi ai?”

Tolimut daang engerito ebalasi: esechit ngesi ejoikinit eario.

65Tolomakis epewae kech akimaanakin Yesu, kimukoe ngesi ereet taramae, sodi tolimokinae tamarae, “Toyen itwaan ni kirami iyong!” Sodi torikosi ngesi ngasigerea sodi kibapanasi.

Apeget a Petero Yesu

(Matayo 26:69-75; Luka 22:56-62; Yoana 18:15-18,25-27)

66Ani eringa Petero eyei tooma nalaar, kitoru apese neni naarai akasuban etich a Emuron a Loapolon a akai a Akuj. 67Ani ingolikini ngesi Petero ipiara, abu tokienyik ngesi tolim tama, “Irukito iyong dang ka Yesu lo a Nasaret.”

68Nakaneni topeg ngesi tama, “Nyayeni ayong . . . kori nyetamunit tani ngakiro na iruoro iyong.” Sodi topudo Petero nikalapatan. Toruk ekokoroit esaa lopei ngolo.

69Kingolik apese na arai akasuban etich ngesi kaneni tolimok nabo lu awaasi kaneni tama, “Erai lo epei kech!” 70Nakaneni topeg Petero nabo.

Adaunet a esaa alodiochichi, pot ngitunga lu awaasi kaneni kititakis Petero nabo ebalasi, “Irai iyong dang epei kech dir, kainyo ibunit iyong dang alo Galilaya.”

71Sodi tolim Petero tama, “Ekong jik kataar ibore, eruoro ayong ngakiro na iteni dir! Nyayeni ayong itwaan ni ilimito esi!”

72Sodi esaa lopei ngolo, toruk ekokoroit na a ngaarei. Sodi kitam Petero ngakiro na alimokini Yesu ngesi ebala, “Ani eringa ekokoroit nyerukino na a ngaarei, ilimuni iyong ngalimunet ngauni atamar nyikiyeni ayong.” Sodi kikalou ngesi lokojokon.

Currently Selected:

Mariko 14: ABIBILIA

Highlight

Copy