Mariko 10
10
Etatami Yesu ngakiro a elakit
(Matayo 19:1-12; Luka 16:18)
1Torotok Yesu kaneni toten nakwap a Yudea, todoka ekwakaye angolol a Yorudan. Apot nabo ngasepicho a ngitunga tochunun ni ayei ngesi, sodi kitatam kesi kona palem sek.
2Pot Ngiparisayo ngiche esakete akining ngesi kingita tamasi, “Tolimokinae sua, echamakinitae alotal ekile elaki aberu keng a?”
3Tatachak Yesu ingisit tama, “Alital kolong kilimokinit esi Musa?”
4 #
Etal 24:1-4; Mat 5:31 Tatachut kesi ebalasi, “Alimunit kolong Musa atamar epedori itwaan akigir abarua a elakit sodi totiakas ka aberu keng.” #Siak 1:27; 5:2
5Tolimok Yesu kesi tama, “Kigirakinit Musa esi etal logo kainyo egogong esi ngakies emam kona kitatamio. 6Nakaneni kolong anakisiakinet, ngirwa lu asubere akwap, ‘Asubakini Akuj ekile ka aberu. 7Kotere ngakiro nguna, eisikini ekile apakeng ka itiokeng sodi kiruko ka aberu keng, 8sodi taraut kesi luarei ngipei!’ Nakaneni nyeringa kesi nabo eraakasi ngitunga ngiarei, pearai itwaan ipei. 9#Siak 2:24 Nyejoikinit itwaan etiaki ngini kolong emorik Akuj.”
10Na abongoreta kesi tolomasi kai, kingita ngirukitos a Yesu ngesi akiroit ngina. 11Tolimok kesi tama, “Itwaan cha daang ni elaki aberu keng kuut aberu ache, aliwor ekaloman asechaki aberu keng. 12#Mat 5:32; 1 Kor 7:10-11 Kongina pei, ani kenger aberu ekile keng tacham ekile eche, alom ngesi asechaki ekile keng.”
Apiari Yesu ngide luuchik
(Matayo 19:13-15; Luka 18:15-17)
13Torikut ngitunga ngiche ngide nia Yesu esakete ngesi kidokok ngakan keng kidiama ngakies kech. Nakaneni kikilakis ngirukitos keng ngitunga. 14Na engolikinea Yesu kesi ikote neni, tongo noi tolimok ngirukitos keng tama, “Kimiekisi ngide pot ne! Nyiiratakis kesi kainyo erai Apolou a Akuj aka ngulu ikote lugu. 15Kalimokinit ngakiro na iteni atamar, itwaan cha daang ni nyechamuni Apolou a Akuj loger lo echamunitor ikoku niichi, nyelomari jik Napolou ngina.” 16#Mat 18:3 Sodi tadaku ngesi ngide kidokonok ngakan keng kidiama kech, topia.
Ekabaran
(Matayo 19:16-30; Luka 18:18-30)
17Na anyounio Yesu torotok, tomotun itwaan toriedik alongaren keng kingit tama, “Eketataman loajokon, ekokini ayong abili aanyun akiyar na nyedaun ai?”
18Kingit Yesu ngesi tama, “Nyo kinyaritor iyong ayong ekajokon? Emam itwaan ejok mati Akuj bon. 19#Apud 20:12-16; Etal 5:16-20 Iyeni iyong ngitalio lugu: ‘Nyiiar, nyiilom, nyiikoko, nyiiruor ngakiro na eraakasi alioko, nyiingala, toker Apa kon ka itiokon.’ ”
20Tolim ekile ngolo tama, “Eketataman, napei kolong a ekiditeu kang, erichunit ayong ngitalio lu daang.”
21Tokienyik Yesu ngesi a amina tama, “Eroko ibore ipei bon. Kape togiela ibore daang ni itingit iyong tokoranak ngikebootok ngaropiyae sodi min ebarit kon nadis, ani erumor bu kiwapak ayong.” 22Na eirarea ekile ngolo nguna, torotok esiliyorit kainyo abarit ngesi noi.
23Tokienyik Yesu ngirukitos keng kisemok tolimok kesi tama, “Egogong noi ngikabarak alomar Napolou a Akuj!”
24Toililikis ngirukitos keng ngakiro nugu, nakaneni torubak Yesu iruoro ebala, “Ngide kang, egogong noi ngikabarak alomar Napolou a Akuj! 25Ebeben ekaal akitor napedot a emutu idwangit eger lo elomarea ekabaran Napolou a Akuj.”
26Toililikis ngirukitos keng ngakiro nguna kingitanaros make tamasi, “Ani ngae epedori ayuun?”
27Tokienyik Yesu kesi tatachak tama, “Nyepedorosi nguna alotunga, nakaneni ani a Akuj, epedorosi ngakiro daang.”
28Sodi tolim Petero ngakiro na ekeunit tama, “Tokona, abe kiisik bo kolong sua ibore daang kiwapak iyong.”
29Tolimok Yesu kesi tama, “Kalimokinit esi atamar itwaan daang ni aisiki awi keng, kori ngikaitotoi ka ngakaitotoi keng, kori apa ka itiokeng, kori ngide keng kori ngamanat keng kotere ayong ka Ngakiro Naajokak a Akuj, 30einakinio ngainakinet nakaalak tokona na eraakasi ngainakinet amiat apei a ngakais, ngikaitotoi, ngakaitotoi, taito ka ngide ta ngamanat imorikina ka aboliaro, nabo ani ngirwa lu esal eanyuni akiyar na nyedaun. 31#Mat 20:16; Luk 13:30 Nakaneni ngikaalak lu ingarenete tokona, isidiyorosi, nabo lu isidiyete tokona, ingarenikinete.”
Eruoro Yesu na a ngauni ngakiro akitu keng
(Matayo 20:17-19; Luka 18:31-34)
32Ani eloose Yesu ka ngirukitos alorot etenete Yerusalem, kingarenik Yesu. Abulit ngirukitos keng toemito tani ngitunga lu ewapito ngesi. Tachada Yesu nabo ngirukitos lutomon ka ngiarei tolimok ngakiro na esubakinere ngesi. 33Tolimok Yesu kesi tama, “Topupokisi, kilosi tokona ngoni Yerusalem ni erikere Lokookeng a Itwaan Lomurok luapolok a Akai a Akuj ka ngiketatamak a etal. Irirate kesi ngesi taara. Sodi torikoroe lobukui lu nyerai Ngiyaudi. 34Ekianatar ngesi ngitunga ngulu kimaanakis ngakimul, kideta sodi taara, nakaneni ani enangi akolongit na a ngauni, toyaru.”
Akilip a Yakobo ka Yoana
(Matayo 20:20-28)
35Sodi pot Yakobo ka Yoana lu eraakasi ngide a Sebedayo nia Yesu tamasi, “Eketataman, eyei ibore kilipit iyong kitosubakinea.”
36Kingit Yesu kesi tama, “Nyo ngini?”
37Tatachut tamasi, “Na iboikinor iyong lokicholong lo a Apolou kon, kimiek sua eboikinos ka iyong aapei, epei nakan kon na aloteten, loche nakan na alokedieny.”
38 #
Luk 2:50 Tolimok Yesu kesi tama, “Nyiyenete esi na ilipasi. Ipedorete esi akimat ekopo lo aboliaro lo amasi ayong a? Ipedorete esi akibatiso loger lo ejoikinit kebatisaare ayong a?”
39Tatachakis tamasi, “Kipedori.”
Tolimok Yesu kesi tama, “Iteni ipedorete esi akimat ekopo lo aboliaro lo amasi ayong nabo kibatisae loger lo kebatisaare ayong. 40#Luk 22:25-26 Nakaneni meere ayong aseuni atamar ngae iboikin teten kori kedieny kang. Eraakasi ngiwaitin ngulu ngika ngulu eseunit Akuj.”
41Na eirareta ngirukitos luche tomon ngakiro nguna, apot tongoikis Yakobo ka Yoana. 42Nakaneni tanyarau Yesu kesi daang tochunak wapei tolimok tama, “Iyenete esi atamar epolokinito ngulu ejoikinit eraakasi ngikapolok a ngibukui alu nyerai Ngiyaudi ngitunga kech nabo epolokinito ngikarikok kesi noi. 43Nyejoikinit ngakiro ikokinete neni anikus. Ani kesaki ipei kus araun ekapolon, ejoikinit eliwor ekasuban etich aluche kadaang, 44kori ani kesaki ipei kus aliwor ni ingareni, ejoikinit eliwor ekasuban etich kadaang. 45#Mat 23:11; Mar 9:35; Luk 22:26 Kainyo peabuni kolong Lokookeng a Itwaan asubakino etich, pearai akisub etich nabo, tajal akiyar keng sodi talakunea ngitunga lukaalak.”
Etangalekini Yesu Baritimayo lomuduk
(Matayo 20:29-34; Luka 18:35-43)
46Tanangut Yeriko. Torotokis Yesu ka ngirukitos keng ta asepich a ngitunga. Ebooyi itwaan ipei nimuduk nianyaritae Baritimayo lokookeng a Timayo alorukudi ilipanar. 47Na eirarea ngesi atamar Yesu lo a Nasaret ngesi ngolo, tolomak akirema ebala, “Yesu Lokookeng a Daudi, kisienoi ayong!”
48Apot ngitunga ngikaalak kikilakis ngesi tolimokis atamar kililing. Nakaneni kirema ngesi lokojokon noi tama, “Lokookeng a Daudi, kisienoi ayong!”
49Towo Yesu sodi tama, “Tanyarautu!”
Tanyaraut kesi ekile lomuduk ngolo tamasi, “Talakar, tonyou kinyarit ngesi iyong.”
50Tachaka ngesi eworu keng, tokuraun atipei tolot nia Yesu.
51Kingit Yesu ngesi tama, “Nyoni isaki iyong katosubakinea?”
Tatachak emuduk ngolo tama, “Eketataman, asaki tojoketa ngakonyen engolik akwap.”
52Tolimok Yesu ngesi tama, “Kape kitojok iyong anupit kon.”
Kingolik ngesi akwap atipei kiwapak Yesu alorot.
Currently Selected:
Mariko 10: ABIBILIA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA (c) 1999
