Mariko 1

Akitatam a Yoana Ekebatisan ngakiro a Akuj

(Matayo 3:1-12; Luka 3:1-18; Yoana 1:19-28)

1Eraakasi nugu Ngakiro Naajokak a Yesu Kiristo a Lokookeng a Akuj. 2#Mal 3:1 Esiakinete loger lokolong egiritere nakitab a ekadwaran a Akuj Isaya atamar,

“Ebala Akuj kona,

‘Ameari ayong emeanara kang

kingarenik iyong

kitosubak iyong erot!’

3 # Isa 40:3 Etoil a itwaan ani echala

anariet ebala,

‘Tosubakisi erot Ekapolon,

kitenikisi erot lo itori ngesi!’ ”

4Abuni Yoana anariet ibatisae ngitunga kitatami#1:4 Abuni Yoana ... kitatami; igiritae nakitabea ngache atamar abuni Yoana Ekebatisan anariet, itatami. ebala, “Tolunga ngasechesea kus kibatisae sodi kitorimakinea Akuj esi ngasechesea kus.” 5#2 Kapol 1:8 Aloseenete ngitunga a akwap a Yudea nikeng ka ngitunga daang a ere a Yerusalem. Tolimosi ngasechesea kech kibatisae anangolol a Yorudan.

6Anapit Yoana ngiworui lu adonyunitoe a ngajul a ngikaala. Anapit aruba namuny anaabor. Anyameene ngimases ka akimiet a ao. 7Kitatam ngesi ngitunga ebala, “Itwaan ngini ebuni ekisidi kang epolot noi kedwangit ayong, nyitemokino ayong tani akudokin atalachak ngarukanes a ngamuk keng. 8Kebatisae ayong esi a ngakipi, nakaneni kibatisae ngesi esi a Etau a Akuj.”

Akibatisare ka akiningo a Yesu

(Matayo 3:13–4:11; Luka 3:21-22; 4:1-13)

9Ngirwa ngulu, torotok Yesu alore a Nasaret a akwap a Galilaya, sodi kibatisa Yoana ngesi alo Yorudan. 10Napei apudunio Yesu anakipi, kingolik ngesi adis engaar, sodi totiyaun Etau a Akuj ikoni akuuri todo kidiama keng. 11#Siak 22:2; Eosio 2:7; Isa 42:1; Mat 3:17; 12:18; Mar 9:7; Luk 3:22 Abu etoil anadis tama, “Irai iyong Lokookang lominat. Kitalakarit iyong ayong.”

12Sodi toreea Etau a Akuj Yesu atipei nariet, 13kiboi kaina ngirwa ngitomwon-omwon iningit Esiitan. Ayakasi neni tani ngitieng a amoni, nakaneni engaranakinete ngimalaikae ngesi.

Anyarare a Yesu ngikechiemak a ngikolia nguomwon

(Matayo 4:12-22; Luka 4:14-15; 5:1-11)

14Ekisidi a aenet a Yoana alojela, tolot Yesu Galilaya, itatami Ngakiro Naajokak a Akuj ebala, 15#Mat 3:2 “Anang esaa, aapuu Apolou a Akuj! Tolunga ngasechesea kus sodi tonupa Ngakiro Naajokak a Akuj!”

16Na alosio Yesu alokwaas a anam a Galilaya, kingolik ngikechiemak a ngikolia ngiarei, Simon ka Andirea lo arai lokaatokeng, echakete epuute nanam. 17Tolimok Yesu kesi tama, “Kiwapakinae ayong sodi ketatam esi akirum ngitunga loger lo irumeta ngikolia.” 18Kimiekis kesi ngipuutei kech atipei sodi kiwapakis ngesi.

19Na arotokinio ngesi ngaren wadio, kingolik nabo ngikaitotoi ngiarei, Yakobo ka Yoana lu eraakasi talokookeng a Sebedayo. Ayakasi kesi tooma natubwa edonyete ngipuutei kech. 20Tanyara Yesu kesi napei aanyungarea. Kimiekis kesi apa kech anatubwa ka ngikasubak etich, sodi kiwapakis kesi Yesu.

Itwaan ni akoporito ngikerep

(Luka 4:31-37)

21Tananga Yesu ka ngirukitos keng lore lo anyaritae Kaperinaum. Na anangea akolongit a Sabato, toloma Yesu kai a Atuk tolomak akitatam. 22#Mat 7:28-29 Toiliilik ngitunga daang eger lo etatamea ngesi, kainyo peekoni ngesi ngiketatamak a etal, nakaneni etatami ngesi a Apolou anakaagongon.

23Tolom itwaan ni akoporito ngikerep atipei tooma kai a Atuk kikalou tama, 24“Wae! Eya iyong ngakiro ka sua Yesu lo a Nasaret a? Ibu iyong amunyar sua a? Ayeni atamar iyong ngesi ngae, irai iyong emeuna a Akuj lo italeuno!”

25Todungok Yesu Ekipe tama, “Kililing sodi tolom anitwaan kaen!”

26Kitamaranik Ekipe itwaan ngini noi kirakar. Sodi kirema kikalou lokojokon, sodi topudo. 27Toiliilikis ngitunga daang ngakiro nguna tolimonokinos make tamasi, “Anukiro nugu? Ekoe, eraakasi ngakitatamet kiteat a? Edungonokini itwaan en ngipean ngakiro nakaneni epupete ngesi tani ngipean!”

28Tokeikin ekipur a Yesu atipei lowaitin daang a akwap a Galilaya.

Etangalekini Yesu ngitunga lukaalak

(Matayo 8:14-17; Luka 4:38-41)

29Topudut Yesu ka ngirukitos keng alokai a Atuk toloto kidirasi jik nawi a Simon ka Andirea. Arukito kesi ka Yakobo ta Yoana. 30Napei adolunio Yesu tolimokinae atamar eperi nakamuran a Simon irakarit arukum noi. 31Tolot Yesu aanyun aberu ngina, toting akan kitonyou. Tangalek arukum keng. Sodi tonyou tolomak akisimuj kesi.

32Awariet na adoyorea akolong, apot ngitunga yaut nia Yesu daang lu adeakasi ka ngulu akoporito ngikerep. 33Tochunakinos ngitunga daang a ere kangolo ngaren ekidor. 34Nabo kitangalek Yesu ngitunga ngikaalak lu adeakasi ngidekesinei ngigelagelae. Kitwarak Yesu ngipean ngikaalak. Nakaneni nyechamakina elimunete akiroit kainyo ayenete kesi ngesi.

Etatami Yesu ngitunga alo Galilaya

(Luka 4:42-44)

35Nataparach elilim, eringa nyipiripiruna, tonyou Yesu topudo sodi tolot niasilon akilip. 36Nakaneni toloto Simon ka ngirukitos luche akisak ngesi, 37ani na anyuneta ngesi, tolimokis tamasi, “Kisakete iyong ngitunga daang.”

38Nakaneni tatachak Yesu tama, “Potu apana lorerea luche dang lukidunyet etatama kaina, kainyo nguna ngesi abunitor ayong.”

39 # Mat 4:23; 9:35 Erimit Yesu ngiwaitin daang a akwap a Galilaya itatami anakais a Atuk, kitwaranakini ngipean.

Etangalekini Yesu itwaan ni adeaka enomokere

(Matayo 8:1-4; Luka 5:12-16)

40Sodi bu itwaan ni adeaka enomokere toriedik alongaren Yesu kimaima lokojokon tama, “Ani kisaki iyong akitangalekin ayong, ipedori.”

41Kisieni Yesu itwaan ngini kitorwaa akan keng tatap ngesi. Tolimok tama, “Asaki ayong akitangalekin iyong, tojoker!” 42Tangalek enomokere a itwaan kangini atipei, tojoker ngesi. 43Todungok Yesu ngesi atamar tolot atipei. Kichikichik tama, 44#Lawi 14:1-32 “Ayoro, wara nyiilimok itwaan tani ipei, nakaneni kape lomuron a akai a Akuj kiseme ngesi iyong. Sodi tolem akipeyoet loger lokolong alimunitor Musa, toyenea itwaan daang atamar ijoker iyong.”

45Nakaneni tolot itwaan ngini tokeik akiroit ngina wadaang. Kiruor ngesi ngakiro nakaalak noi tokuruwo Yesu kona elomuni lore iteete ngitunga, pearai ebooyi ngesi aniasilon, sodi pot ngitunga neni alowaitin kadaang.

Currently Selected:

Mariko 1: ABIBILIA

Highlight

Copy