Matayo 8

Akitangalekinet a Yesu itwaan ni adeaka enomokere

(Mariko 1:40-45; Luka 5:12-16)

1Na atiyaunor Yesu alomoru, kiwapu ngesi asepich a ngitunga. 2Sodi bu itwaan ni adeaka enomokere toriedik alongaren keng tama, “Ekapolon, ani kisaki iyong akitangalekin ayong, ipedori.”

3Kitorwaa Yesu akan keng tatap ngesi. Tolimok ngesi tama, “Asaki akitangalekin iyong, tojoker.” Atipei tangalek enomokere a itwaan kangini. 4#Lawi 14:1-32 Tolimok Yesu ngesi tama, “Ayoro, wara nyiilimok itwaan tani ipei nakaneni kape lomuron a akai a Akuj kiseme ngesi iyong, sodi tolem akipeyos loger lokolong alimunitor Musa, toyenea itwaan daang atamar ijoker iyong.”

Akitangalekinet a Yesu ekasuban etich a itwaan a Roma

(Luka 7:1-10)

5Na alomunea Yesu lore a Kaperinaum, kisiriamia ekarikon a ngasigerea a Ngiroma kimaima 6tama, “Ekapolon, edeaka ekasuban etich kang eperi anawi, eriab noi nyepedori tani anyoun.”

7Tolim Yesu tama, “Alosi ayong etangalek ngesi.”

8Tolim ekarikon a ngasigerea tama, “Meere kongina Ekapolon. Nyitemokino iyong ibuni toloma kai kang. Tolim tokona iyong akiroit, sodi tojoker ekasuban etich kang. 9Ayong dang, arai ekarikon loochi lo kapolokinito luche nabo eya ngasigerea na aweikinit ayong. Na alimokinea epei atama, ‘Kape!’ tolot. Kori na alimokinea loche atamar: ‘Bua’, bu. Nabo na alimokinea ekasuban etich kang atama, ‘Tosubak kona’, sodi tosubak loger ngolo.”

10Tatalasi Yesu ngakiro nguna na eirarea, sodi tolimok ngitunga lu ewapito ngesi tama, “Kalimokinit ayong esi atamar, nyaanyuna nakanuan itwaan tani alo Isirael ni enupit noi loger lo. 11Kalimokinit ngakiro na iteni dir atamar epote ngikaalak alo kide ka too kiboikinos ka Aburaam ka Isaka ta Yakobo kimuja Anapolou a Akuj. 12Nakaneni lu ejoikinit eya napolou, echakakinio kesi naribu, kigoro tokiricha ngikel kaneni.” 13#Mat 22:13; 25:30; Luk 13:28 Tolimok Yesu ekarikon a ngasigerea tama, “Kape nawi, esubakin na inupit iyong anikon.” Sodi tojoker ekasuban etich a ekapolon kangolo esaa ngolo.

Akitangalekinet a Yesu ngitunga lukaalak

(Mariko 1:29-34; Luka 4:38-41)

14Sodi tolot Yesu nawi a Petero toriam nakamuran a Petero eperi irakarit arukum. 15Toting Yesu akan keng, tangalek arukum keng. Sodi tonyou kisiak akisimuj ngesi.

16Na awaria, apot ngitunga yaut nia Yesu ngitunga lukaalak lu akoporito ngikerep, sodi kitwarak Yesu ngipean ngulu a akiroit ana alimuni, nabo kitangalek daang lu adeakasi. 17#Isa 53:4 Asubi ngesi kona sodi kiyookinotor nakolong alimuni ekadwaran a Akuj Isaya ebala: “Ngesi elope etwaranakini ngilekesinei yok nabo tolema ngidekesinei daang.”

Ngitunga lu eliworosi ngikewapak Yesu

(Luka 9:57-62)

18Na engolikinea Yesu asepich a ngitunga na eriamit ngesi, tolimok ngesi ngirukitos keng atamar toloto ekwakaye anam. 19Bu eketataman a etal nikeng tolim tama, “Eketataman, kewapi ayong iyong awadaang ani iteni.”

20Tatachak Yesu ngesi tama, “Eya takwee ngatabab na eduketa, tani ngikieny lu eporito eya ngakais, nakaneni Lokookeng a Itwaan bon ngesi emam ni icholongi kiangarea.”

21Tolim eche a ngirukitos keng tama, “Ekapolon, kimiekinae mono atolot atonuk apakang.”

22Tatachak Yesu ngesi tama, “Kiwapakinae ayong. Kimiek ngulu ikote ngikatoak tonuka ngikatoak kech.”

Akisililinget a Yesu ekuwam loapolon

(Mariko 4:35-41; Luka 8:22-25)

23Todoka Yesu natubwa kirukosi ka ngirukitos keng. 24Atipei tokut ekuwam loapolon ananam, tokuut ngitoroi kilapanakinos natubwa, tonyou atubwa abukor. Nakaneni ajotoe Yesu. 25Toloto ngirukitos a Yesu nikeng kitokienyut ngesi tamasi, “Ekapolon, toyuunae kare sua dikino kitoaki.”

26Tatachak Yesu kesi tama, “Nyo kibulitor esi kona? Abe edit anupit kus.” Tonyou ngesi kikilak ekuwam ka ngitoroi lu akuunito kisililing. Kililing wadaang tachakin chek.

27Tatalasi ngitunga daang ngakiro nguna kingitas tamasi, “Ani itwaan ikoni ne en? Epupete ngesi tani ekuwam ka ngitoroi a?”

Akitangalekinet a Yesu ngitunga ngiarei lu akoporito ngikerep

(Mariko 5:1-20; Luka 8:26-39)

28Na anangea ngesi ekwakaye anam nakwap a Ngigerasi, kiriamun ngesi ka ngitunga ngiarei lu akoporito ngikerep, eponito analielin. Adedeng ngitunga ngulu noi. Kotere adedengu kech, amam itwaan etoreene lorot ngolo. 29Atipei kiremasi kesi lokojokon tamasi, “Eya iyong ngakiro ka sua Lokookeng a Akuj a? Ibu iyong aboliar sua eringa esaa nyenanga a?”

30Nipei neni ayei atwom nakaalan a ngiputiro na adaka. 31Kimaimaa ngipean Yesu tamasi, “Ani kisaki iyong akitwarakin sua, kimiekinae atolomasi natwom a ngiputiro ngin.”

32Tolimok Yesu kesi tama, “Kapesi.” Sodi topudosi kesi tolomasi loputiro. Kipiiri atwom daang tochakun anakope toloma tooma nanam, tanyam daang anam.

33Kipiirioto ngikeyokok a ngiputiro lore. Kisisata kesi ngakiro daang, tani na asubakinosi alotunga aluarei akoporito ngikerep. 34Toloto ngitunga daang a ere aanyun Yesu. Na anyungareta ngesi, kimaimaa ebaasi torotok anakwap kech.

Currently Selected:

Matayo 8: ABIBILIA

Highlight

Copy