Matayo 4

Akiningo a Yesu

(Mariko 1:12-13; Luka 4:1-13)

1 # Ebura 2:18; 4:15 Sodi toreea Etau a Akuj Yesu nariet kiningio ngesi Ekipe kaina. 2Na aronitor Yesu ngakwaarisea ka ngapaaranisea ngatomwon-omwon, tanyam akoro. 3Bu Ekipe nikeng tolimok ngesi tama, “Ani kirai iyong Lokookeng a Akuj, kitiliwo chene ngamoru nugu akimuj.”

4 # Etal 8:3 Tatachak Yesu ngesi tama, “Igiritae nakitab a Akuj kona:

‘Nyeyari itwaan a akimuj bon

pearai eyari kotere akiroit daang

na itoruni nakituk a Akuj.’ ”

5Sodi toriko Ekipe ngesi Lore a Yerusalem, lo italeunitoe, kitowo ngesi analem a akai a Akuj, 6#Eosio 91:11-12 tolimok tama, “Ani kirai iyong Lokookeng a Akuj kimasar chene kwap, kainyo igiritae kona:

‘Elimokini Akuj ngimalaikae keng

kikamut kesi iyong a ngakan kech,

nyeenang amoru akeju kon.’ ”

7 # Etal 6:16 Tatachak Yesu tama, “Igiritae nabo kona: ‘Nyiining Ekapolon Akuj kon.’ ”

8Toriko Ekipe Yesu moru lokooyen noi kidodik ngesi ngapolosio daang a ngakwapea ka apolou kech. 9Tolim Ekipe tama, “Kainakini ayong iyong nugu daang kiriedik iyong kilip ayong.” 10#Etal 6:13 Sodi tatachak Yesu tama, “Kape iyong Esiitan. Igiritae kona:

‘Kilip Ekapolon lo erai Akuj kon,

sodi tosub etich keng bon!’ ”

11Sodi toisik Ekipe Yesu, pot ngimalaikae kingarakis ngesi.

Akisiakinet a Yesu etich keng anakwap a Galilaya

(Mariko 1:14-15; Luka 4:14-15)

12 # Mat 14:3; Mar 6:17; Luk 3:19-20 Ani iirari Yesu atamar aen Yoana alojela, tolot ngesi Galilaya. 13#Yoa 2:12 Abu ngesi nyiiboikin Nasaret, nakaneni tolot akiboi alore a Kaperinaum alo eyei diyete anam a Galilaya. Erai neni akwap a Sebulun ka Naputal. 14Asubasi nugu sodi kiyookinitor nguna kolong alimuni ekadwaran a Akuj Isaya ebala:

15“Ngitunga a akwap a Sebulun ka akwap a Naputal,

lowae lo a anam, ekwakaye a Yorudan, ka Galilaya,

akwap na ibooyoto ngibukui lu nyerai Ngiyaudi.

16 # Isa 9:1-2 Ngitunga ngulu eyakasi naribu,

ingolikinete akicha naapolon.

Ngulu eyakasi nakwap na aribu ana erai akitu,

ekwangikini akicha.”

17 # Mat 3:2 Napei ngina jik, tolomak Yesu akitatam ebala, “Tolunga ngasechesea kus, kainyo aapuu Apolou a Akuj.”

Anyarare a Yesu ngikechiemak a ngikolia nguomwon

(Mariko 1:16-20; Luka 5:1-11)

18Na alosio Yesu alokwaas a anam a Galilaya, abu kingolik ngikaitotoi ngiarei lu araakasi ngikechiemak a ngikolia, Simon (lo enyaritae Petero) ka lokaatokeng lo anyaritae Andirea, echakete epuute nanam. 19Tolimok Yesu kesi tama, “Kiwapakinae ayong sodi ketatam esi akirum ngitunga loger lo irumeta ngikolia.” 20Kimiekis kesi ngipuutei kech atipei sodi kiwapakis ngesi.

21Na arotokinio ngesi ngaren kaneni, kingolik ngikaitotoi ngiche ngiarei, Yakobo ka Yoana lu eraakasi talokookeng a Sebedayo. Ayakasi kesi ka apakech Sebedayo natubwa edonyete ngipuutei kech. Tanyara Yesu kesi. 22Tonyout kesi atipei kimiekis apakech anatubwa sodi kiwapakis Yesu.

Akitatam a Yesu ka akitojok ngitunga

(Luka 6:17-19)

23 # Mat 9:35; Mar 1:39 Erimit Yesu ngiwaitin daang a akwap a Galilaya itatami anakais a Atuk. Alimonori ngesi Ngakiro Naajokak a Apolou a Akuj, nakaneni etojokeene ngidekesinei ka ngilekesinei alotunga. 24Tokeikin ekipur keng nakwap daang a Siria. Sodi inunae ngesi ngitunga ngulu adeakasi ngidekesinei lugelagelae kangulu echanasi, ta lu ariabasi. Kitojok Yesu ngulu daang ekerepikinit, kangulu erakanarosi, ta ngulu angwalito. 25Kiwapak asepich a ngitunga ngina abuni alo Galilaya ka ngirerea Lutomon, Yesu. Apote ngiche alore a Yerusalem, ka akwap a Yudea ta lu aponito a ekwakaye angolol a Yorudan.

Currently Selected:

Matayo 4: ABIBILIA

Highlight

Copy