Luka 4

Akiningo a Yesu

(Matayo 4:1-11; Mariko 1:12-13)

1Abonguni Yesu alo Yorudan elomarit Etau a Akuj ileleba, toreea ngesi Etau a Akuj nariet, 2ni eningio ngesi Ekipe a ngirwa a ngitomwon-omwon. Na aronitor Yesu ngirwa ngulu daang, abu akoro tanyam ngesi na adaunotor ngirwa ngulu.

3Tolimok Ekipe ngesi tama, “Ani kirai iyong Lokookeng a Akuj, kibele chene ngamoru nugu toliworos akimuj.”

4 # Etal 8:3 Tatachak Yesu ngesi tama, “Igiritae nakitab a Akuj kona, ‘Nyeyari itwaan a akimuj bon!’ ”

5Toriko Ekipe Yesu ni ikeuna, kidodik ngesi atipei ngapolosio daang a akwap. 6Tolimok Ekipe Yesu tama, “Kainakini ayong iyong agogongu naga ka ebarit logo daang, kainakinio kolong ayong daang, kaneni apedori ayong ainakin itwaan ni asaki ainakin. 7Ibore en daang eliwor ikon kilip iyong ayong.”

8 # Etal 6:13 Tatachak Yesu ngesi tama, “Igiritae kona, ‘Kilip Ekapolon lo erai Akuj kon sodi tosub etich keng bon!’ ”

9Sodi toriko Ekipe ngesi Yerusalem kitowo ngesi analem a Akai a Akuj tolimok tama, “Ani kirai iyong Lokookeng a Akuj, kimasar kwap kane. 10Kainyo igiritae kona, ‘Emeuni Akuj ngimalaikae keng kitochoikis iyong.’ 11#Eosio 91:1 Ebala nabo dang, ‘Kikamunete kesi iyong a ngakan kech nyenang amoru akeju kon.’ ” #Eosio 91:12 #Etal 6:16

12Tatachak Yesu ngesi tama, “Igiritae kona, ‘Nyiining Akuj Ekapolon na erai Akuj kon.’ ”

13Ani erumori Ekipe akining Yesu a ngirotin kadaang, abu ngesi toisik Yesu wadio.

Esisau Yesu etich keng anakwap a Galilaya

(Matayo 4:12-17; Mariko 1:14-15)

14Tobongo Yesu Galilaya eyei agogongu a Etau a Akuj nikeng. Tokeikin ngakiro keng neni daang. 15Etatami ngesi anakais ana Atuk, kipuruut ngitunga daang ngesi.

Angerete ngitunga Yesu alo Nasaret

(Matayo 13:53-58; Mariko 6:1-6)

16Tolot Yesu lore a Nasaret nikolong apolounio, ani akolongit na Sabato tolot kai a Atuk loger lopalem sek. Abu ngesi tonyou akisomare ngagiran 17sodi nakinae ngesi akitab na a ekadwaran Isaya. Kiwolo ngesi akitab tangau ni igiritae atamar,

18 # Isa 61:1-2 “Eyei Etau a Ekapolon nikang, kapia ngesi ayong,

sodi etatamea Ngakiro Naajokak a Akuj lokebootok.

Kamea ngesi ayong alimokin luenan atamar elachakinio kesi,

ka angaar ngakonyen a ngimuduk,

ta alachakin lu isibuusikinito ngimoe kech,

19ka alimor atamar anang ekaru lo eyuunea Ekapolon ngitunga keng.”

20Togol Yesu akitab, nak ekiyaka, sodi kiboikin. Topochokis ngitunga daang lu ayakasi kai a Atuk ngesi ngakonyen. 21Kisian ngesi kesi ebala, “Eyookinosi ngagiran nugu akolongit na, kona tete iirareta esi isomao.”

22 # Yoa 4:44 Apot ngitunga daang kipuro ngesi nabo tatalasi ngakiro naajokak na eruoro ngesi. Tamasi kesi, “Meere lo lokookeng a Yosep a?” #1 Kapol 17:1

23Tolimok Yesu kesi tama, “Ayeni atamar ilimunete esi ngakamatak na ebalasi, ‘Kitedek emuron bon.’ Nabo itamarete esi ayong, ‘Tosub alore kon kalo nguna ngoon isubi alo Kaperinaum.’ ” 24Kalimokinit esi atamar, “Nyelimoritae ekadwaran a Akuj alore a adakar keng. 25Topupokinae esi ayong: Kalimokinit atamar ayakasi ngapuseru nakaalak Isirael ngirwa lukolong a ekadwaran a Akuj Elija, na angopea akiru ngikaru nguuni ka ngilapio ngikan-kapei, bunio eron a akoro loaronon noi. 26Apon Elija nyeemear tani ni eyei apei kanguna alo Isirael, mati ni a apuserut a apei ana alomit Sarepita, nakwap a Sidon. 27#1 Kapol 17:8-16 Nabo ayakasi ngitunga lukaalak lu adeakasi enomokere alo Isirael ngirwa lu a ekadwaran a Akuj Elicha, nakaneni amam kesi tani epei lo apon kitojokae mati Naaman lo a akwap a Siria.” #2 Kapol 5:1-14

28Ani iirarete ngitunga lu ayakasi kai a Atuk ngakiro nguna, tongoa kilelebunos. 29Tonyout kibwatasi Yesu tachadasi alore, ani enangete kidiama aukot na a ngirerea, tasaka akikokoriyor Yesu kaneni. 30Nakaneni abu Yesu kitor kiding ajore tolot.

Ekile lo ebapit Ekipe

(Mariko 1:21-28)

31Tolot Yesu nakwap a Galilaya tanang lore lo anyaritae Kaperinaum, ni etatamea ngitunga akolongit na a Sabato. 32Tatala ngitunga ekitatame keng, kainyo etatami ngesi a apolou anakationon. 33Ayei itwaan ni akoporito ngikerep tooma kai a Atuk, abu ngesi kirema tama, 34#Mat 7:28-29 “Wae! Eya iyong ngakiro ka sua Yesu lo a Nasaret a? Ibu iyong amunyar sua a? Ayeni ayong atamar iyong ngesi ngae: Irai iyong emeuna lo italeuno a Akuj!”

35Todungok Yesu Ekipe tama, “Kililing sodi tolom anitwaan kaen!” Tadakak Ekipe itwaan ngini kwap kiding ajore sodi topud Ekipe anikeng emam naaronok asubea ngesi.

36Tatalasi ngitunga daang ngakiro nguna tolimonokinos make tamasi, “Anukiro nugu? Kainyo edungonokini itwaan en ngipean aniationon atamar topudutu anitwaan sodi topudut dir!” 37Apot ngakiro a Yesu tokeikinos akwap ngina wadaang.

Etangalekini Yesu ngitunga lukaalak

(Matayo 8:14-17; Mariko 1:29-34)

38Topud Yesu alokai a Atuk toloma nawi a Simon. Erakarit nakamuran a Simon arukum lokojokon, sodi tolimokinae Yesu ngakiro a elekes keng. 39Tolot Yesu towo alodiye nakamuran a Simon. Tolimok arukum ngina atamar toisik itwaan ngini, tojoker nakamuran a Simon atipei tolomak akisimuj kesi.

40Adooyoret a akolong, apot daang lu adeakasi ngipaalon kech ngidekesinei ngikaalak, yaut kesi nia Yesu kitojokae. Kidokok ngesi kesi daang ngakan kitangalek. 41Tani ngipean apot topudut alotunga iremasi, ebalasi, “Irai iyong Lokookeng a Akuj!”

Kikilanak Yesu daang nyiisuruorik tani epei kainyo ayenete kesi atamar Yesu ngesi erai Kiristo.

Etatami Yesu anakais a Atuk

(Mariko 1:35-39)

42Ani iwalari, torotok Yesu alore tolot nariet. Apot ngitunga tolomakis akisak ngesi, ani eanyunete, tasaka akiratakin ngesi nyeelot wache. 43Nakaneni tolimok Yesu kesi tama, “Ejoikinit ayong etatami Ngakiro Naajokak a Apolou a Akuj tani alorerea aluche, kainyo nguna kolong kameuni ayong Akuj akisub.”

44Sodi kitatam ngesi Anakais a Atuk a akwap a Yudea.

Currently Selected:

Luka 4: ABIBILIA

Highlight

Copy