MARIKO 7

Amechesio kebiima biabakuuka

(Mat. 15:1-9)

1Olwa Abafarisayo nende abandi khubahandichi bamalako, abali nibarulile Yerusalemu bakhung'ana aha Yesu yali, 2balola mbu balala khubeechibe bali nibaliitsanga namakhono kafwabiibwe, eshisina mbu, amakhono kalasaabilwe tawe.

3(Okhuba Abafarisayo nende Abayahudi boosi shibafuchililungwa okhulia nibalasaabile amakhono kabwe ta, okhuula basaabe mbeli. Bakholanga bario khulwokhusia akemilukha chiabakuuka babwe. 4Khandi olwa baba nibarula khushiiro, shibafuchililungwa okhulia eshiokhulia eshia barusiye khushiiro nishishili okhwosibwa obulayi, kata nibashili okhwisiiya abeene tawe. Khandi chiliho emilukha chindi ebinji, echiabahebwa, echiabakholanga, njiechino mbu, okhwosia ebikombe, tsinyungu nende ebikaye, ebiakaasibwa okhurula khumukasa.)

5Kho Abafarisayo nende abahandichi bamalako nibareeba Yesu bari, “Nishiina eshichilanga abeechibo nilabamenya okhulondana nemilukha chiabakuuka befwe bakhuleshela nende okhuhesia akabakhwechesia ta, nebutswa baliitsanga ebiokhulia nibalasaabile amakhono kabwe tawe?”

6 # Isa. 29:13 Yesu nabakalusia ari, “Isaya yalakula habwene khwinywe abekaati, shinga olwa kahandikwa kari nanwa mbu,

‘Abandu bano bambetsanga oluyali mumakhuwa komunwa butswa,

ne emioyo chiabwe chili ehale ninasi.

7Banzinamilanga obwinamili bwa butswa,

okhuba aka bechesinjia namalachilisio kabandu nabandu butswa!’

8Mulekhanga lilako lia Nyasaye ne nimuhanda khu milukha chiabandu.”

9Khandi Yesu nababoolela ari, “Muli nende injila indayi muno eya mulobelangamwo amalako ka Nyasaye kho mbu mulonde emilukha chienywe. 10#Okhur. 20:12; Okhuk. 5:16; Okhur. 21:17; Abal. 20:9Okhuba Musa yalaka mbu, ‘Helesinjia papawo nende mamawo oluyali,’ khandi mbu ‘Ounyeka papawe kata mamawe, okhuula yeerwe.’ 11Nebutswa inywe mwechesinjia muri, ‘Omundu naba naboolela samwana noho nyinamwana mbu, inganga yamwakhanyoolilekhwo okhurula khwisie ni Koribani (Eshisina mbu, eshihaanwa khu Nyasaye),’ 12bulano shimufuchililanga omundu oyo okhukholelakhwo samwana kata nyinamwana eshindu shiosi shiosi tawe. 13Khulwa amechesio kamwechesinjia, mufwabinjia likhuwa lia Nyasaye, nende akandi amanji akamukholanga.”

Akachilanga omundu naba omwonooni

(Mat. 15:10-20)

14Khandi Yesu nalanga abandu okhwitsa ewa yali, ne nababoolela ari, “Mumbulile inywe mwesi mana mumanyilisie eshisina shielikhuwa lino. 15Eshinjilanga mumundu, shishimwonooninjiakhwo ta, habula eshirulanga muye nishio eshimwonooninjia [ 16Ne ouli namarwi kokhuhulila, ahulile!”]

17Ne Olwa yalekhana nabandu niyenjila munzu, abeechibe bamureeba mbu abenoosiekhwo khukoluchelo olwo. 18Mana Yesu nabareeba ari, “Khane mwesi shimuli nobumanyilisi ta? Shimumanyile mbu eshinjila mumundu nishirula elwanyi shishimwonoonia ta? 19Shichila shishinjilanga mumwoyokwe ta, habula mundamwe ne nishirula elwanyi.” Kho mukhuboola ako, Yesu yafuchilila mbu ebiokhulia biosi nebisiiyikhu khulwa okhuliibwa.

20Nameeta okhuboola ari, “Ne eshirulanga mumundu nishio eshimwonooninjia. 21Okhuba mumwoyo kwomundu mukari, karulangamwo amapaaro amabi akemililanga omundu okhukhola obuyilani, obwifi, obwiiri, obuheyi, 22obwikombi obumayanu, obukaati, obwilaasi, imbalikha, okhuchiikha, okhwichinjimisia nende obuyingwa. 23Amakhuwa amabi ako koosi karulanga mumundu mukari nikamwonoonia.”

Omukhasi owali nobusuubili

(Mat. 15:21-28)

24Mana Yesu narulaho natsia ehale mungongo tsia Tiro nende Sidoni.#7:24 Sidoni: Amahandiko kandi kalekhanga elwanyi Sidoni. Mana niyenjila munzu nalenya omundu yesi yesi okhumanya mbu alimwo ta, nebutswa, shikanyalikha okhubiswa tawe. 25Ne habwene na habwene omukhasi undi, owomwanawe omukhaana omutiiti yali nanyasibungwa neshishieno, yahulila khuka Yesu yali nakholanga. Niyetsa bwangu ewa Yesu yali, ne nakwa mumakuluke namwinamila. 26Omukhasi oyo yali omugiriki, owomuluyia lwa Abasirofoinike, abeshialo shia Siria. Nasaaya Yesu mbu arusie eshishieno mumukhaanawe. 27Naye Yesu namukalusia ari, “Lekha mbeli abaana baliisibwe bekure, okhuba shinobulayi okhubukula eshiokhulia shiabaana nofuubila tsimbwa tawe.”

28Naye omukhasi oyo nakalusia ari, “Omwami, kata tsimbwa etsili hasi weimeesa, tsiliitsanga khumbungulusi tsieshiokhulia etsiabaana babulungusiye.”

29Mana Yesu namuboolela ari, “Khulwa likalusiolio elo, kalukha ingowo. Eshishieno eshio shimalile okhurula mumukhaanawo.”

30Kho omukhasi oyo nakalukha ingowe ne nanyoola omukhaanawe niyeyalisiye khushitali, eshishieno nishimurulilemwo.

Yesu ahonia owekala amarwi khandi wolulimi lwahanda

31Mana Yesu nachelela okhurula mungongo tsia Tiro ne nabirira mu Sidoni, nakholomokha khunyanza ya Galilaya, nabira okhutsia mungongo tsia Dekapoli. 32Abandu bandi bamureerera omundu owali niyekala amarwi khandi wolulimilwe nilwahanda. Nibamusaaya mbu amurekhwo emikhono. 33Kho Yesu namubukula namusitia handulo, narula ahomukanda kwali, nara tsinzalatsie mumarwike. Nafuutsa amare, ne natiila khululimi lwomundu oyo. 34Kho Yesu nahenga mwikulu, niyeshia amahumo ne naboolela omundu oyo ari, “Efatsa,” eshisina mbu, “Wikushe!” 35Mana amarwi komundu oyo nikekukha, olulimilwe nilubohololokha, ne nachaaka okhuboola obulayi. 36Ne Yesu nabakaania mbu shibalaboolelakhwo omundu yesi yesi likhuwa elo tawe. Nebutswa olwa yameeta okhubakaania ario, nolwa abandu abo nabo bameeta okhukaboola nibareerekhwo omwoyo. 37Abandu bahuka muno, nibaboola bari, “Akholile ebindu biosi habwene, mbu, kata akholanga abekala amarwi okhuhulila, nende abolulimi lwahanda okhuboola.”

Currently Selected:

MARIKO 7: OLUPR

Highlight

Copy