MARIKO 16

Okhulamukha kwa Yesu okhurula mukhufwa

(Mat. 28:1-8; Luka 24:1-12; Yoh. 20:1-10)

1Ne olwa Isabato yali niyihwele, Mariamu Magadalene, Mariamu nyinamwana Yakobo nende Salome, bakula marashi keshing'ari eshilayi mbu, batsie batsushilile khumubili kwa Yesu. 2Mana khunyanga yambeli yelichuma, mumabwibwi eliuba niliakharula, abakhasi abo nibahuuna okhutsia khung'ani. 3Nabo nibali khunjila, bareebananga abeene khu beene bari, “Ounaukhuserenjesilie lichina okhurula khung'ani niwiina?” 4Nebutswa olwa bachinguula tsimoni tsiabwe nibahenga, balola lichina nilimalile okhuserenjesibwa. Liali lichina likhongo muno. 5Kho nibenjila mung'ani, ne nibalola omusiani omuraaka niyekhaale mung'ani khulubeka lwomukhono musaatsa, niyefwalile ikanzu indafu, ne nibahuka muno. 6Naye nababoolela ari, “Mulahuka tawe. Emanyile mbu mukhabanga Yesu wa Nazareti, owabambilwe. Alamuushe, shiali hano tawe. Lole, aha babeele nibamwalisiiye ngahano. 7#Mat. 26:32; Mrk. 14:28Nebutswa mutsie, muboolele abeechibe nende Petero mbu, Yesu yekholeele okhutsia Galilaya inywe nimushili. Mulamulola nali ebwene eyo, shinga olwa yali niyamuboolela.” 8Mana nibelukha nibarula hang'ani, shichila bali nibaiire khandi nibatechelanga. Mana nibalaboolelakhwo omundu likhuwa liosi liosi tawe shichila bali nibariire.

Yesu aloleshela Mariamu Magadalene

(Mat. 28:9-10; Yoh. 20:11-18)

[ 9Mana mumabwibwi khunyanga eyilonda khunyanga eya Isabato, Yesu yaranjilila okhumuloleshela Mariamu Magadalene, owa yali niyayiniamwo ebishieno musafu. 10Naye natsia naboolelakhwo abali nibabeelenje nende Yesu. Ebise ebio bali nibashiikhuulanga nibalila amasika. 11Nebutswa olwa bahulila mbu, Yesu aliho mwoyo, khandi mbu, Mariamu amuluutsi, shibasuubila tawe.

Yesu aloleshela abaloondibe babili

(Luka 24:13-35)

12Olunyuma, Yesu yaloleshela abalondibe bandi babili nali mubukondo bwomundu undu butswa. Abaloondibe abo bali nibachendanga nibarula mwitookho. 13Nabo nibakalukha okhuboolela abeechi bandi. Nebutswa abeechi bandi abo shibasuubila abashiabwe abo tawe.

Yesu aloleshela abeechibe ekhumi namulala

(Mat. 28:16-20; Luka 24:36-49; Yoh. 20:19-23; Ebikh. 1:6-8)

14Mana olunyuma lwene, Yesu naloleshela abeechibe beene ekhumi namulala, olwa bali nibekhaale nibaliitsanga. Ne nabahalabila khulwa okhubula okhusuubili khwabwe nende khulwa obuumilanu bwemioyo chiabwe. Shichila shibaali nibasuubile abali nibamuluutsi, olwa yali namalile okhulamukha okhurula mukhufwa tawe. 15#Ebikh. 1:8Mana nababoolela ari, “Mutsie mushialo shiosi, muyaalile abandu boosi Injiili. 16Omundu yesi yesi ousuubila nabatiisibwa yakhahonibwe. Ne oulasuubila ta, yakhaheebwe eshinyasio. 17Ne ebilolelo bino bilalonda abasuubila, mbu muliira lianje, balarusia ebishieno, balaboolanga mutsinimi etsilali etsiabwe ta, 18balatiila tsinzokha namakhono noho kata okhunywa obufwisi bwosi obwiiranga, ne shibilabakholakhwo eshindu shiosi shiosi tawe. Balaretsanga amakhono kabwe khubalwale, ne abalwale abo bahona.”

Yesu akulukha natsia mwikulu

(Luka 24:50-53; Ebikh. 1:9-11)

19 # Ebikh. 1:9-11 Mana olwa Omwami Yesu yali namalile okhubaboolela amakhuwa ako, yabukulwa nayilwa mwikulu, ne niyekhala khumukhono musaatsa kwa Nyasaye. 20Kho abeechibe abo nibarulaho nibatsia okhuyaala Injiili buli habundu. Naye Omwami Yesu mwene nakhola halala ninabo nende okhutinyisia likhuwalie nebilolelo biamakana ebialoondana halala neinjiili ya Yesu eyo. Amina.]

OKHUMALISIA KHUNDI KHWA KHALE

[ 9Ne khunyanga yambeli eyiranjilila inyanga eya Isabato, olwa Yesu yali nalamuushe okhurula mukhufwa, yaranjilila okhuloleshela Mariamu Magadalene, owa Yesu yali narusiyemwo ebishieno musafu.#16:9 Obuhandichi bundi bwa khale bwamalilisia Injiili ya Mariko nende omulingo kwa 16:9-10. 10Mariamu Magalene natsia niyenoosiakhwo aba Yesu yali nabelenje ninabo, nabo bali nibekhuulanga nibalila amasika. Ne olunyuma lwako, Yesu Omwene naruma abeechibe okhutsia mushialo shiosi, okhurula ebukwe okhuula mumbo, okhuyaala Injiliye indakatifu khandi eyoburume bwobuhonia bweinziayo.]

Currently Selected:

MARIKO 16: OLUPR

Highlight

Copy