MATAYO 5

Okhuyaala khwa Yesu nali khushikulu

1Ne olwa Yesu yalola emikanda yatikulukha khushikulu, niyekhala hasi. Abeechibe nibetsa khuye. 2Naye nachaaka okhubeechesia naboola ari.

Obutsaatsaafu bwatieli

(Luka 6:20-23)

3“Nabeikhabi abamanani mumioyo,

okhuba obwami bwa Nyasaye nobwabwe!

4 # Isa. 61:2 Nabeikhabi abali neshibeela,

okhuba Nyasaye alabalemia emioyo!

5 # Tsits. 37:11 Nabeikhabi abaholo,

okhuba balanyoola aka Nyasaye yabasuubisia khushialo!

6 # Isa. 55:1,2; Sira 24:21 Nabeikhabi abali neinzala khandi abalibwa obuloho bwokhukhola akokhwenya khwa Nyasaye,

okhuba Nyasaye alabekusia!

7Nabeikhabi abali netsimbabasi,

okhuba balanyoola tsimbabasi!

8 # Tsits. 24:3,4 Nabeikhabi abemioyo emieleleshe,

okhuba balalola Nyasaye!

9Nabeikhabi abareeranga omulembe,

okhuba balalangwa mbu, abaana ba Nyasaye!

10 # 1 Pet. 3:14 Nabeikhabi abasandibwa khulwa okhukhola akokhwenya khwa Nyasaye,

okhuba obwami bwa Nyasaye nobwabwe!

11 # 1 Pet. 4:14 “Muli neikhabi inywe abanyekwa nimusandibwa nende okhuchikhwa amakhuwa koosi amabi shichila mbu muli abaloondi banje. 12#2 Akak. 36:16; Sira 2:8; Ebikh. 7:52Mwikhoye nimusangaala, okhuba mwabishilwa omukabo omukhongo mwikulu. Shinga olwa bamusandinjia inywe bario, nolwa abalakusi abamuranjilila basandibwa bario.

Omunyu nende Obulafu

(Mrk. 9:50; Luka 14:34-35)

13 # Mrk. 9:50; Luka 14:34,35 “Inywe muli shinga omunyu kweshialo. Ne omunyu nikuba nikutsinziba, eshiuya shiakwo shinyala okhukalusibwamwo shirie? Shikukaasila eshindu shiosi shiosi khandi ta, habula kusukunwa elwanyi, nende okhusenelwa hasi nabandu.

14 # Yoh. 8:12; 9:5 “Inywe muli shinga obulafu bweshialo. Litookho eliombakhwa khushikulu shilinyala okhulekha okhulolekha tawe. 15#Mrk. 4:21; Luka 8:16; 11:33Kata abandu shibahafinjia itaha nibachifunishila munyungu ta, habula bachirenjekhanga khushichibi shiayo niyibakhosilia abali munzu boosi. 16#1 Pet. 2:12Kho obulafu bwenywe bwashenje burio imbeli wabandu, kho mbu balole ebikhole bienywe ebilayi, nibamuhelesia senywe ouli mwikulu oluyali.

Amechesio okhulondana namalako ka Musa

17“Mulapaara mbu isie ndetsa okhurusiaho amalako ka Musa nende amechesio kabalakusi ta, shindayetsa okhukarusiaho ta, habula okhukaralisia. 18#Luka 16:17Okhuba emuboolela toto mbu, kata likulu nende eshialo nibiakhahwaho, yibulaho kata inyukuta ndala, kata akharonyelesi khalala khumalako, akhalibula okhuusibwa, okhuula koosi koosibwe. 19Khulweshio, omundu yesi yesi oufunaka lilako, kata niliba litutu mukoosi, ne niyechesia abandi okhulifunaka, omwenoyo yakhabe omututu mubwami bwa Nyasaye. Nebutswa omundu yesi yesi oukakhola, niyechesia abandu bandi okhukatiila yakhabe omukhongo mubwami bwa Nyasaye. 20Niko akachila nemuboolela mbu, obwisiikwa bwenywe nibulashila obwa abeechesia abamalako nende Abafarisayo ta, shimwakhenjilekhwo mubwami bwa Nyasaye kata nahatuutu tawe.

Amechesio khu akeliruma

21 # Okhur. 20:13; Okhuk. 5:17 “Mwahulila shinga olwa abandu khale baboolelwa bari, ‘Shiolera omundu ta, omundu yesi owiira owashie, okhuula akhalachilwe eshiina.’ 22Nebutswa isie emuboolela bulano mbu; yesi yesi ousinyishila owashie, alakhalachilwa eshiina, naye ounyeka owashie naboola ari, ‘Oli omusilu iwe,’ alareerwa mushiina, ne yesi yesi ounyeka owashie ari, ‘Oli eshiyingwa,’ yakhabe mumatinyu akokhusukunwa mumulilo okulasimanga tawe. 23Kho noba noli ahambi okhuhaana eshihaanwashio khu Nyasaye khu eshimalilo eshiemisango, ne niwitsulila mbu, owashio ali nelikhuwa libi khwiwe, 24lekha butswa eshihaanwashio eshio hashimalilo shiemisango, mana otsie bwangu khuwashio oyo, mukaasie ninaye omulembe, kho okalushe ohaane eshihaanwashio khu Nyasaye.

25“Okaasie omulembe bwangu nende oukhwinjilila itookho nimushili okhuula mushiina, yakhetsukhana yakhuhaana mumakhono komukhalachi weshiina, naye omuyaasi nakhuhaana mumakhono komusikari, ne nosukunwa mumbohe. 26Ekhuboolela toto mbu, shiolarulamwo ta, okhuula lwolaba nomalile okhurunga isende yene eyihelelesia khu akokhalachiilwe.

Amechesio khu akobubeeyi

27 # Okhur. 20:14; Okhuk. 5:18 “Mwahulila shinga olwa kaboolwa mbu, ‘Shiolaheyanga ta!’ 28Nasi bulano emuboolela mbu, yesi yesi ouhenga khumukhasi namwikoomba, amalile okhuheya ninaye mumwoyokwe. 29#Mat. 18:9; Mrk. 9:47Kho imoniyo eyokhumukhono omusaatsa niyikhwinjisia mubwonooni, ochitsomole, mana ochisukune ehale, shichila bwakhaba obulayi okhukosia shilala khubiungobio bimubilikwo, okhushila omubilikwo kwosi okusukunwa mumulilo kulasimanga tawe. 30#Mat. 18:8; Mrk. 9:43Ne omukhonokwo omusaatsa nikuba nikuchila winjile mubwonooni, okureme, mana okusukune ehale, shichila bwakhaba obulayi shilala khubiungo biomubilikwo shitibe, okhushila omubilikwo kwosi okhusukunwa mumulilo okulasimanga tawe.

Amechesio khu akokhulekhana khwomusaatsa nomukhasiwe

(Mat. 19:9; Mrk. 10:11-12; Luka 16:18)

31 # Okhuk. 24:1-4; Mat. 19:7; Mrk. 10:4 “Mwahulila khandi akaboolwa mbu, ‘Omusaatsa yesi yesi oulekhana nomukhasiwe, okhuula amuhelesie ibarwa yokhulekhana.’ 32#Mat. 19:9; Mrk. 10:11,12; Luka 16:18; 1 Abakor. 7:10,11Nebutswa isie emuboolela mbu, omusaatsa yesi yesi oulekhana nomukhasiwe, nikalali khulwa eshifune shiobuheyi ta, akhola omukhasi oyo okhuba omuheyi; naye outeeshia omukhasi tsana oyo yesi khandi aba omuheyi.

Amechesio khu akebitsubo

33 # Abal. 19:12; Obub. 30:2; Okhuk. 23:21 “Khandi mwahulila shinga olwa abandu bakhale baboolelwa mbu, ‘Shiolachweyakhwo okhuusia aka wetsuba okhukhola ta, habula okhuula okhole aka wetsuba okhukholela OMWAMI Nyasaye.’ 34#Yak. 5:12; Isa. 66:1; Mat. 23:22Nebutswa isie emuboolela mbu, shimuletsubakhwo okhukhola eshindu shiosi shiosi kata nahatutu ta, shimuletsubakhwo nimurumbula likulu ta, okhuba nilio eshifumbi shioburuchi shia Nyasaye. 35#Isa. 66:1; Tsits. 48:2Kata shimuletsubakhwo nimurumbula eshialo ta, okhuba nishio eshialambisinjiakhwo ebilenjebie, kata khulwa Yerusalemu ta, okhuba nilio litookho liomuruchi omukhongo. 36Khandi shioletsubakhwo khulwa omurwekwo ta, okhuba shionyala okhukalukhasia kata elala khwiswilio liaba lietsimbutsi noho okhubula tsimbutsi tawe. 37Noboola mbu, ‘efuchilile’, kabe butswa kario, ne noboola mbu, ‘Tawe,’ khandi kabe butswa kario. Elindi liosi liosi eliomeetakhwo okhushila ako, lirula khu Omwonooni oyo.

Amechesio khu akokhurunga eshikwoli

(Luka 6:29-30)

38 # Okhur. 21:24; Abal. 24:20; Okhuk. 19:21 “Khandi mwahulila mbu kaboolwa mbu, ‘Imoni khumoni, ne eliino khuliino.’ 39Nebutswa isie emuboolela mbu, shiolarungakhwo omundu omumayanu eshikwoli tawe. Habula omundu nakhupaama olukhofi khuluseya olwa khumukhono musaatsa, omushiukhasilie oluseya lundi khandi akhupaame. 40Ne kata omundu nakhwinjilila itookho, kho mbu abukule lishatilio, muleshele abukule kata likotilio. 41Ne omundu nakhuluunyia okhuchinga omusiikokwe khulwoluchendo oluhela ikilomita ndala, okuchinje khulwa tsikilomita tsibili. 42Omundu nakhusaba eshindu shiosi shiosi omuhelesie, naye owenya okhwihola khwiwe eshindu, omuhosie.

Amechesio khu akokhuheela abasuku

(Luka 6:27-28,32-36)

43 # Sira 12:4-7 “Mwahulila mbu kaboolwa mbu, ‘Oheele owashio, ne nosila omusukuwo.’ 44Nebutswa isie emuboolela mbu, muheele abasuku benywe khandi musaayile abo abamusandia, 45#Sira 4:10kho mana mube abaana ba Seenywe ouli mwikulu. Okhuba ye akholanga eliubalie okhwashila abamayanu nende abalunjishi, khandi akholanga ifula okhukwiila abalunjishi nende abalali abalunjishi tawe. 46Okhuba nimuba nimuheela abamuheela inywe bonyene, muli nomukabo shiina? Kata abasololi bobushuru bosi bakholanga akenako! 47Khandi nimuba nimushiesania abeene kubeene butswa, kho mubashilila shiina abandi? Abamahanga bosi bakholanga akenako! 48#Abal. 19:2; Okhuk. 18:13Khulweshio, mukhoyile okhuba abalamba, shinga olwa Senywe ouli mwikulu yesi ali omulamba.”

Currently Selected:

MATAYO 5: OLUPR

Highlight

Copy