MATAYO 23

Yesu atula Abahandichi bamalako nende Abafarisayo

(Mrk. 12:38-39; Luka 11:43,46; 20:45-46)

1Mana Yesu naboolela abemikanda halala nende abeechibe ari, 2“Abahandichi bamalako nende Abafarisayo nibo abali nobunyali bwokhwinoosia amalako ka Musa. 3Kho mukhoyile okhuhulila nende okhuloonda buli shindu eshia bamuboolela okhukhola. Nebutswa mulaloondakhwo ebikhole biabwe ta, shichila shibakholanga akabayaalanga tawe. 4Babohanga khumikongo chiabandu emisiko emisiro, khandi echiabalanyala okhuchinga ta. Nebutswa shibafuchililanga kata okhuchinguula eshiteere okhubakhoonya okhuchinga emisiko tsana echio tawe. 5#Mat. 6:1; Okhuk. 6:8; Obub. 15:38Bakholanga koosi mbu abandu babalole. Okhuba bebohanga tsikhanda tsiamaseelo, etsiahandikwakhwo amalako mutsinyukuta tsikhongo khubweni bwabwe nende khwichemo lirambi liokhumakhono kabwe kho mbu baloleshe. 6Bachamanga okhwikhala khubifumbi habundu woluyali mumasabo nende ebifumbi bioluyali bieimbeli mutsisinagogi. 7Khandi bachamanga okhushiesibwa noluyali nibali mubiiro nende okhulangwa mbu, ‘Omwechesia.’ 8Nebutswa inywe shimulafuchililekhwo okhulangwa mbu ‘Omwechesia,’ tawe, shichila mwesi muli abebule khandi muli nende omwechesia mulala yenyene. 9Khandi shimulalanjekhwo omundu yesi yesi khushialo khuno mbu, ‘Papa’ ta, shichila muli nende Papa mulala yenyene ouli mwikulu. 10Kata shimulafuchililekhwo okhulangwa mbu, ‘Abami’ tawe, shichila Omwami wenywe ni mulala yenyene, ne niye Kristo. 11#Mat. 20:26,27; Mrk. 9:35; 10:43,44; Luka 22:26Omukhongo muno mwinywe okhuula abe omukhalabani wenywe. 12#Luka 14:11; 18:14Omundu yesi owiyemekha omwene alatutuyibwa, naye owitutuyia omwene, alachinguulwa.

Yesu asiomela abekaati

(Mrk. 12:40; Luka 11:39-42,44,52; 20:47)

13“Muli mushilaamo shiobubi inywe abahandichi bamalako nende Abafarisayo. Inywe abekaati, mwikalilanga abandu omuliango kwokhwinjila mubwami bwa Nyasaye, ne kata inywe beene shimwinjilangamwo kata okhufuchilila abo abateemanga okhwinjilamwo tawe.#23:13 Amahandiko kandi kali nolunyaali lwa 14 mbu, Muli mushilaamo shiobubi inywe abahandichi abamalako nende Abafarisayo! Inywe abekaati! Munuulanga ebiabakhasi abalekhwa biosi, nimusaaya amasaayo amarambi akobwikaati! Khulweshio Nyasaye yakhamuhelesie eshinyasio eshikhongo muno

15“Muli mushilaamo shiobubi inywe abahandichi bamalako nende Abafarisayo! Inywe abekaati! Mwelemanga khunyanza nende okhuchenda mubialo khulwa okhukhola omundu mulala okhuba omuloondi wenywe. Ne olwa muba nimumukholile okhuba omuloondi wenywe, mumukhola akhandi khabili okhuba oukhoyile okhutsia mumulilo kulasimanga ta okhushila kata inywe beene.

16“Muli mushilaamo shiobubi inywe abemilisi ababofu! Mwechesinjia mbu, ‘Omundu niyakhetsuba khulwa Ihekalu, eshitsuboshie eshio neshiabutswa, nebutswa niyetsuba khulwa itsahabu ya muhekalu, okhuula aliinde eshitsubo eshio.’ 17Inywe ababofu abayingwa! Eshishila eshindi nishilena? Itsahabu noho Ihekalu, eyikholanga itsahabu okhuba indakatifu? 18Khandi mwechesinjia mbu, ‘Omundu niyakhetsuba khushimalilo shiemisango, eshitsuboshie eshio neshia butswa, nebutswa niyetsuba khulwa eshihaanwa eshili khushimalilo shiemisango, okhuula aliinde eshitsubo eshio.’ 19Muli ababofu murie! Nishiina khubino eshishila eshindi, eshihaanwa noho eshimalilo shiemisango, eshikholanga eshihaanwa eshio okhuba eshitakatifu? 20Kho owitsuba narumbula eshimalilo shiemisango, yetsubanga khushio khandi khubihaanwa biosi ebilikhwo. 21Naye owitsuba narumbula Ihekalu, yetsubanga khuyo nende khu Nyasaye oumenyangamwo. 22#Isa. 66:1; Mat. 5:34Ne owitsuba narumbula mwikulu, yetsubanga khushifumbi shia Nyasaye nende khumwene oyo owikhalangakhwo.

23 # Abal. 27:30 “Muli mushilaamo shiobubi inywe, abahandichi bamalako nende Abafarisayo! Inywe abekaati! Muhaanilanga Nyasaye eshitonye eshielikhumi shiamasafu keshiuya shieshing'ari ebilangwa mbu eminana, ebinzari, nende chiira, nebutswa mulechelesnjia amechesio amakhulundu akamalako mbu, obwatoto, tsimbabasi nende obwisiikwa. Mukhoyile okhukhola ako, nebutswa mulalechelesia akandi tawe. 24Inywe abemilisi ababofu! Munyakhananga okhurusia eshindu eshituutu shinga isi mubiokhunywa bienywe, ne nimumila eshindu eshikhongo shinga ingamia nimulashiluutsi tawe.

25“Muli mushilaamo shiobubi inywe abahandichi bamalako nende Abafarisayo! Inywe abekaati! Mwosinjia eshikombe nende isahani khwikulu khwabio butswa, ne mukari mwabio mwitsuulemwo ebia munuulile khulwobulaangu! 26Iwe Omufarisayo omubofu! Ranjilila wosie eshikombe mukari mwashio kho shibe eshilafu kata elwanyi washio!

27 # Ebikh. 23:3 “Muli mushilaamo shiobubi inywe abahandichi abamalako nende Abafarisayo! Inywe abekaati! Muli shinga ebilindwa ebibashilwe olufuyo, ebilolekha nibili ebilayi elwanyi wabio, ne mukari bitsuulemwo amakumba kemilambo echibolanga. 28Munjila ndala eyo, elwanyi mulolekhanga abalayi khubuli mundu, nebutswa mukari mwenywe, mwetsulamwo obwikaati nende obwonooni.

Yesu arumbula eshinyasio khubekaati

(Luka 11:47-51)

29“Muli mushilaamo shiobubi inywe abahandichi bamalako nende Abafarisayo! Inywe abekaati! Muloonganga ebilindwa ebiabalakusi obulayi mana mukaasia ebilindwa biabandu abalunjishi, 30nimwiyitsiala mbu, muba nimwamenya mutsinyanga tsiabakuuka benywe, shimwakhakholile akabakhola nende okhwira abalakusi tawe. 31Khulweshio, mufuchililanga mbu muli abolwibulo lwabenabo abeera abalakusi! 32Tsiililile mana mumalilisie akabakuuka benywe bachaachisia. 33#Mat. 3:7; 12:34; Luka 3:7Inywe abali shinga tsinzokha khandi abetsukhulu betsinzokha! Shimunyala okhwihonokokha okhurula khushinyasio shiomumulilo okulasimanga tawe. 34Kho emuboolela toto mbu, ndalamurumila abalakusi, abandu abachesi nende abeechesia. Abandi khubo mulabeera, ne nimubamba abandi, nabandi nabo nimubakhupa netsikhoba mu tsisinagogi, nimubaloonda okhurula mwitaala okhutsia mulindi. 35#Obucha. 4:8; 2 Akak. 24:20,21Kho eshinyasio eshia abo abeerwa boosi nibabula eshikha shilaba khwinywe, okhurula khukhwiirwa khwa Abeli owali nabula eshikha, okhuula khukhwiirwa khwa Zakaria omwana wa Barakia, owa mwerera hakari wa Ihekalu nende eshimalilo shiemisango. 36Emuboolela toto mbu; eshinyasio eshiabandu berwa abo boosi, shilaba khubolwibulo lwabulano luno.

Yesu yekhuula nalilila abandu ba Yerusalemu

(Luka 13:34-35)

37“Oo, abandu ba Yerusalemu! Oo, abandu ba Yerusalemu! Inywe mwiranga abalakusi nimulasa namachina abarumwa ba Nyasaye amurumilanga. Akhandi akhanji ndikombanga okhukhung'asia abaana benywe shinga olwa ingokho inyafusi yikhung'asinjia ebiminywi biayo mumbaha tsiayo, nebutswa shimufuchililanga tawe! 38#Yer. 22:5Khulweshio Ihekalu yenywe yakhakwisibwe likunda. 39#Tsits. 118:26Khulweshio okhurula bulano emuboolela mbu, shimwakhandolekhwo khandi ta, okhuula olwa mwakhaboole muri, ‘Noweikhabi owitsa muliira lia Omwami.’ ”

Currently Selected:

MATAYO 23: OLUPR

Highlight

Copy