MATAYO 19
19
Yesu yechesia khukokhulekhana khwomusaatsa nomukhasiwe
(Mrk. 10:1-12)
1Olwa Yesu yali namalile okhuboola amakhuwa ako, yarula Galilaya natsia mungongo tsia Abayahudi injelekha womwalo kwa Yorodani. 2Emikanda emikhongo nichimuloondakhwo, naye nabahonia.
3Abafarisayo bandi nibetsa ewa yali nibamuteema khulwa okhumureeba bari, “Kali habwene omusaatsa okhulekhana nomukhasiwe khulwa eshifune shiosi shiosi eshia yenya?”
4 #
Obucha. 1:27; 5:2 Yesu nabakalusia ari, “Mushili okhusomakhwo Amahandiko akaboolanga mbu, mubuchachilo Omulonji yabalonga omusaatsa nende omukhasi ta? 5#Obucha. 2:24Ne Nyasaye naboola ari, ‘Khulweshio omusaatsa alalekhanga samwana nende nyinamwana, naliimana nomukhasiwe nabo boosi nibaba omubili mulala!’ 6Kho shibashili babili khandi ta, habula nimulala. Kho aba Nyasaye aliimasiye halala, omundu namundu alabakabukhasia tawe.” 7#Okhuk. 24:1-4; Mat. 5:31Abafarisayo nibamureeba bari, “Kho mbushiina Musa nahaana lilako mbu, omusaatsa ahandichile omukhasiwe ibarwa eyokhwinoosia akachila nibalekhana mana amuloonde?”
8Yesu nakalusia ari, “Musa yamufuchilila inywe okhulekhana nabakhasi benywe shichila muli abemioyo emitinyu. Nebutswa shikali kario okhurula mukhuchaaka khwobulongwi tawe. 9#Mat. 5:32; 1 Abakor. 7:10,11Emuboolela mbu, omundu yesi yesi oulekhana nomukhasiwe khulweshifune shiosi shiosi nishilali eshiobuheyi ta, omusaatsa oyo naba nateshia omukhasi undi, aba naheyanga.”
10Abeechibe nibamuboolela bari, “Nikakhaba mbu kali kario hakari womusaatsa nende omukhasi, nobulayi okhulekha okhuteshia.”
11Yesu nabakalusia ari, “Amechesio kano shikali akabandu boosi ta, habula aba Nyasaye anyalila bonyene. 12Biliho ebifune ebiahukhane ebichila abandu bandi nibalanyala okhuteshia ta. Balala bebulwa bario, abandi, nabandu ababakhola bario, nabo abandi shibateshinjia ta, khulwa Obwami bwa Nyasaye. Ounyala okhufuchilila amechesio kano lekha akafuchilile.”
Yesu asabila abaana abatiiti ikhabi
(Mrk. 10:13-16; Luka 18:15-17)
13Abandu bandi bareera abaana khu Yesu mbu, abarekhwo amakhono nende okhubasaayila. Abeechibe nibabakondoshela. 14Yesu nababoolela ari, “Leshe abaana abatiiti betse khwisie, ne mulabakania ta, shichila Obwami bwa Nyasaye nobwabandu shinga bano.”
15Mana nabarakhwo amakhono ne narulaho natsia.
Omusaatsa omuraaka omuyinda
(Mrk. 10:17-31; Luka 18:18-30)
16Olundi omusaatsa undi yetsa khu Yesu naboola ari, “Omwechesia, nishiina eshilayi eshiekhoyile okhukhola kho mbu enyoole obulamu bweinziayo?”
17Yesu nakalusia ari, “Mbushiina niureeba eshili eshilayi? Aliho mulala yenyene ouli omulayi. Ne noba niwenya okhwinjila mubulamu bweinziayo, olinde amalako.” 18#Okhur. 20:13; Okhuk. 5:17; Okhur. 20:14; Okhuk. 5:18; Okhur. 20:15; Okhuk. 5:19; Okhur. 20:16; Okhuk. 5:20Omusaatsa oyo namureeba ari, “Amalako shiina?”
Yesu nakalusia ari, “Shioleranga omundu ta, shiolaheyanga ta, shioleebanga ta, shiolachikhanga owashio ta. 19#Okhur. 20:12; Okhuk. 5:16; Abal. 19:18Helesinjia papawo nende mamawo oluyali; nende okhuheela owashio shinga olwa wiheela omwene.”
20Omuraaka oyo namukalusia ari, “Ndalinda amalako ako koosi; nishiina eshindi eshiekhoyile okhukhola?”
21Yesu namuboolela ari, “Noba niwenya okhuba omulunjishi, tsia okusie ebia oli ninabio biosi, mana okabile abamanani amapesa, ne olaba nelibishilo mwikulu; mana witse unondekhwo. 22Olwa omuraaka oyo yahulila ako yarulaho natsia nabeeleele, shichila yali omuyinda okhushila.”
23Mana Yesu naboolela abeechibe ari, “Emuboolela toto mbu, nobutinyu muno omuyinda okhwinjila mubwami bwa Nyasaye. 24Emuboolela khandi mbu, neliangu ingamia okhubirira munduhu yeisindani, okhushila omuyinda okhwinjila mubwami bwa Nyasaye.” 25Ne olwa abeechi bahulila amakhuwa ako, bahuka muno. Ne nibamureeba bari, “Kho niwiina ounyala okhuhonibwa?”
26Yesu nabahenga, nabakalusia ari, “Lino shilinyalikha khubandu ta, nebutswa khu Nyasaye ebindu biosi binyalikha.”
27Mana Petero nakalusia nareeba ari, “Lola ifwe khwalekha ebindu biosi nikhukhulondakhwo, khwakhanyoole shiina?”
28 #
Mat. 25:31;
Luka 22:30
Yesu nababoolela ari, “Emuboolela toto mbu, olwa Omwana womundu alikhala khushifumbishie shioluyali mushialo eshiyia nilwo olwa inywe ekhumi nababili abalondi banje, mwesi mulikhala khubifumbi bioburuchi, nimukhalachila tsimbia ekhumi natsibili etsia Isiraeli eshiina. 29Omundu yesi owalekha tsinzu noho abasiani babwe noho abakhaana babwe noho samwana nende nyinamwana, noho abaana noho emikunda khulwa isie, alinyoola ebindu akhandi eshikhumi kata okhushilakhwo. Khandi alihebwa obulamu bweinziayo. 30#Mat. 20:16; Luka 13:30Ne abanji abali imbeli baliba abokhumalilikha, ne abokhumalilikha baliba abeimbeli.”
Currently Selected:
MATAYO 19: OLUPR
Highlight
Share
Copy
Want to have your highlights saved across all your devices? Sign up or sign in
