MATAYO 14

Okhufwa khwa Yohana Omubatiisi

(Mrk. 6:14-29; Luka 9:7-9)

1Mutsinyanga etsio, Herode omuruchi wa Galilaya yahulila ifuma ya Yesu. 2Naboolela abakhalabanibe ari, “Uno niye Yohana omubatiisi, alamuushe okhurula mubafu, niko akachila ali nobunyali bwokhukhola akamakana kano.”

3 # Luka 3:19,20 Herode niye owali niyatiila Yohana, nende okhumura mumbohe khulwa amakhuwa ka Herodia, omukhasi wa Filipo, owali omusiani wabwe Herode. 4#Abal. 18:16; 20:21Kekholekha kario shichila Yohana omubatiisi yali niyaboolela Herode ari, “Shikali habwene iwe okhuteshia Herodia tawe.” 5Herode yenya okhumwiira Yohana, ne naria Abayahudi, shichila bali nibafuchilila mbu, Yohana nomulakusi.

6Ne olwa inyanga yokhwitsulila okhwibulwa khwa Herode yola, omukhaana wa Herodia yashina imbeli womukanda kwosi. Herode nasangaala muno. 7Mana namusuubisia ari, “Nditsuba mbu, ndalakhuhelesia eshindu shiosi shiosi eshiawenya!” 8Naye natsuubilwe nende nyinamwana yaboola ari, “Mbelesia bulano omurwe kwa Yohana omubatiisi khulutelu luno!”

9Omuruchi oyo yabeelela, nebutswa khulwa okhwitsubakhwe okhwa yali niyetsubile imbeli wabacheni boosi, yalaka mbu omukhaana oyo ahelesibwe eshia yali niyenyile. 10Kho naruma omundu mumbohe okhukhalaka omurwe kwa Yohana. 11Omurwe okwo kwareerwa nikuchinjilwe khulutelu nikuhebwa omukhaana oyo, naye nayilila nyinamwana. 12Abeechi ba Yohana betsa, nibabukula omubili kwa Yohana nibakuyabila, mana nibatsia nibaboolela Yesu.

Yesu aliisia abandu ebikhumila biraano.

(Mrk. 6:30-44; Luka 9:10-17; Yoh. 6:1-14)

13Ne olwa Yesu yahulilakhwo akali nikekholeshe khu Yohana, yenjila muliaro narulaho natsia mushitsiimi yenyene. Olwa abandu bahulila amakhuwa ako, barula mumataala kabwe nibachenda khubilenje nibamuloondakhwo. 14Ne olwa Yesu yarula muliaro, yalola omukanda omukhongo kwabandu, nabalolela tsimbabasi mana nahonia abalwale babwe. 15Khubwile abeechibe bamwitsila nibaboola bari, “Ebise bihwele, ne hano nimushitsiimi, seebula abandu batsie abeene bakule ebiabalia.” 16Yesu nababoolela ari, “Shibakhoyile okhutsia habundu undi ta, inywe mubahelesie ebiabalia.”

17Abeechi abo nibamukalusia bari, “Khuli butswa nemikaate chirano nende tsinyeni tsibili.” 18Nababoolela ari, “Ndeerere hano.” 19Mana nalachilisia abandu okhwikhala hasi, nabukula emikaate chirano echio nende tsinyeni tsibili etsio, nahenga mwikulu, ne nabisabila ikhabi. Nabisonyola nakabila abeechi, nabo abeechi nibakabila abemikanda abo. 20Boosi nibalia nibekura. Mana nibakhung'asia ebisonye biatong'a, ne nibitsula ebimwelo ekhumi nabibili. 21Abalia bali abasaatsa abahela ebikhumila biraano (5,000), abakhasi nende abaana nibalabalilwe tawe.

Yesu achenda khumaatsi

(Mrk. 6:45-52; Yoh. 6:15-21)

22Mana Yesu nanichilisia abeechi okhwinjila muliaro mbu bamuranjilile okhutsia injelekha weinyanza, naye nashiseebula abemikanda. 23Ne olwa yali naseebule abemikanda, yatikulukha yenyene mushikulu, natsia okhusaaya. Olwa obwile bwola, yaliyo yenyene. 24Eliaro liali niliakhoola munyanza hakari, nilirundungwa eyi nende eyi namarunda, shichila omuyeka kwali nikuhutsanga okhurula imbeli weliaro.

25Mana eshialo nibutsia okhushia, Yesu yabetsela nachendanga khumaatsi. 26Ne olwa abeechi bamulola nachendanga khumaatsi, ikholo yabarumukha nibaboola bari, “Shino neshishieno!” Ne nibayula obutinyu khulwa oburi.

27Habwenaho Yesu nababoolela ari, “Tinye omwoyo, nisie, mularia tawe.” 28Mana Petero namukalusia naboola ari, “Omwami, noba noli iwe toto, lachilisia enjende khumaatsi nindiitsa ewa oli eyo.” 29Yesu namuboolela ari, “Yitsa.” Mana Petero niyekha okhurula muliaro nachaaka okhuchenda khumaatsi natsia ewa Yesu yali. 30Nebutswa olwa yalola omuyeka omukhongo nikuhutsa, yaria mana nachaaka okhwiyinikha mumaatsi, ne nalanjilisia ari, “Omwami mbonia!” 31Lwangu Yesu nanyiila omukhono namutiila mana namuboolela ari, “Iwe owobusuubili butiiti, nishiina eshichilile nokanakania?” 32Ne olwa boosi benjila muliaro, omuyeka kwalenjela. 33Mana abeechi abali muliaro nibamwinamila Yesu, nibaboola bari, “Toto iwe oli Omwana wa Nyasaye!”

Yesu ahonia abalwale mulukongo lwa Genesareti

(Mrk. 6:53-56)

34Ne olwa bali nibambushe inyanza boola mulukongo lwa Genesareti. 35Ne olwa abandu bamanyilisia mbu ye niye Yesu, barumasia mumbali tsiosi mana abandu nibareerera Yesu abalwale boosi. 36Nibamusaaya mbu afuchilile abalwale batiilekhwo butswa khwichemo lieinguboye, ne boosi abatiilakhwo, bahonibwa.

Currently Selected:

MATAYO 14: OLUPR

Highlight

Copy