LUKA 22
22
Batuta okhwira Yesu
(Mat. 26:1-5; Mrk. 14:1-2; Yoh. 11:45-53)
1 #
Okhur. 12:1-27
Kho tsinyanga tsielisabo liomukaate okubulamwo limela, elilangwa mbu Pasaka tsiali nitsili ahambi okhuula. 2Nabo abakhulundu babesaaliisi nende abechesia bamalako bali nibatutanga shinga olwa bakheera Yesu mabiswi; shichila bali nibariire abandu.
Yuda afuchilila okhukhoba Yesu
(Mat. 26:14-16; Mrk. 14:10-11)
3Mana Setani niyenjila mu Yuda oulangwa Isikarioti, owali mulala khubechi ekhumi nababili. 4Kho Yuda narula natsia naboola nende abakhulundu babesaaliisi nende abemilisi babalindi bomuhekalu shinga olwa anyala okhukhoba Yesu khubo. 5Mana nibasaangaala muno, ne nibafuchilila okhumuhelesia amapesa. 6Naye Yuda nafuchilila akabamuboolela mana nachaaka okhukhaaba obwiyangu bwokhuhaana Yesu mumakhono kabwe, abandu nibalamanyile tawe.
Yesu yerechekha okhulia eshiokhulia shia Pasaka halala nabeechibe
(Mat. 26:17-25; Mrk. 14:12-21; Yoh. 13:21-30)
7Kho inyanga yoola eyelisabo liomukaate okubulamwo limela, olwa ebimeme biasinzungwa khulwa eshiokhulia eshia Pasaka. 8Naye Yesu naruma Petero nende Yohana nababoolela ari, “Tsie mukhurecheshele eshiokhulia eshia Pasaka khulie.”
9Nabo nibamureeba bari, “Nihena aha wenya mbu khukasilie eshiokhulia eshia Pasaka eshio?” 10Nababoolela ari, “Olwa muba nimwinjilanga mwitookho, mulakaana nende omusaatsa nachinjile isiongo yamatsi khumurwekwe. Mumulondekhwo mana mwinjile ninaye munzu mwayenjila. 11Mana muboolele omusaatsa mwenenzu muri; ‘Omwechesia areeba mbu, eshikoro eshia alalilamwo eshiokhulia shia Pasaka halala nende abeechibe shili hena?’ 12Naye alamumanyia eshikoro eshikhongo shieikulu eshikaasbwe obulayi, ne mushikoro eshio nimwo omwa mularechekha buli shindu.” 13Nibarula nibatsia nibanyoola butswa shinga olwa yali nababooleele. Mana nibarechekha eshiokhulia eshia Pasaka.
Lisabo liokhumalilikh elia Omwami
(Mat. 26:26-30; Mrk. 14:22-26; 1 Abakor. 11:23-25)
14Ne olwa isa yola, Yesu yekhala halala nabarumebe okhulia eshiokhulia. 15Mana nababoolela ari, “Ndayekombilenje muno okhulia ninenywe eshiokhulia shia Pasaka shino nishili okhusandibwa! 16Okhuba emuboolela mbu, shindakhashiliekhwo khandi ta, okhuula olwa shiliba nishikholilwe okhuba eshilamba mubwami bwa Nyasaye.”
17Mana Yesu nabukula eshikombe nishitsulemwo idivai, nakhupila Nyasaye orio, naboola ari, “Bukule mukabane inywe mwesi. 18Okhuba emuboolela mbu, okhurula luno, shindakhanywekhwo idivai khandi ta, okhuula olwa Obwami bwa Nyasaye buliitsa.”
19Mana khandi nabukula omukaate, nakhupila Nyasaye orio, nakusonyola, nabahelesia naboola ari, “Kuno nomubili kwanje, okuhaanwa khulwenywe. Kholenje murio khulwa okhunzitsulila.” 20#Yer. 31:31-34Munjila ndala eyo, nabahelesia eshikombe nishitsulemwo idivai olunyuma lwokhulia naboola ari, “Eshikombe shino neindakano ya Nyasaye imbiakha, eyaralisibwa mumabanga kanje akasundulwa khulwa inywe.
21 #
Tsits. 41:9
“Nebutswa lole! Owitsa okhukhoba ali hano khulitsanga ninaye eshiokhulia. 22Omwana womundu toto alafwa shinga olwa Nyasaye yamala yaloosia, nebutswa ali mumasila omundu oumukhoba oyo!”
23Kho nibachaaka okhureebana abeene khubeene bari, “Niwiina khwifwe oulamukhoba.”
Okhuyingana khukobukhongo
24 #
Mat. 18:1; Mrk. 9:34; Luka 9:46 Kho Abeechi nibachaaka okhuyingana abeene khubeene nibareebana mbu, niwiina khubo, omukhongo okhushila abandi boosi. 25Mana Yesu nababoolela ari, “Abaruchi abarukanga abandu bamahanga babarukanga namaani, ne abaruchi abo belanganga mbu ‘Abeetsa babandu tsana abo.’ 26#Mat. 23:11; Mrk. 9:35#Mat. 20:25-27; Mrk. 10:42-44Nebutswa shikalaba kario mwinywe tawe, habula ouli omukhongo muno mwinywe, okhuula yekhole omutuutu okhushila boosi, naye ouli omwimilisi, okhuula yekhole omukhalabani. 27#Yoh. 13:12-15Okhuba niwiina omukhongo okhushila oundi, oyo owikhala hasi okhulia eshiokhulia, noho oyo oumukhalabanila? Shiali oyo owikhala hasi okhulia? Nebutswa isie endi hakari mwinywe shinga oyo oukhalabananga.
28“Inywe ninywe ababeele ninasi mukhuteemwa khwanje khwosi; 29ne shinga olwa Papa yambelesia obunyali bwokhuruka, nolwa siesi khandi emuhelesia endio obunyali. 30#Mat. 19:28Mulalia nende okhunywa khumeesa yanje eya mubwami bwanje, khandi mulekhala khubifumbi bioburuchi khulwa okhuyaasia tsimbia ekhumi natsibili tsia Isiraeli.”
Yesu arumbula mbu Petero namwikaane
(Mat. 26:31-35; Mrk. 14:27-31; Yoh. 13:36-38)
31Yesu naboola ari, Simoni, “Simoni! Recheresia, Setani yafuchililwe okhumuteema inywe mwesi, mbu yahukhasie abalayi okhurula khubabi, shinga lwomulimi asesanga ingano narusiamwo omukhutsi. 32Nebutswa ekhusaayile iwe Simoni, mbu obusuubilibwo bulatitiha tawe. Ne lwoba nokaluushe khwisie, otinyilisie abashio.”
33Naye Petero nakalusia ari, “Omwami, ndirecheshe okhutsia ninawe mumbohe kata okhuula khukhufwa ninawe!”
34Mana Yesu namuboolela ari, “Ekhuboolela iwe Petero mbu, itaywa niyishili okhulakula eshilo shino, olaba niwakhanzikaana okhuula khataru mbu shiumanyile isie tawe.”
Yesu achetsiyia abeechibe
35 #
Mat. 10:9,10; Mrk. 6:8,9; Luka 9:3; 10:4 Mana Yesu nareeba abeechibe ari, “Olwa ndamuruma okhutsia nimulalikhwo neshibeeti kata eshisiiko noho ebilaaro ta, mwatambakhwo eshindu shiosi shiosi noho?” Nabo nibakalusia bari, “Shikhwatambakhwo eshindu shiosi shiosi tawe.” 36Kho Yesu naboola ari, “Nebutswa bulano yesi yesi ouli neshibeeti noho eshisiko okhuula ashibukule. Ne yesi oubula olukanga okhuula akusie inguboye akule olukanga. 37#Isa. 53:12Okhuba emuboolela mbu, Amahandiko akaboolanga mbu, ‘Yabalilwa halala nabakhayi,’ okhuula koosibwe, shichila akahandikwa khwisie ako bulano koosibwa.”
38Abeechi nibaboola bari, “Omwami! Lola, khuli hano netsinganga tsibili!” Naye nakalusia ari, “Kahelile!”
Yesu asaaya nali khushikulu eshia Miseituni
(Mat. 26:36-46; Mrk. 14:32-42)
39Mana narula mwitookho natsia khushikulu eshia Miseituni shinga olwa yali niyanala, nabo abeechibe nibatsia ninaye. 40Ne olwa yoola ahatsana yaho nababoolela ari, “Musaaye mbu, muleshe okhwinjila mukhuteemwa.”
41Mana nabalekha natsia hambeli hatiiti shinga aha onyala okhulasa lichina. Nasikama hasi mana nasaaya. 42Naboola ari, “Papa, noba nochama, wurusiekhwo eshikombe shiobutsunwi shino. Ne shikalaba akokhwenya khwanje ta, habula akokhwenyakhwo kahesibwe.”
[ 43Mana omumalaika okhurula mwikulu namuloleshela namutsuubanga okhuma ikholo.#22:43 Amahandiko kandi shikalimwo tsinyali tsia 43-44 tawe. 44Naye Yesu nanyakhananga ario, yameeta okhusaaya muno narula oluchesi, olwali shinga amaronyelesi kamatsaayi nikaronya hasi.]
45Ne olwa yamala okhusaaya ario, yakalukha khubeechibe, nanyoola nibali mundoolo, okhuba bali nibachoonyile khulwa eshibeela. 46Nabareeba ari, “Mbushiina nimukonanga tsindoolo? Buushe musaaye mbu muleshe okhwinjila mukhuteemwa.”
Okhutiilwa khwa Yesu
(Mat. 26:47-56; Mrk. 14:43-50; Yoh. 18:3-11)
47Ne olwa Yesu yali nashiboolanga, omukanda omukhongo kwolaho nikwimililwe nende Yuda mulala wokhubechibe ekhumi nababili. Niyetsa ahambi nende Yesu mbu amufumbeelele. 48Nebutswa Yesu yamureeba ari, “Yuda, okhoba Omwana womundu khubasukube khulwa okhumufumbeelela?”
49Ne olwa abeechi abali nende Yesu balola bario, bareeba Yesu bari, “Omwami, khubareme netsinganga tsino noho?” 50Mana mulala khubo nakhupa omukhalabani womwisaaliisi omukhongo nende okhurema eshirwishie shiomukhono musaatsa. 51Nebutswa Yesu yaboola ari, “Leshele habwenaho!” Natiila khushirwi shiomundu oyo mana namuhonia.
52Kho Yesu nareeba abesaaliisi abakhulundu nende abemilisi babalindi bomuhekalu nende abakofu abali nibetsile okhumutiila ari, “Mwitsile netsinganga nende tsindabushi shinga abetsa okhutiila omunuuli? 53#Luka 19:47; 21:37Ndabelenje muhekalu buli nyanga ne shimwayandililekhwo ta. Nebutswa shino neshise shienywe shiokhukhola murio, lwobunyali bweshilima bushirukanga.”
Petero Yekaana Yesu
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54Mana nibatiila Yesu nibamuyila munzu yomwisaaliisi omukhongo; naye Petero yali nabalondangakhwo inyuma ehalekhwo. 55Omulilo kwali nikubwanilwe mulwanyi hakari, ne Petero niyetsoka mubandu abaliho niyoora omulilo halala ninabo. 56Ne mulala khubakholi beshikhaana yamulola niyekhaale hamulilo yaho, ne namuhenjelesia obulayi mana naboola ari, “Omundu uno yesi abeele nende Yesu!”
57Nebutswa Petero yekaana naboola ari, “Iwe, isie kata shiemumanyile ta!”
58Olunyumakhwo omusaatsa undi nalola Petero namuboolela ari, “Iwe wesi oli mulala khubo!”
Nebutswa Petero nakalusia ari, “Iwe, isie tawe.”
59Ne olunyuma olwa isa ndala, omusaatsa undi naralisia amakhuwa ako naboola ari, “Toto mwene omusaatsa uno yabelenje nende Yesu, okhuba yesi khandi nomugalilaya!”
60Naye Petero nakalusia ari, “Iwe, shiemanyile akoboolanga tawe!” Ne habwene nahabwene Petero nashiboola, itaywa niyilakula. 61Mana Omwami nashiukhana, nahenga Petero. Kho Petero niyetsulila mbu, Omwami yali namuboolele ari, “Itaywa niyishili okhulakula eshilo shiolwa leelo, olaba niwunzikaanile okhuula khataru mbu shihumanyile tawe.” 62Mana Petero narula elwanyi nalila obululu.
Yesu anyokhosibwa nende okhunywekhwa
(Mat. 26:67-68; Mrk. 14:65)
63Abandu abali nibamutilile Yesu bamunyokhoosia khandi nibamunywekha. 64Bamufwimba mumoni neshitambaya nibamureeba bari, “Rumbulakhwo, oukhunyweshile niwiina?” 65Khandi nibamunyeka amanyeko kandi amanji.
Yesu ayilwa imbeli weshiina shia Abayahudi
(Mat. 26:59-66; Mrk. 14:55-64; Yoh. 18:19-24)
66Ne olwa bwashia, abakofu ba Abayahudi, abesaaliisi abakhulundu nende abeechesia bamalako bakhung'ana halala, mana Yesu nareerwa imbeli weshiina shiabwe. 67Nibamureeba bari, “Khuboolelekhwo, niwe Kristo?” Nabakalusia ari “kata nimba nimuboolela shimulasuubila tawe; 68Kata nimureeba inywe lireebo, shimulangalusia tawe. 69Ne okhurula olwa leelo Omwana womundu alekhala khumukhono musaatsa okwa Nyasaye, omunyali webindu biosi.”
70Kho boosi nibaboola bari, “Kho niwe Omwana wa Nyasaye noho?”
Yesu nabakalusia ari, “ninywe abamalile okhuboola murio.”
71Mana nibaboola bari, “Shikhukhaaba obuloli bundi khandi tawe! Ifwe abeene khuhulile omwene nakarumbula nomunwakwe.”
Currently Selected:
LUKA 22: OLUPR
Highlight
Share
Copy
Want to have your highlights saved across all your devices? Sign up or sign in
