YOHANA Okhumanyisia akalimwo
Okhumanyisia akalimwo
Injiili shinga olwa yahandikwa nende Yohana yilolesinjia Yesu shinga olwa ali ye Likhuwa lia Nyasaye lieinziayo, “Owekhola omundu namundu ne namenya mwifwe (1:14).” Shinga akahandikwa mushitabu shino kaboolanga, Injiili yino yahandikwa kho mbu, abachisooma banyalilwe okhusuubila mbu, Yesu niye Omwana wa Nyasaye, Omuhonia owasubisibwa, ne khulwa obusuubili bwabwe muye banyalilwe okhuba nobulamu (20:31).
Olunyuma lwamakhuwa matiiti akaranjilila, akamanyinjia mbu Likhuwa lia Nyasaye lieinziayo niye Yesu, eshitonye shiambeli shia Injiili yino shimanyinjia akamakana akalolesinjia mbu, Yesu niye Omuhonia owasuubisibwa okhwitsa, ouli omwana wa Nyasaye. Akalondakhwo namechesio akebaalanga eshisina shiebikhole biamakana ebio. Eshitonye shino shimanyisinjia shinga olwa abandu bandi basuubila mu Yesu mana nibekhola abalondibe, nebutswa abandi bamufukula ne nibaloba okhumusuubilila.
Emiliango chia 13-17 chibaalanga mubwitsulu obusanjilani bwahambi muno obwaliho hakari wa Yesu nende abeechibe mushilo eshia yatililwakhwo, nende amakhuwake akokhubatinyilisia nende okhubatsuuba nashili okhutiilwa nende okhubambwa khumusalaba. Emiliango chiokhumalilikha chieshitabu shino chiboolanga akokhutiilwa nende okhuyasibwakhwe, okhubambwakhwe nende okhulamukhakhwe nende okhulolekhakhwe khubeechibe namalile okhulamukha.
Amakhuwa akomukhasi owanyoolwa naheyanga (8:1-11) kareebwa mubifundikho bino [ ] shichila shikali mumahandiko kandi kakhale nende obukaluli bwambeli tawe, ne abandi baretsanga amakhuwa ako mutsinyali tsindi.
Yohana atinyisinjia muno likhuwa lieshihaanwa shiobulamu bweinziayo obunyoolekhanga okhubirira mu Kristo. Eshihaanwa eshio shichakanga bulaano khandi shiitsilanga abo abafuchililanga mbu, Yesu niye injila, obwatoto khandi obulamu. Likhongo muno mu Injiili ya Yohana, nokhwikhoonyelakhwe okhwebilolelo biamakhuwa akobulamu obuliho bulano shinga amaatsi, omukaate, obulafu, omwayi namakondike nende omutsabibu nebiamo biakwo khulwa okhwechesia akatoto akobulamu bweshiroho.
Akalimwo mubwimbichiti
Akokhuranjilila 1:1-18
Yohana omubatiisi nende Abeechi bambeli ba Yesu 1:19-51
Obukhalabani bwa Yesu mubandu 2:1–12:50
Tsinyanga tsia Yesu tsiokhumalilikha nali mwitookho lia Yerusalemu nende amatookho akarondokhaneho 13:1–19:42
Okhulamukha nende okhulolekha okhwa Kristo nalamushe 20:1-31
Akokhumalilisia; okhulolekhakhwe khandi mu Galilaya 21:1-25
Currently Selected:
YOHANA Okhumanyisia akalimwo: OLUPR
Highlight
Share
Copy
Want to have your highlights saved across all your devices? Sign up or sign in