YOHANA 12
12
Yesu abakhwa amafura Betsania
(Mat. 26:6-13; Mrk. 14:3-9)
1Nitsishili tsinyanga tsisasaba okhuula khwisabo lia Pasaka, Yesu yatsia Betsania, ewabwe Lazaro, owa yali nalamusiye okhurula mukhufwa. 2Bamukaasiliayo eshiokhulia eshiokhubwile. Maritsa niye owabakhlabanila, naye Lazaro yali mulala khubekhala nibalia halala nende Yesu. 3#Luka 7:37,38Mana Mariamu nabukula eshimuka shiamafura akeshing'ari, akobukusi obweikulu muno, akakaasibwa okhurula khumisaala chieshing'ari eshilayi, nabakha khubilenje bia Yesu, ne nabieya neliswilie. Inzu yosi niyiitsulamwo eshiuya shiamafura ako. 4Mulala khubeechi ba Yesu, oweliira mbu, Yuda Isikarioti, owali natsia okhumukhoba naboola ari, 5“Nishiina eshichila amafura keshing'ari kano nikalakusibwa tsidinari ebikhumi bitaru mana amapesa ako kakabilwe abatakha?” 6Shiyaboola ako shichila mbu, yahendela abatakha ta, nebutswa shichila mbu, yali omwifi. Yachinganga omufuuko kwamapesa mana yabukulangakhwo niyekhoonyela omwene.
7Nebutswa Yesu yaboola ari, “Leshe omukhasi uno abe! Leshe akabiishe khulwa inyanga eyokhuyabilwa khwanje. 8#Okhuk. 15:11Okhuba muli nabatakha buli lwosi, nebutswa isie shindalabetsanga ninenywe buli lwosi tawe.”
Batuta okhwira Lazaro
9Ne lwomukanda omukhongo kwa Abayahudi kwahulila mbu, Yesu ali Betsania, nibetsayo okhulola Yesu khandi nende okhulola Lazaro, owa Yesu yali nalamusiye okhurula mukhufwa. 10Mana abesaaliisi abakhulundu nibarechekha shinga olwa banyala okhwira Lazaro yesi. 11Ne khulwa akali nikekholeeshe khuye, Abayahudi abanji, beyahula okhurula mubayahudi bashiabwe ne nibetsa nibasuubila mu Yesu.
Yesu yenjila mu Yerusalemu nomwikhoyo
(Mat. 21:1-11; Mrk. 11:1-11; Luka 19:28-40)
12Inyanga yalondakhwo, omukanda omukhongo, okwali nikwitsile mwisabo lia Pasaka kwahulila mbu, Yesu yali niyetsanga Yerusalemu. 13#Tsits. 118:25,26; 1 Mak. 13:51Kho nibanoka amasaka kemishindu ne nibatsia okhumwakanila, nibayiba nibaboola bari, “Hosana! Noweikhabi owitsa muliira elia Omwami! Nyasaye amulaamile tsikhabi muliira elia Omwami! Nyasaye alaamile omuruchi wa Isiraeli tsikhabi!”
14Yesu yanyoola eshimoosi eshia Isishili, ne niyekhalakhwo shinga olwa Amahandiko kaboolanga kari,
15 #
Zak. 9:9
“Shiolaria ta, iwe litookho lia Zayuni,
omuruchiwo ngwoyo yetsanga,
naniinile khushimoosi eshia Isishili.”
16Mukhuchaaka, abeechibe shibamanyilisia eshisina shiamakhuwa ako tawe. Nebutswa olwa Yesu yali nalamusiibwe muluyali lwa Nyasaye, betsulila mbu, Amahandiko kaboola kario, mbu, ako kalikhola kario khuye khandi mbu, bali nibamukholeele akatsana ako.
17Abandu bali nibabeele nende Yesu, olwa yalanga Lazaro okhurula mung'ani namulamusia okhurula mukhufwa, bali nibakholile obuloli khu akali nikekholeeshe khu Lazaro. 18Ne eshifune shiachila omukanda omukhongo nikwitsa okhwakaanila Yesu shiali mbu, bali nibahuliile mbu, akholile eshilolelo shiakamakana eshio. 19Abafarisayo nabo nibaboola abeene khubeene bari, “Shinga olwa mulola, shikhunyala okhukhola eshindu shiosi shiosi tawe. Lole, abandu boosi barulile bamulondangakhwo!”
Abagiriki bandi bakhaaba okhulola Yesu
20Abagiriki bandi bosi bali balala khu abali nibatsiile Yerusalemu, okhwinamila Nyasaye khunyanga yelisabo lia Pasaka. 21Kho nibatsia khu Filipo, omwechi warulanga Betsisaida mu Galilaya ne nibamuboolela bari, “Omwami, khwenya okhulola Yesu.”
22Naye Filipo natsia naboolela Andereya, mana boosi babili nibatsia nibaboolela Yesu. 23Yesu nabakalusia naboola ari, “Bulano eshise eshia Omwana womundu anyoolelamwo oluyali olukhongo shiakhoola. 24Emuboolela toto mbu, imwo yeingano niyilakwa mwiloba yafwa ta, yibetsanga butswa yirio yonyene. Ne niyiba niyifwa, yamanga ingano inyinji. 25#Mat. 10:39; 16:25; Mrk. 8:35; Luka 9:24; 17:33Omundu yesi yesi ouheela obulamubwe omwene alabukosia, naye ousila obulamubwe omwene mushialo muno alaba ninabwo okhuula khubulamu bweinziayo. 26Ne yesi yesi owenya okhuukhalabanila isie, okhuula yanondekhwo, ne ewa emba nendi, yesi khandi alabetsangaho. Naye Papa wanje alakoosia yesi yesi ouba niyakhalabanila.”
Yesu aboola khukokhufwakhwe
27“Bulano omwoyo kwanje kunyakhananga. Kho nekhakhole shiina? Emboola endi, ‘Papa, olafuchilila ebise biokhuteemwa khwanje biola ta,’ noho? Nebutswa ako, niko akachila nenzitsa, kho mbu, enyalilwe okhubirira mukhunyakhana khwebise bino khuno. 28Papa, omwene wihelesie oluyali!”
Mana ebise ebio, omwoyo nikuhulilikha okhurula mwikulu nikuboola kuri, “Ndamala okhumuhelesia oluyali, khandi ndalameeta okhumuhelesia oluyali.”
29Omukanda kwabandu okwali nikusinjiileho kwahulila omwoyo okwo, ne abandi khubo nibaboola mbu, nokhukukuma khwelikulu, nabo abandi nibaboola bari, “Omumalaika niye ouboolile ninaye.”
30Mana Yesu nababoolela ari, “Omwoyo okwo shikuhuliliishe khulwa isie tawe, habula khulwa inywe.”
31“Eshise shino nishio eshieshialo okhukhalachilwakhwo eshiina, bulano omuruchi weshialo shino alaahulwa narusibwa khuburuchi. 32Ne olwa emba nerusibwa khushialo nenjinguulwa ikulu khumusalaba, ndalareera abandu boosi khwisie.” 33Yaboola ako khulwokhumanyia shinga lwokhufwakhwe khwitsa okhuba.
34 #
Tsits. 110:4; Isa. 9:7; Ezek. 37:25; Dan. 7:14 Nabo abomukanda abo nibamukalusia nibaboola bari, “Amalako kefwe kaboolanga mbu, Kristo alimenyaho inziayo. Kho nawe wakhaboola orie mbu, okhuula Omwana womundu achinguulwe ikulu? Omwana womundu tsana niwiina?”
35Yesu nabakalusia naboola ari, “Obulafu bulaba mwinywe khulweshise shituutu butswa. Mutsiililile muluchendo lwenywe olwa mushilikhwo nobulafu, eshiilima shiakhetsukhana shiamunyoola, shichila ouchenda mushiilima shiamanyanga ewatsia tawe. 36Olwa mushilikhwo nobulafu obwo musuubilile mubwo kho mbu, mube abandu bobulafu.” Olwa Yesu yamala okhuboola amakhuwa ako, yabebisakhwo ne narulaho natsia.
Abayahudi baloba okhusuubila mu Yesu
37Kata olwa yali nakholile akamakana ako koosi nibalola, shibamusuubililamwo ta, 38#Isa. 53:1Kekholekha kario kho mbu, akomulakusi Isaya yarumbula koosibwe, olwa yaboola mbu,
“Omwami, owasuubila
oburume bwefwe niwiina?
Ne niwiina owa Omwami yafwimbulila obunyalibwe?”
39Khulweshio shibanyalilwa okhusuubila ta, okhuba Isaya khandi yaboola ari;
40 #
Isa. 6:10
“Nyasaye yabofusia tsimoni tsiabwe,
khandi natinyia amapaaro kabwe
kho mbu tsimoni tsiabwe tsileshe okhulola,
khandi amapaaro kabwe kaleshe okhumanyilisia.
Nyasaye omwene aboola mbu; ‘Ndakhola kano kho mbu bangalushile mana embahonie’ ”
41Isaya yaboola kano shichila yalola oluyali lwa Yesu mana naboola khuye.
42Kata kario, abemilisi abanji aba bayahudi basuubila mu Yesu; nebutswa khulwa okhuria Abafarisayo shibali abanyala okhukaboolakhwo habulafu ta, shichila bakhalondilwe okhurula musinagogi. 43Bekhoyanga okhufuchililwa nabandu okhushila okhufuchililwa nende Nyasaye.
Amakhuwa aka Yesu kalikhalachila abandu eshiina
44Yesu nalanjilisia nomwoyo omukhongo naboola ari, “Omundu yesi ousuubila mwisie, asuubilanga khandi mu oyo owaruma isie. 45Naye yesi oundola isie, alolanga khandi oyo owaruma. 46Isie ndetsa mbu embe obulafu mushialo, kho mbu yesi ousuubila mwisie aleshe okhutsiililila okhuba mushiilima. 47Omundu yesi yesi ouhulila amakhuwa kanje, ne naloba okhukaloonda, isie shimukhalachila eshiina tawe. Okhuba shindayetsa okhukhalachila eshialo eshiina ta, habula okhushihonia. 48Omundu yesi oundoba isie nende amakhuwa kanje, owokhumukhalachila eshiina aliho. Amakhuwa kene aka emuboolele niko akaliba omukhalachi weshiina khunyanga eyobumalilishi. 49Okhuba shimboolanga khulwa obunyali bwanje mwene ta, habula Papa owaruma isie niye owandachilisia aka emboola nende shinga olwa emboola. 50Nasi emanyile mbu, lilakolie lireeranga obulamu obulahwaho ta. Khulweshio, emboolanga aka Papa yandachilisia okhuboola.”
Currently Selected:
YOHANA 12: OLUPR
Highlight
Share
Copy
Want to have your highlights saved across all your devices? Sign up or sign in
