YOHANA 10
10
Oluchelo lwomwayi omulayi
1Yesu naboola ari, “Emuboolela toto mbu, omundu oulenjilila mushilibwa shieikhoonje yamakondi ta, ne naniina niyenjilila haundi, nomwifi khandi omunuuli. 2Nebutswa omundu owinjila nabirira mushilibwa, niye omwayi wamakondi. 3Omulindi weshilibwa, amwikulila eshilibwa niyenjila, nako amakondi kahulila omwoyokwe olwa akalanga ameera, nakayila okhwaya. 4Ne olwa aba nakarusiiye koosi elwanyi, akemililanga, nako kamulondakhwo, okhuba kamanya omwoyokwe. 5Shikanyala okhulonda butswa khumundu oundi omucheni tawe. Kalamwilukha, okhuba shikamanyile omwoyokwe tawe.”
6Yesu yababoolela oluchelo olwo, nebutswa shibamanyilisia eshisina shiamakhuwa ako tawe.
Yesu niye omwayi omulayi
7Mana Yesu nababoolela khandi ari, “Emuboolela toto mbu, isie nisie eshilibwa shiamakondi. 8Ne abandi boosi abaaranjilila isie bali abefi khandi abanuuli, ne amakondi shikabahulila tawe. 9Isie nisie eshilibwa shiamakondi. Omundu yesi yesi owitsa nabirira khwisie, alahonibwa, alenjila khandi alarula, khandi alanyoola obwayilo. 10Omwifi yetsanga khulwa okhwiba, okhwira nende okhusasia khwonyene. Isie ndetsa mbu, munyoole obulamu, khandi mube ninabwo mubwitsulu.
11 #
Sira 18:13
“Isie nisie omwayi omulayi. Omwayi omulayi ahaananga obulamubwe khulwa amakondike. 12Nebutswa omwayi womurungo, oulali mwene amakondi ta, olwa alola lifunyisi niliitsanga yelukhanga nalekha amakondi, mana lifunyisi elo likakwakhwo nende okhukasalaasia. 13Omwayi womurungo oyo yelukhanga shichila nomwayi womurungo, ne khandi shiahendelanga amakondi tawe. 14#Mat. 11:27; Luka 10:22Isie nisie omwayi omulayi. Ndamanya amakondi kanje, nako kamanya isie, 15shinga olwa Papa yamanya isie, ne nasi nimumanya Papa, nolwa amakondi kanje koosi kamanya isie, kho ndalahana obulamu bwanje khulwa amakondi ako. 16Ne kaliho amakondi kandi, akali akanje nebutswa shikali mukhoonje muno tawe. Okhuula ekakhung'asie koosi. Khandi koosi kalahulila omwoyo kwanje, ne kalaba lituuli elala elili nomwayi mulala yenyene.
17“Papa yaaheela isie, shichila ndafuchilila okhuhaana obulamu bwanje buno mbu, ebunyoole khandi. 18Abulaho omundu ounyala okhuurusiakhwo obulamu bwanje tawe. Ebuhaana mukhwenya khwanje omwene. Endi nobunyali bwokhubuhaana, khandi endi nobunyali bwokhububukula. Kano niko aka Papa wanje yandachilisia okhukhola.”
19Mana obwahukhani nibubaho khandi mu Abahudi, khulwa amakhuwa ka Yesu yali naboolile ako. 20Abanji khubo baboola bari, “Ali neshishieno khandi nomulalu! Eshichila nimurecheresia akaboolanga nishina?”
21Nebutswa abandi khubo baboola bari, “Omundu ouli neshishieno shiyakhaboola ario ta! Eshishieno shinyala shirie okhukhola abandu ababofu okhulola?”
Abayahudi baloba Yesu
22 #
1 Mak. 4:36,52-59; 2 Mak. 1:18; 10:5 Mana lisabo liokhwitsulila okhwahulwa khwehekalu ya Yerusalemu okhuba indakatifu nilibaho mutsinyanga tsiomunyiri. 23Naye Yesu yali nachendanga muhekalu, mushisika shia Solomoni. 24Abayahudi nibakhung'ana aha yali, nibamureeba bari, “Olatsiililila okhukhulekha nikhukanakaninjia okhuula liina? Khuboolele habulafu, niwe Kristo watsana noho?”
25Yesu nabakalusia naboola ari, “Ndamala okhumuboolela, nebutswa shimusuubilanga tawe. Akekholanga khulwa obunyali bwa Papa wanje nakobuloli khwisie. 26Nebutswa inywe shimusuubilanga ta, okhuba shimuli amakondi kanje tawe. 27Amakondi kanje karecheresinjia omwoyo kwanje, nasi ekamanyile, nako kanondangakhwo. 28Ekahelesinjia obulamu bweinziayo, ne shikalifwa tawe. Shialiho kata mulala ounyala okhuunuula yatsia ninako tawe. 29#Obuch. 3:1Papa wanje, owambelesia amakondi ako koosi nomukhongo okhushila boosi. Ne shialiho kata mulala ounyala okhukabukula okhurula mubulindi bwa Papa wanje tawe. 30Papa ninasi, khuli eshindu shilala.”
31Abayahudi nibukula amachina mbu, bamulase. 32Yesu nababoolela ari, “Ndakholile ebikhole ebilayi ebinji okhurula khu Papa. Kho neshileena khubio eshichila nimwenya okhundasa namachina?”
33 #
Abal. 24:16
Nibakalusia nbamuboolela bari, “Shikhwenyanga okhukhulasa khulwa ebikhole ebilayi ta, habula khulwa okhunyeka Nyasaye! Iwe oli butswa omundu namundu, ne bulano oteemanga okhwikhola mbu, oli Nyasaye!”
34 #
Tsits. 82:6
Yesu nabakalusia naboola ari, “Shikahandikwa mumalako kenywe mbu, Nyasaye yaboola ari, ‘Inywe muli abanyasaye.’ 35Ne khumanyile mbu, aka Amahandiko kaboolanga nakatoto ebisoni nebisoni. Ne Nyasaye yalanga abandu abo mbu, abanyasaye, abandu abaheebwa oburumebwe. 36Nasi, Papa yanzahula mana niyaruma mushialo. Kho nenywe mwakhaboola murie mbu, isie enyekanga Nyasaye shichila mbu, emboolile mbu, endi Omwana wa Nyasaye? 37Nemba nindalakholanga aka Papa wanje yenyanga ta, kho shimulasuubila isie ta. 38Nebutswa nemba nekakholanga, nenywe nimulasuubila isie ta, mukhoya okhusuubila akekholanga, kho mbu mumanyile elala mbu, Papa ali mwisie nasi endi mu Papa.”
39Mana khandi nibateema okhutiila Yesu, nebutswa yarula mumakhono kabwe niyelukha.
40 #
Yoh. 1:28
Yesu yamala akalushe injelekha womwalo kwa Yorodani, aha Yohana yali nabatiisiliyenje abandu, ne namenyayo. 41Abandu abanji betsa khuye nibaboola bari, “Yohana shiyakhola ebikhole biamakana tawe, nebutswa aka yaboola khumundu uno koosi kali habwene.” 42Mana abandu abanji ebweneyo nibasuubila muye.
Currently Selected:
YOHANA 10: OLUPR
Highlight
Share
Copy
Want to have your highlights saved across all your devices? Sign up or sign in
