EBIKHOLE BIA ABARUME 12
12
Abakristo batsiililila okhusandibwa
1Munyanga etsio omuruchi Herode#12:1 Herode: Uno niye omuruchi Herode Aguripa 1 owaruka Palesitina yosi. yachaaka okhusandia balala khubasanji beikanisa. 2Yeera Yakobo, omusiani wabwe Yohana nolukanga. 3Olwa yalola mbu kano kachamisiye Abayahudi, yatsililila natiila Petero, (kano kekholekha mubise bielisabo liomukaate kubulamwo limela.) 4#Okhur. 12:1-27Olunyuma lwokhutiilwa, Petero yareebwa mumbohe mbu alindwe netsing'anda tsine tsiabelihe. Herode yenya mbu amuyaasie imbeli wabandu lisabo elia Pasaka nilihwele. 5Kho Petero nabiikhwa mumbohe, nebutswa abasanji beikanisa bamusaayilanga muno khu Nyasaye.
Petero alekhuulwa okhurula mumbohe
6Eshilo shiene eshio, olwa Herode yali niyenyanga mbu nibushiele areere Petero imbeli wabandu, Petero yali nakonile hakari wabelihe babili. Yali naboyilwe neminyololo chibili, nabo abokhulinda eshilibwa shieimbohe bali nibashilindile. 7Habwene nahabwene omumalaika owa Omwami nalolekhaho, ne obulafu nibwakha mushikoro eshio. Omumalaika oyo natukuya Petero khwibeka, namubuusia naboola ari, “Buukha lwangu!” Habwene nahabwene eminyololo nichikwa hasi okhurula khumakhono ka Petero. 8Mana omumalaika oyo namuboolela ari, “Fwala tsingubotsio nende ebilarobio.” Naye Petero nakhola ario. Khandi omumalaika oyo namuboolela ari, “Bukula inguboyo ifubila mana unondekhwo.” 9Mana Petero narulamwo namulondakhwo. Petero shiyamanyilisia mbu akomumalaika oyo yali nakholanga kali akatieli ta, habula yapaara mbu, alolanga lilolelo. 10Olwa bali nibabirire khung'anda yabelihe yambeli nende eyakhabili, boola khushilibwa shiebichuma eshinjilanga mwitookho. Eshilibwa eshio shibekushila eshiene, ne nibarula elwanyi. Bakholomokha khumuhanda, ne habwene nahabwene omumalaika oyo nalekha Petero.
11Kho Petero namanyilisia eshiali nishikholeeshe khuye ne naboola ari, “Bulano ndakhamanya mbu nakatieli! Omwami arumile omumalaikawe okhumbonia okhurula mubunyali bwa Herode nende mukoosi aka Abayahudi benyilenje okhukhola.”
12Niyakhamanyilisia ario, yatsia ingo owa Mariamu, nyinamwana Yohana owalangwa khandi mbu Mariko. Abandu abanji bali nibakhung'anileho nibasaayanga. 13Petero nakhong'onda khumuliango kwelwanyi, ne omukholi weshikhana oulangwa mbu Roda, niyetsa okhumwikulila omuliango. 14Yamanyilisia omwoyo kwa Petero nasaangaala okhushila. Mana nakalukha munzu tsimbilo nashili kata okhwikula omuliango tsana, ne nababoolela mbu, Petero yali nasinjiile elwanyi khumuliango. 15Nabo nibamuboolela bari, “Iwe olalushe!” Nebutswa yameeta okhubaboolela mbu nakatoto. Kho nibamukalusia mbu “Oyo nomumalaikawe.”
16Petero natsiililila okhukhong'onda khumuliango. Ne olwa bekula nibamulola bahuka muno. 17Nabasimila omukhono mbu baholeele, mana nabenoosia shinga olwa Omwami amurusiye mumbohe. Nababoolela ari, “Boolele Yakobo nende abasuubili bandi amakhuwa kano.” Mana nabarulakhwo natsia habundu undi.
18Olwa bwashia, indenga yaliho yikhongo mubalindi, nibachenya khushiali nishikholeeshe khu Petero. 19Mana Herode nalaka mbu, Petero akhabwe, nebutswa shibanyalilwa okhumunyoola tawe. Ne nalachilisia mbu, abalindi abo banoonelesibwe khandi nalaka mbu beerwe.
Olunyuma lwako, Herode yarula Yudea, ne natsia okhumenya Kaisaria.
Okhufwa khwa Herode
20 #
2 Mak. 9:5-28
Ne Herode yali niyatilila abandu ba Tiro nende aba Sidoni liruma. Nebutswa bekhung'asia mumukanda mulala nibatsia okhumulola. Baranjilila okhuhulilisania nende Blasito owali omusinjilili weinzu yomuruchi mbu, abakhoonye. Mana nibatsia khu Herode okhukaasia omulembe, shichila eshialo shiabwe shianyoolanga eshiokhulia okhurula mushialo shiomuruchi.
21Khunyanga inzahule Herode yefwala tsingubotsie tsioburuchi, mana niyekhala khushifumbishie shioburuchi, naboolela abandu amakhuwa. 22Abandu nibayibuukha bari, “Uno shiali omundu ouboolanga ta, habula nomunyasaye!” 23Habwene nahabwene omumalaika owa Omwami nakwisia Herode hasi, shichila shiyahelesia Nyasaye oluyali tawe. Omubilikwe nikuliibwa netsinyende, ne nafwa.
24Nebutswa likhuwa lia Nyasaye liameeta okhutswana nende okhulaanda. 25Baranaba nende Saulo nibamalile obukhalabani bwabwe bachelela okhurula Yerusalemu nibali nende owalangwa khandi mbu, Mariko.
Currently Selected:
EBIKHOLE BIA ABARUME 12: OLUPR
Highlight
Share
Copy
Want to have your highlights saved across all your devices? Sign up or sign in
