Mat. 20

Lukano lwe bakholi be mwiruuti lie kimisabibu

1“Bubwami bwe mwikulu buli nga omwene enju owauuna makhelebeende khuboolana ne babaandu khumukholela kumulimo mwiruuti lie kimisabibu. 2Enyuma we khufukiilisiana ne bakholi bene abo chirupia che kumuruungo kwe ndaalo, aabayila mwiruuti liewe.

3“Lundi oli acha khu soko embi mu saa eya khataru aabona babaandi bemilekho busa, 4nabo aababoolela ali, ‘Enywe mweesi khemuche mwiruuti, ne ndamuruunga siosi siosi sisiolaana.’ 5Khwako bacha. Nio lundi khu saa eye mwiangilwe nende eya tisa, akhola ario. 6Embi khu saa eye khumi na ndala acha lundi mala anyoola babaandi bemile, mala aabareeba ali, ‘Siina sikila enywe ne mwimile busa endaalo yoosi?’ 7Bamukobosia bali, ‘Sikila se aliio yesi yesi okhulangiile kumulimo tawe.’ Aababoolela ali, ‘Nono, ne kali kario, khemuche mukhole mwiruuti liase.’ ”

8 # Bal. 19.13; Likh. 24.15 “Oli ekolooba omwene liruuti aaboolela omwimeelesi ali, ‘Laanga bakholi obaruunge khurakikhira khwaabo bamaliilikhe, khukhwola khu banyoilemo.’ 9Nga babalaangwa khukhola kumulimo embi esaa eye khumi na ndala becha, buli mulala khu nibo anyoola kumuruungo kwe ndaalo ndala. 10Oli be bweeni becha bebaasia bali wakana balanyoola chingali khukhilakho, ne kakhali buli mulala khu nibo boosi anyoola kumuruungo kwe ndaalo ndala. 11Nga bakunyoola bakaamba ne khukhweng'ulung'unyila omwene liruuti, 12baloma bali, ‘Bamaliilisi bano bakholile esaa ndala yong'ene, mala ewe walekhasiisie kumuruungo kwabwe ne kukwefwe, efwe khukhwekhaliilikhe kumuumu kumurafu khukhola kimilimo kie ndaalo.’ 13Naye aakobosia mulala khu nibo ali, ‘Omusaale, ese se ndikho khukholelakho kamakhiikha kosi kosi tawe, se khufukiilisiane nawe kumuruungo kwe ndaalo ndala? 14Nono bukula bibiowo oche, ndoboore khuelesia omumaliilisi yuno nga khuelesie ewe. 15Se ndi ne bulekhuule khurumikhira bibiase nga nenya tawe ku? Namwe okhendekha sikila buaani bwase bukali?’ ”

16 # Mat. 19.30; Mk. 10.31; Lk. 13.30 Nio Yesu atabusia ali, “Khwako bamaliilisi baliba be khunyoa ne be khunyoa balimaliilikha.”

Yesu alomaloma lukhola khataru khuloondekhana ne lifwa liewe

(Mk. 10.32-34; Lk. 18.31-34)

17Nga Yesu ne aba nacha Yerusalemu, alaanga babeeka bewe ekhumi na babili alubeka mala alomaloma nabo nga yaba ne balikho bakeenda. 18Ababoolela ali, “Rekeeresia, khulikho khucha khwoole Yerusalemu; niio Omwana wo Mundu alareebwa mu makhono ke basaayi bakhulu ne babekisia be Lilaka, balamukhalakila lifwa, 19mala bamwakaanisie khu Be Chikholo achekhwe ne khu khupwa biboko ne khukhwirwa khu musalaba ne kakhali enyuma we chindaalo chitaru akhalamukhe.”

Lisaba lia maawe owa Yoana ne Yakobo

(Mk. 10.35-45)

20Nio mukha Sebetayo echa ne babaana bewe khu Yesu, asikama ebweeni wewe asaba Yesu amukholele sisiindu.

21Yesu amureeba ali, “Wenya siina?” Aamukobosia ali, “Ndakiilisie oli babaana base babili bano balikhala mulala kumukhono kwowo kumuseecha ne okundi kumukhasi mu Bwami bwowo.”

22Ne kakhali Yesu amukobosia ali, “Se mwamanyile nisio mulikho musaba tawe. Enywe munyala khunywa sikoombe sie buchuuni nisio ese ndi siimbi khunywa?” Bakobosia bali, “Yee, khunyala.”

23Yesu abakobosia ali, “Ng'ali mulanywa sikoombe siase, ne kakhali se kali kakaase khufukiilila mwikhale amukhono kwase kumuseecha namwe kumukhasi tawe, ne kakhali abuundu ao ali e babaandu nibo Paapa wase arekekhera.”

24Ne nga babaandi likhumi abo ne baulila, babonela babili abo bubi. 25#Lk. 22.25-26 Ne kakhali Yesu aabalaanga boosi alala becha niio ali mala ababoolela ali, “Mumanyile muli baruki Be Chikholo bekesianga kamaani khu nibo bamiia, lundi babemeelesi bali ne bunyali khu nibo. 26#Mat. 23.11; Mk. 9.35; Lk. 22.26 Se kali kario khwinywe tawe. Mulala khwinywe aaba ne enya khuba omukali, khukhwola abe omukholi we babaandi; 27ne yesi yesi owenya khuba owe bweeni khwinywe akhoya anyoe abe nasioobi wenywe, 28bulayi bwene nga Omwana wo Mundu akheecha khukholelwa tawe, ne kakhali khukhalabanila babaandi ne khuaana bulamu bwewe khulwe khuonia bakali.”

Yesu aonia babofu babili

(Mk. 10.46-52; Lk. 18.35-43)

29Nga Yesu ne babeeka bewe baba ne bama mu Yeriko, babaandu bakali babaloondakho. 30Babofu babili ba baaba ne bekhaale khundulo khwe ngila nga baulila bali Yesu alikho abira, bayokela bali, “Mwana owa Daudi khukholele siisa!”

31Babaandu babarafwira, ne khu baboolela basile; ne kakhali batasa khuyokela ne baloma bali, “Omwami, Mwana owa Daudi khukholele siisa!”

32Nio Yesu eema, mala aabalaanga, ne khubareeba ali, “Enywe mwenya mukholele siina?”

33Bamukobosia bali, “Omwami khola chimoni chefwe chibone!”

34Yesu aabakholela siisa aatiila khu moni chabwe mala abwene ne abwene babona mala bamuloondakho.

Currently Selected:

Mat. 20: LUBUKUSU

Highlight

Copy