Mat. 16

Lilienya lie khubona kamayia

(Mk. 8.11-13; Lk. 12.54-56)

1 # Mat. 12.38; Lk. 11.16 Mala Bafarisayo ne Basatukayo bacha khu Yesu ne khumukhaka, bamusaba abekesie kamayia kakaama mwikulu. 2Yesu aabakobosia ali, “Biise bie ekolooba, muloma muli, ‘Enje yalengaalile; sikila likulu liabeseeme.’ 3Ne oli kumutikhinyi muli, ‘Luno efula eye embembeesi elakwa, sikila likulu liabeseeme, lundi liriisia.’ Mwamanyilisia niko efwaani eye likulu yekesia, ne se mumanyile kamayia ke siise sino tawe!#16.3 Chibibilia ndala se chili ne kamakhuwa ka Yesu kali mu lunyilili 2-3 tawe. 4#Mat. 12.39; Lk. 11.29 Eselukho emayaanu, ekharia Wele, yenya kamayia. Ne kamayia se kalikhoo ne kakhali ka Yona tawe.” Khwako abalekha acha.

Kamamela ke Bafarisayo ne Basatukayo

(Mk. 8.14-21)

5Babeeka nga boola engelekha baba bebiliile khusuta kimikaati. 6#Lk. 12.1 Yesu ababoolela ali, “Mulole bulayi lundi mumanye khukhweliinda khukhwama khu limela lie Bafarisayo ne Basatukayo.”

7Nio baloma bali, “Aloma kano sikila se khusutilekho kumukaati kwosi kwosi tawe.”

8Ne kakhali Yesu amanya niko balikho, abareeba ali, “Enywe baandu be lisuubila litiiti, siina sikila ne mulomaloma muli se mulikho ne kumukaati tawe? 9#Mat. 14.17-21 Mukhamanyanga tawe? Se mukhebulila kimikaati kiraano nikio namesulemo kialiisia babaandu chielefu chiraano tawe? Ne mwabuusiisie bimesu bikono biinga? 10#Mat. 15.34-38 Ne kimikaati saba khu baandu chielefu chine nakio? Ne mwabuusiisie bimesu bikono biinga? 11Kanyalikha kariena enywe khukhilwa khumanya muli se nalomanga ke kumukaati tawe? Yeliinda khukhwama khu mamela ke Bafarisayo ne Basatukayo.”

12Nio bamanya bali se ababoolela khukhwiyaya khukhwama khu mamela ke kumukaati tawe, ne kakhali khukhwama khu mekisio ke Bafarisayo ne Basatukayo.

Petero arumbura Yesu khuba Kristo

(Mk. 8.27-30; Lk. 9.18-21)

13Yesu oola mu sibala sia Kaesarea-filipi aareeba babeeka bewe ali, “Babaandu baloma bali Omwana wo Mundu ali naanu?”

14 # Mat. 14.1-2; Mk. 6.14-15; Lk. 9.7-8 Bakobosia bali, “Balala baloma bali ali Yoana Omubatiisi, babaandi bali Elicha, ne babaandi bali Yeremia namwe mulalakho khu bang'oosi.”

15Aabareeba ali, “Ne enywe muloma muli ese ndi naanu?” 16#Yn. 6.68-69 Simoni Petero aakobosia ali, “Ewe niwe Kristo, Omwana owa Wele omenyile mindali.” 17Yesu aamukobosia ali, “Oli ne khabi ewe, Simoni okhwa Yona! Sikila omundu se akhubuuliile kano tawe, nakhali Paapa wase oli mwikulu. 18Khwako Petero ese khuboolela, ewe oli lulwanda, khu lwanda luno ndiombakhakho e kanisa yase, mala bunyali bwe lifwa se buli kiula tawe. 19#Mat. 18.18; Yn. 20.23 Ndikhuelesia chifunguo che bubwami bwe mwikulu, ne siosi siosi nisio okaania khu sibala sikanisibwa mwikulu, lundi siosi siosi nisio ofukiilila khu sibala sifukiililwa mwikulu.”

20Nio Yesu akaania babeeka lukali ali bakhaboolela omundu yesi yesi bali ali Kristo tawe.

Yesu alomaloma khu khupisibwa siibi ne lifwa liewe

(Mk. 8.31—9.1; Lk. 9.22-27)

21Khukhwamila siise sienesio Yesu aarakikha khuboolela babeeka bewe abuwaanga ali, “Khukhwola ese nje e Yerusalemu mala khupwe siibi lukali khukhwama khu bemeelesi, basaayi bakhulu ne babekisia be Lilaka. Kheerwe, ne kakhali enyuma we chindaalo chitaru khalamukhe.” 22Nio Petero amulaanga alubeka arakikha khumurafwira, naloma ali, “Omwami, Wele akhiingilile kano! Kano se kalikholekhakho khwiwe tawe!”

23Ne Yesu ayuukha mala aboolela Petero ali, “Sietani, kobola enyuma wase! Sikila kamebaasio kowo kano se kaama khu Wele tawe kaama khu mundu busa.”

24 # Mat. 10.38; Lk. 14.27 Nio Yesu aboolela babeeka bewe ali, “Yaaba bali omundu yesi yesi enya anoonde lekha ekaane omwene mala etiuukhe kumusalaba kwewe anondekho. 25#Mat. 10.39; Lk. 17.33; Yn. 12.25 Lundi yesi yesi owenya khuonia bulamu bwewe alibutibia, ne yesi yesi otibia bulamu bwewe sikila ese alibunyoola. 26Omundu anyoola bukhala siina, aaba bali anyoola sibala sioosi mala atibie bulamu bwewe? Se anyoolamo siindu tawe! Se siliio nisio anyala aana khunyoola bulamu bwewe lundi tawe. 27#Mat. 25.31; Chiny. 62.12; Bar. 2.6 Omwana wo Mundu akheeche ne malaika bewe mu luyali lwa Raraawe, mala aruunge buli mundu khuloondekhana ne bikholwa biewe. 28Ng'ali ese muboolela enywe ndi, bali ano balala se bakhachanjamekho lifwa ne bakhaabona Omwana wo Mundu ne echa mu Bwami bwewe tawe.”

Currently Selected:

Mat. 16: LUBUKUSU

Highlight

Copy