Bikh. 12

Sinyaasio sisiindii

1Mu siise sienesio, Omwami Herodi arakikha khunyaasia balala khu beeka be kanisa. 2Era Yakobo wandaaye owa Yoana ne embalu. 3Nga ne abona ali liasiimisie Bayaudi, achiililila ario mala aamba ne Petero yesi. (Kano kakholekha mu siise sia naikara eye kimikaati kikhalimo limela tawe.) 4#Khur. 12.1-27 Petero namalile khuaambwa areebwa mu siboe, baamurakho banamae bipupu bine. Buli silala siaba ne banamae bane khu muliinda. Herodi arekekha khumureera mu lisitakwa ebweeni we babaandu Epasaka ne wele. 5Nio Petero aarama mu siboe, ne kakhali e kanisa yachiililila khusaba Wele ne kumwoyo kwoosi.

Petero alekhuulwa khukhwama mu siboe

6Mu silo, nio busie Herodi areere Petero ebweeni we babaandu, Petero aaba akonile akari we banamae babili. Yaba bamuboyile kiminyololo kibili, lundi banamae baaba esilibwa we siboe baliindiilile. 7Ao ne nao, malaika owo Mwami emao, mala buwaanga bwakhosia mu siboe omwo. Nio malaika chana asisiikha Petero libeka, amusiisimusia ne aloma ali, “Yinyokha Khangu!” Ao ne nao kiminyololo kiakwa khukhwama khu makhono ka Petero. 8Nio malaika aloma ali, “Yeboa kumusiipi kwowo, mala wefware biraaro biowo.” Petero akhola ario, nio malaika chana amuboolela ali, “Yefwara likooti liowo khuche.” 9Petero amuloondakho ne se amanya ali, niko malaika akhola ako kaba kang'ali tawe; akelanga ali kamalola. 10Babira khu musikaari owe khunyoa nende owa khabili, ekhumaliilikha beecha khu silibwa sie bichuuma siicha mu lukoba. Silibwa esio sisiene siekukha, mala barura enje. Bekha khu ngila eya mwalo, mala ao ne nao malaika alekha Petero.

11Nio Petero amanya kamwikholekhekho, mala aloma ali, “Nono nakhamanya ndi kali ng'ali! Omwami arumire malaika wewe khukhundusia mu bunyali bwa Herodi, ne khurura mu buli siindu nisio Bayaudi bebaasianga bali silakholekha.”

12Nga ne amanya ario, acha munju mwa Maria maawe owa Yoana owe lisina liliindi bali Mariko, ebweeneyo babaandu bakali baba bebuusiisieyo khu saba. 13Petero akhong'oonda khu lwiiki lwenje, mala omukhaana bali Roda omukholi owe munju omwo acha khukhwikula. 14Omukhaana chana amanya kumumilo kwa Petero, mala ekhoya lukali. Busangaafu bwakila khwikulayo tawe, ne kakhali atima akobola munju ababoolela ali, “Petero ali khu muliango!” 15Baboolela omukhaana oyo bali, “Okwa kamalalu ewe!” Ne kakhali niye aandalasilia elala ali kali kang'ali. Nio bamukobosia bali, “Oyo malaika wewe.”

16Siise esio Petero achiililila khukhong'oonda. Ekhumaliilikha bekula lulwiiki, ne nga bamubona, bauka. 17Petero abasisia ne kumukhono kwewe mala basila, ababolela nga Omwami ne amurusiisie mu siboe. Nio aloma ali, “Boolela Yakobo ne basuubili babaandi boosi kano.” Nga amala ario arekukha acha abuundu aandi. 18Oli bwasia, bulomani bwabao akari we banamae khu kakaaba ne kekholeekhe khu Petero.

19Herodi arusia lilaka bayime Petero, ne se bamunyoola tawe. Nio areeberesia banamae mala arusia lilaka berwe. Enyuma wa kano, Herodi arura e Buyuda acha amenyakakho mu Kaesarea.

Lifwa lia Herodi

20Herodi aakhalalila lukali babaandu ba Tiro ne Sidoni, khwako becha mu bipupu khumubona. Banyoa bafukiilisiana ne Bulasito omwimeelesi we lichipi khuba lubeka lwabwe nio bali abayeete. Nio bacha khu Herodi bamusaba kumuleembe, sikila sibala siabwe siasakhanga biakhulia khukhwama mu sibala sio mwami oyo.

21Khu ndaalo nabulebe, Herodi efwara chingubo che bubwami, ekhala khu ndebe yewe eye bubwami, mala alomaloma khu baandu. 22Babaandu baapa luyoka ne baloma bali, “Se ali omundu olikho olomaloma tawe, ne kakhali Wele!” 23Abwene ne abwene malaika wo Mwami eera Herodi sikila se aelesia Wele luyali tawe. Chinyeende chamulia siise esio aafwa.

24Elomo eya Wele yachiililila khubalaa.

25Baranaba ne Saulo bamaliilisia kimilimo kiabwe mala bakobola khukhwama Yerusalemu, becha ne Yoana olaangwa Mariko.

Currently Selected:

Bikh. 12: LUBUKUSU

Highlight

Copy