Zacarías 13
13
Judá runakuna Tayta Dios munashqanno kawananpaq nishqan
1<<Tsay witsanmi pukyupita pashtamuq yakuwan maylaqno Davidpita miraqkunata y Jerusaléncho taq runakunata jutsankunapita perdonashaq>>.#Eze. 47.1-12; Joel 3.18; Juan 4.10-14; 7.38; Apoc. 22.1-2.
2Lapanta mandaq Tayta Diosmi kayno nin: <<Tsay witsanmi intëru kay nacioncho ïdulukunata ushakätsishaq. Tsaymi qepa yuriqkuna tsay ïdulukunapa jutinkunatapis manami musyanqanatsu. Tsaynölami lula profëtakunatapis y lutanta yarpätsiq supaykunatapis ushakätsishaq. 3Noqapa jutïcho pipis lulakur wilakuptinqa kikinkunapa taytan y mamanmi kayno nipäkunqa: <¡Qamqa kikikipa yarpaynilaykipitami Tayta Diospa wilakuqnin kashqaykita niykanki! Tsayno nishqaykipitami wanunkipaq>. Tsayno nirmi lutanta wilakuykaqta kikinpa maman y taytan tuksipäkunqa.
4<<Tsay witsanmi lapan lula profëtakuna lulakur wilakushqanpita pasaypa penqakärinqa. Tsaymi profëta aylukushqan qaratsapita rurashqa mantunta imaypis aylukärinqanatsu ni profëta tukärinqanatsu. 5Tsaypa trukanqa kaynömi nipäkunqa: <Noqaqa manami profëtatsu kä. Chakra runala karmi wamra kashqäpita patsa noqaqa chakralacho winashqä>. 6Pipis <¿imanirtaq cuerpuyki kutsushqa kaykan?>#13.6 Baalpa profëtankuna kutsukushqanta musyanaykipaq liyinki 1Rey. 18.28. nir tapuptin kaynömi nipäkunqa: <Tsaytaqa amïgükunapa wayincho arurmi malograkushqä> >>.
7Lapanta mandaq Tayta Dios kaynömi nin:
<<Espäda, uyshata mitsinanpaq churashqä amïgüpa contran rikakuy.
Uysha mitsiqta wanuykatsiptï uyshankuna wakpa kaypami aywakärinqa.#Mat. 26.31; Mar. 14.27.
Uysha malwakunatapis ushakätsishaqmi.
8Tsaymi kay nacioncho taqkunaqa pulanpita mas wanupäkunqa.
Wakilannami kawapäkunqa.
9Kawaykar quëdaqkunataqa jutsaynaq kananpaqmi purificatsishaq.
Qellayta ninawan fundiqno y qorita ninawan qanranta jorquqnömi paykunata purificashaq.#Isa. 1.25; 48.10.
Paykuna manakamaptinqa mayashaqmi.#Ose. 2.23.
Tsaymi kayno nishaq: <Qamkunaqa kuyashqä wamräkunami karkaykanki>.
Paykunanami kayno nipäkamanqa: <Noqakunapa Diosnïqa qammi kanki> >>.
Currently Selected:
Zacarías 13: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
