Lucas 16

Astütu ashmayman Jesús tinkutsishqan

1Mastapis discïpulunkunata yachatsir Jesús kayno nirqan: <<Juk rïcu runapashi mas yärakushqan ashmaynin karqan. Tsay ashmaypaqshi rïcu runata wilaparqan imaykantapis lutala ushaykashqanta. 2Tsawraqa ashmayninta qayaykatsir kayno nirqan: <Runakuna rimapäkun imäkunatapis lutala ushaykashqaykitami. Kananpitaqa mananami imapaqpis yärakushaykinatsu. Lapanta cuentata qomänaykipaq kamarikuy>.

3<<Tsawraqa ashmay yarpachakurqan kayno nir: <Patronnï qarqamaptinqa ¡imataraq kanan rurashaq! Chakracho aruytaqa qelanämi. Imata manakuytapis penqakümi. 4¡Kananmi sï, imata ruranäpaqpis musyä! ¡Patronnï qarqamaptinpis runakuna wayincho chaskimänanpaq kaynömi rurashaq!>

5<<Tsayno yarpachakurkurshi patronninpa jaqan kaq runakunata juk juklayla qayaykatsir punta kaqta tapurqan kayno nir: <¿Aykataq patronnïpa jaqan kaykanki?>

6<<Tsayshi kayno nirqan: <Paypa jaqan kaykä ishkay pachak (200) läta aceitimi>. Tsawraqa ashmay kayno nirqan: <Pachak (100) läta aceitilatana päganaykipaq kay papilman firmay>.

7<<Tsaypitashi juknintana kayno tapurqan: <Qamqa ¿aykataq jaqan kaykanki?> Paypis kayno nirqan: <Chusku pachak (400) säcu trïgumi>. Tsayno niptinshi kayno nirqan: <Kimsa pachak (300) säculatana päganaykipaq kay papilman firmay>.

8<<Tsayno astütu kashqanta musyaykurshi patronnin espantashqa rikakurqan. Tsay ashmay yarpachakushqannömi Tayta Diosman mana yärakuqkunapis amistäta rurananpaq Diosman yärakuqkunapitapis mas yarpachakärin. 9Noqa kaynömi nï: Qamkunapis kay patsacho qellaynikiwan y imaykaykikunawanpis waktsakunata yanapar amïgukunata ashipäkuy. Tsaynöpami wanuptikipis gloriacho mana ushakaq wayiman chaskipäkushunkipaq.

10<<Walkalata tsararashqanwan alita rurarqa atskata tsarararpis alitami ruranqa. Walkalata tsararashqanwan alita mana rurarqa atskata tsarararpis manami alita ruranqatsu. 11Kay patsacho riquëzaykiwan runa mayikita mana yanapaptikiqa ¡imanöparaq Tayta Dios gloriacho riquëzakunata kamaripäshunkiman! 12Jukpa kaqkunawan mana alita ruraptikiqa Tayta Dios ¿yärakushunkimantsuraq qampa kaqkunata qoykushunaykipaq?#16.12 Jukpa kaqkunaqa kay patsacho kaqkunami kaykan. Noqantsipaq kaqqa gloriacho riquëzata chaskinantsipaq kashqanmi kaykan.

13<<Manami pipis ishkay patronta sirvintsu. Ishkay patronta sirvirqa jukninta chikin y juknintana kuyan. Jukninta cäsukun y juknintaqa manami cäsukuntsu. Tsaynölami rïcu kanalaykipaq yarpachakurqa Tayta Diosta sirviyta mana kamäpakunkitsu>>.

14Tsayno yachatsishqanta mayaykurmi fariseukuna rïcu kaylapaq yarpachakärishpan Jesústa asiparqan. 15Tsawraqa Jesús kayno nirqan: <<Qamkunaqa runakunapa nawpancho ali tukäriptikipis Tayta Dios musyanmi shonquyki imano kashqantapis. Tsaymi runakuna respitashuptikipis Tayta Diosqa melanäshunki.

Tayta Diospa palabranta cumplinanpaq Jesús nishqan

16<<Tayta Diospa leyninkuna y profëtakuna qelqashqankunaqa Bautizaq Juan wilakushqanyaqmi karqan. Kananqa Tayta Dios mandaykashqan chayamushqantanami wilakuykä. Tsaymi atska runakuna imaykanöpapis tsay mandashqanman yaykuyta munarkaykan. 17Itsanqa jana patsa y kay patsa ushakaptinpis leyninkunacho nishqankunataqa Tayta Dios lapantami cumplinqa.

Majayuqkuna mana rakikänanpaq Jesús yachatsishqan

Mateo 5.31-32; 19.9; Marcos 10.11-12

18<<Mayqan runapis warminpita rakikarkur juk warmiwan tarqa adulteriu jutsatami ruraykan. Tsaynölami runanpita rakikashqa warmiwan tarqa adulteriu jutsata ruraykan>>.

Lázarupita y rïcu runapita Jesús wilapashqan

19<<Juk rïcu runashi karqan ali röpakunalata jatikuq. Waran waranshi fiestata rurar ali alilata mikupäkuq. 20Tsay rïcu runapa punkunchöshi juk waktsa runa Lázaro jutiyuq jamararqan. Paypa intëru cuerpuntashi qeri ushaykarqan. 21Aläpa mikanarshi rïcu runapa mësanpita shikwashqalantapis mikuyta munaparqan. Tsaychöshi alqukunapis qerinta laqwaparqan. 22Lázaro wanuykuptinnashi Abrahampa nawpanman angilkuna aparqan. Rïcu runa wanuykuptinnashi pampapäkurqan.

23<<Hadescho fiyupa nakarnashi rïcu runa karupita rikarqan Lázaruta Abrahampa nawpancho kaykaqta. 24Tsawraqa qayakurqan kayno nir: <Tayta Abraham, kuyapaykalämay. Lázaruta kachaykalämuy dëdunta ushmarkatsir shimïta ushmatsipämänanpaq. Kay ninacho rupar fiyupami nakaykä>.

25<<Tsayno niptinshi Abraham kayno nirqan: <Hïju, yarpay imaykayuqpis kashpayki ali kawashqaykita. Lázarumi itsanqa waktsa kashpan fiyupa nakarqan. Tsaymi kananqa kaycho kushishqa kaykan y qamqa tsaycho nakaykanki. 26Tsaynöpis jiwjiwyaykaq raqrami rakiykämantsi. Tsaymi qam kashqaykiman pipis tsimpamuyta mana kamäpakuntsu ni noqa kaykashqämanpis tsimpamuyta mana kamäpakuntsu>.

27<<Tsayno niptinshi rïcu runa kayno nirqan: <Tayta Abraham, tsayno kaptinqa papänïpa wayinman Lázaruta kachaykulay. 28Tsaycho pitsqaraqmi wawqïkuna kaykan. Paykuna kay nakayman mana shamunanpaq wilaq aywaykulätsun>.

29<<Tsawraqa Abraham kayno nirqan: <Paykuna tsararanmi Moisés y profëtakuna qelqashqankunata. Tsaykunata cäsukäritsun>.

30<<Tsayshi rïcu runa kayno nirqan: <Tayta Abraham, tsaytaqa manami cäsukärinqatsu. Juk runa wanushqanpita kawarirkamur wilakuptinmi itsanqa jutsa ruraykunata kacharinqa>.

31<<Tsayno niptinshi Abraham kayno nirqan: <Moisés y profëtakuna qelqashqankunata mana cäsukuykarqa wanushqanpita kawarirkamur wilakuptinpis manami cäsukärinqatsu> >>.

Currently Selected:

Lucas 16: qvmB

Highlight

Copy