Juan 15

Üva yöraman Jesús tinkutsikushqan

1Tsaypitanami Jesús kayno nirqan: <<Noqami rasunpa kaq üva yöra kaykä.#Sal. 80.8-16; Isa. 5.1-7. Taytänami kaykan üva uryaq. 2Mayqan rämäpis mana wayuptinqa Taytämi muturiykunqa. Wayuq kaqtami itsanqa mas wayunanpaq shumaq rämapanqa. 3Üvata rämapaptin limpiu kashqannömi qamkunapis nishqäkunata chaskikur jutsaykikunapita limpiuna karkaykanki.

4<<Noqawan juklaylano kawapäkuy. Tsayno kawaptikiqa noqapis qamkunawan juklaylanömi kaykäshaq. Üvapa räman yörancho mana laqarar mana wayushqannömi qamkunapis noqawan juklaylano mana karqa Tayta Dios munashqanno kawayta mana kamäpakärinkitsu.

5<<Noqa kaykä üva yörami. Qamkunami rämäkuna kaykanki. Tsaymi noqawan juklaylano kawarqa ali wayuq rämano karkaykanki. Noqawan mana juklaylano kawarmi itsanqa ima ruraytapis kamäpakärinkitsu. 6Pipis noqawan mana juklaylano kawarqa yöranpita mutushqa rämanömi tsakikäkunqa. Tsakiptinnami shuntarkur ninaman qaykunqa.

7<<Noqawan juklaylano karqa y yachatsishqäno kawarqa lapan manakamashqaykitami chaskipäkunkipaq. 8Tsaynöpami ali wayuq üvano kar rasunpa discïpulükuna karkaykanki. Tsayno kawapäkuptikimi Taytäta alabapäkunqa.

9<<Taytä kuyamashqannömi noqapis qamkunata kuyä. Tsayno kuyaykaptïqa qamkunapis kuyapäkamay. 10Mandamientükunata cumplishpaykiqa rasunpami kuyarkaykämanki. Tsaynölami noqapis Taytäta kuyar mandamientunkunata cumpliykä. 11Tsaykunata niykä noqa kushishqa kawashqäno qamkunapis kushishqa kawanaykipaqmi.

12<<Mandamientüqa kaynömi kaykan: Qamkunata kuyashqäno jukniki juknikipis kuyanakäriy.#Juan 13.34; 15.17; 1Juan 3.23; 2Juan 5. 13Rasunpa kuyakuq karqa amïgun rayku wanurpis wanurinmanmi. 14Lapan nishqäkunata cäsukurqa qamkunapis amïgükunami karkaykanki. 15Ashmay kashqaykita mananami nipäkushaykinatsu. Ashmaytaqa manami patronnin wilapantsu imata yarpashqantapis. Amïguntami itsanqa lapan yarpashqanta wilapan. Tsaynölami qamkunatapis amïgü kaptiki Taytä nimashqankunata lapanta wilapashqä.

16<<Manami qamkunatsu akramashqanki, sinöqa noqami qamkunata akrashqä. Tsayno akrashqä maypa aywarpis ali wayuq rämano kar alikunata rurapäkunaykipaq y tsay rurashqaykikuna imaypis kaykänanpaqmi. Tsayno kawaptikimi noqapa jutïcho lapan manakärishqaykita Taytä qoshunkipaq. 17Mandamientü imata nishqantapis yapaymi kayno nï: Jukniki juknikipis kuyanakur kawapäkuy.

Jesúsman yärakuqkunata chikipäkunanpaq nishqan

18<<Runakuna chikishuptiki ama lakikäriytsu. Tsaypa trukanqa tantiyakäriy noqatapis puntata chikipäkamashqanta. 19Jutsata rurar kawapäkuptikiqa Diosta mana cäsukuq runakuna kuyapäkushunkimanmi. Tayta Dios munashqanno kawaptikimi itsanqa chikipäkushunki.#Juan 17.14-18. Pay munashqanno kawanaykipaqmi qamkunata akrashqä.

20<<Yarpapäkuy qamkunata kayno nishqäta: <Ashmayqa manami patronninpita mas munayniyuqtsu kaykan>.#Mat. 10.24; Luc. 6.40; Juan 13.16. Tsay nishqänölami noqata chikiykämarqa qamkunatapis chikipäkushunkipaq. Noqa nishqäkunata chaskikurqa qamkuna nishqaykitapis chaskikärinqami. 21Noqa rayku runakuna tsayno chikipäkushunkipaq kachamaqnï Taytäta mana reqishpanmi.

22<<Kay patsaman shamur mana wilapaptïqa manami jutsayuqtsu kapäkunman.#15.22 Tsayno nirqa Jesucristo kaynömi nirqan: Kay patsaman shamur mana wilakuptïqa mana chaskikamashqanpita runakuna manami jutsayuq kanmantsu karqan. Diospa wilakuyninta wilapashqäta mana chaskikurmi jutsayuq karkaykan. 23Noqata chikimarqa Taytätapis chikinmi.

24<<Pipis mana rurashqan milagrukunata paykunapa nawpancho ruraykaptïpis chikimarmi jutsayuq karkaykan. Noqata chikimarqa Taytätapis chikinmi. Tsay milagrukunata mana ruraptïqa manami jutsayuqtsu kanman karqan. 25Leyninkunachöpis kaynömi niykan: <Jutsaynaq kaykaptïmi runakuna chikimashqa>.#Sal. 35.19; 69.4. Tsay qelqarashqannölami lapanpis cumplikaykan.

26<<Taytä kaqpita Yanapakuqta kachamuptïmi noqapita runakunata shumaq musyatsinqa. Tsay Yanapakuqqa rasun kaqta tantiyatsikuq Espíritu Santumi kaykan. 27Tsaynölami qamkunapis qalaykunanpita patsa noqawan purishqa kar noqapita musyatsinki.

Currently Selected:

Juan 15: qvmB

Highlight

Copy