Santiago 4

Jutsata mana ruraypa kawanantsipaq nishqan

1¿Imanirtaq pelyalar y qayapänakular kawarkaykanki? Tsayno karkaykanki shonquykikunacho mana ali yarpay kaptinmi. 2Wakinkuna imaykayuqpis kaqta rikarmi qamkunapis paykunano imaykatapis munarkaykanki. Tsaymi imaykanöpapis tariyta munar runa mayikitapis wanutsipäkunki. Tsayno rurarpis Tayta Diosta mana manakurmi munashqaykitaqa taripäkunkitsu. 3Manakaqkunacho ushanaykipaq kaptinmi manakurpis chaskipäkunkitsu.

4¡Mana cäsukuq jutsasapa runakuna! ¿Manaku musyapäkunki mana alikunata rurar Tayta Diospa contran kapäkushqaykita? Pipis mana alita rurarqa Tayta Diospa contranmi karkaykan. 5¿Manaku criyipäkunki Tayta Diospa palabran niykashqanta? Tsaychömi nimantsi mana alikunata ruraptintsi noqantsiman kachamushqan Espíritu Santu rabyakushqanta. 6Tsayno karpis kuyapämantsimi. Tsaymi palabranchöpis kayno qelqaraykan:

<<Yachaq tukuqkunataqa Tayta Dios manami yanapantsu.

Humildi kaqkunatami itsanqa kuyapar yanapan>>.#Prov. 3.34; 1Ped. 5.5.

7Tsayno kaykaptinqa mana yachaq tukuylapa Tayta Dios nishqanta cäsukäriy. Diabluta ichipay.#Mat. 4.3-11; Efe. 6.12; 1Ped. 5.8-9. Ichipaptikiqa qeshpikunqami.

8Tayta Dioswan imaypis kawapäkuy. Tsayno kawaptikiqa paypis qamkunawanmi kaykanqa.

¡Jutsasapakuna! Makikita maylakushqaykino jutsa ruraykunata kachariy. Janan shonqula cäsukunaykipa trukanqa lapan shonquykiwan Tayta Diosta cäsukäriy. 9Jutsa rurashqaykipita pasaypa lakikur waqapäkuy. Asikärinaykipa trukanqa waqapäkuy. Kushikärinaykipa trukanqa lakikäriy. 10Tayta Diosta cäsukur mana yachaq tukuypa kawapäkuy. Tsayno kapäkuptikiqa yanapashunkimi.#Mat. 23.12; 1Ped. 5.6.

Mana jamurpäkuq kanantsipaq nishqan

11Wawqi panikuna, mayqanikipis ama jamurpänakuytsu. Pitapis jamurparqa Tayta Dios kuyanakunantsipaq nimashqantsi mandamientuta manakaqmanmi churaykantsi. Tayta Diospa mandamientunqa manami manakaqman churanantsipaqtsu kaykan, sinöqa cäsukunantsipaqmi.

12Tayta Diosmi leyninkunata qomashqantsi. Paylami nimäshun jutsayuq kashqantsita o jutsaynaq kashqantsitapis. Paylami munayniyuq kaykan salvamänantsipaq o infiernuman qaykamänantsipaqpis. Tsayno kaykaptinqa ¿pitaq qam kanki runa mayikita jamurpänaykipaq?

Ima pasananpaq kashqantapis mana musyashqantsi

13Wakinnikiqa kaynömi nirkaykanki: <<Warakuna juk lädu markapa aywar tsaycho juk wata negociamushun atska qellayta gänamunantsipaq>>.

Tsayno niqkuna, shumaq mayapäkamay. 14Manami musyantsitsu warakuna ima pasamänantsipaq kashqantapis.#Prov. 27.1. Pukutay yurirkamur elqakäkushqannölami noqantsipis ushakaqla kaykantsi. 15Tsayno kaykaptinqa kayno nishwan: <<Tayta Dios munaptin kawarqa kaytapis y waktapis rurashunmi>>.

16Tsayno ninaykipa trukanqa imata ruranaykipaqpis orgullösu karmi alabakurkaykanki. Tsayno parlashqaykiqa manami alitsu. 17Alikunata ruranantsipaq kashqanta musyaykar mana rurarqa jutsatami ruraykantsi.

Currently Selected:

Santiago 4: qvmB

Highlight

Copy